Morago mola gae, makgarebe a be a le ka phapošing ya boapeelo. Bogobe bo be bo le kgauswi le go butšwa.

Boitumelo o ile a paka dino ka setšidifatšing gomme a tšwela ntle go yo thuša Lethabo ka poraye. Ya ba o bulela seyalemoya sa koloi gomme a tlogela lebati le bulegile gore ba kgone go kwa ge mmino o rothotha.

Mafelelong, dijo di ile tša loka gomme ba dula fase tafoleng ka tšarateng ba thoma go goja.

“Ke nako mang? Bjale gona ke nagana gore ke kwele,” Tshidiso o ile a kamakametša e le ge a be a dula diropeng tša Boitumelo, mahlo a gagwe a tswalelegile gannyane.

“Aowa, babes. Ke kgopela o no kgotlelela gannyane. Nako e fihlile. Go šetše fela metsotso e masometharo gore e be gare ga bošego,” o ile a realo, a emanyana e le ge a betha Tshidiso ka tladimolongwana. “Hle, babe. Mmm? Ke go nyaka thoko ga ka ge re thoma ngwaga wo moswa.” O ile a mo atla gape, lebaka le letelele gabjale.

Lethabo le Leticia le bona ba be ba inotleletše ka lefaseng la bona, ba phopholana. Ba be ba khoše kudu go ka tshwenyega ka batho bao ba bego ba ba feta mmileng.

“Babe, e re ke ile go tsea dikhirikhethe, ke ra dithuthupiši. Nako e batametše,” gwa hwenahwena Boitumelo, a emiša Tshidiso diropeng tša gagwe.

O ile a tekateka a lebile ka phapošing ya bodulo gomme a re ge a boa le dithuthupiši, borammino ba diyalemoya ba thoma go balela, “Lesome, senyane, seswai …” Ka potlako ya ba lefaufau le tlala ka mašata a lethabo: “Happy New Year!” Ya ba dikoloi le tšona di thoma go letša dipele mola lekheišene ka moka le be le duma ka koša ya go swana.

Tshidiso o ile a emelela a le borokong gomme a gokara Boitumelo. Leticia le Lethabo bona ba be ba se gona mo meketekong, e le ge ba iphuthetše ka gare ga borutho bja go gokarelana.

Boitumelo o ba phaphamišitše gomme ba bethantšha digalase mmogo ba nwela ngwaga wo moswa. Morago Leticia le Lethabo ba tšwela pele bjale ka ge e ke go be go se selo seo se ka phenkgišanago nabo.

Ge e le Tshidiso le Boitumelo bona ba ile ba leba ka phapošing ya bodula ba swere dino gomme ba fihla ba dula sofeng mmogo, difahlego tša bona di le kgauswi ebile ba latswana. Go be go sena tsela ye nngwe yeo e ka phalago ye ya go kgaola ngwaga!

Nako e be e šetše e bethile 2am ge mafelelong ba tla leba malaong, ba kgonthišiša gore ba efoga dikotikoti tša go hloka selo gammogo le mabotlelo ao a bego a tletše fase.

“Boitumelo! Tsoga! Hei! Boi monna! Tsoga hle! Tsoga!” Lethabo o ile a kokota lebating la phapoši ya borobalelo ya Boitumelo. “Aowa monna. Tsoga! Gape e šetše e le iri ya lesome, jo. Boi!”

“Babe, wake up. Chomi ya gago e ya go bitša,” Tshidiso a realo, a šišinya Boitumelo.

“No… Ke eng!”Boitumelo a belaela, a fetlologa. “Ntlogele ke robale, monna.”

“Boitumelo, mane!”Lethabo o be a fela pelo. Aowa mane! Ke nyaka tšhelete ya go reka coke, jo. Gape hlogo ya ka e a fatša. Papalase e ya mpolaya, monna!”

Boitumelo o ile a tšwela pele ka go gona. Kgarebe ya gagwe ya tšwela pele ka go mo tsoša gomme mafelelong a bula mahlo a gagwe ao a bego a hubetše. “Ke Lethabo. O re o nyaka tšhelete ya go reka coke.”

E rile ge a le gare a ngunanguna, Boitumelo a bula woteropo gomme a ntšha mokgobo wa tšhelete ka potleng ya baki. O ile a thoma go bala tšhelete yeo gomme a phošetša diranta tše makgolo a mabedi a go momagana bolaong. Morago a šušubetša tšhelete yeo e bego e šetše ka potleng gape gomme a boela malaong. “Mo fe ye, baby. Ke nagana gore ke a lwala. Ke hloka fela go ikhutšanyana.” O ile a tsena mapaing gomme ntle le nako ye kaakang, ya ba o thoma go gona.

E rile ge Lethabo a boa sepatsa lebenkeleng, a dula le makgarebjana ao a mabedi setupong, ba inwela coke le melatšana ya maabane bošego . Ba be ba bonala ba lapile.

Boitumelo o ile a tsoga ka 1pm gomme a hlapa ka metse a go tonya šawareng. Ya ba o dula le bona, le ge hlogo ya gagwe e be e sa le boima.

“Hee banna…Le strong, ne? Le kgonne bjang go tsoga ka masa bjale? Gape nna ke sa tagilwe le nou,” Boitumelo a realo, a dula thoko ga Tshidiso. Ba ile ba swarana ka matsogo.

“O nyaka ya go tonya thwee, babe. E tla go thuša ka papalase ye,” gwa realo Tshidiso.

“Ja …Eupša ke manyami, boy. Ga go sana bjala,” Lethabo a realo.

“Gona ga rena kgetho. Re swanetše go yo reka bjo bongwe gona bjale. Hlogo ye e tloga e mpolaya, monna.” O ile a emelela. “Girls, le tsamaya le rena?”

“Aowa,” Tshidiso o ile a fetola ka pela, a lebeletše Leticia, yo a bego a bonala a tlabegile. “Nna ke lapile. Ke nyaka fela go ikhutša.”

“Ok, gona re tla le boela le dino tša go swana le tša maabane,” Boitumelo a realo, a khunamela pele gomme a betha kgarebe ya gagwe ka tladimolongwana. “Ke sa ile go tšeya tšhelete ka phapošing .”

Boitumelo o ile a robala setulong sa monamedi mola Lethabo yena a be a otlela a lebile thabeneng.

***

Re botše: O nagana gore go ile go direga eng morago ga se?