Ka gare ga thabene batho ba be ba eja leoto mmino o kgatlampana.

E rile ge a fihla tafoleng yeo Lethabo a bego a dutše le dikgarebe tšela, Boitumelo a kwa a sa dudišege. O ile a nola ditšhitswana tše nne tša bjala tšeo di bego di šetše ka paketeng gomme a re, “banna, re swanetše go sepela bjale. A re yeng re yo iketla go gongwe.”

“Eng!” makgarebe a ile a bolela sammaletee.

Ge e le Lethabo yena o no itulela moo, a mo kgohloletše Mahlo.

“Ke tla hlaloša ge re le tseleng. Ke a kgopela hle, banna. A re sepeleng. Etla, moratiwa,” o ile a realo, a le gare a porašaporaša meriri ya Tshidiso ka seatla.

“Eupša, babe. Nna ke rata go ba mo. Le gona e sa le ka pela… Iri ya bošupa? Hai! Aowa! Le ke lekiki la mafelelo a ngwaga, babe. A re robale goba go fihla gare ga mpa ya bošego.”

Mogwera wa gagwe le yena o ile a dumelelana le yena.

“Ke ya o kgopela hle, ntshepe, babe. Ke ya go rapela.”

O ile a utswa Lethabo ka ntakana ya leihlo. Go be go le molaleng ka tebelelo ya sefahlego sa gagwe gore o be a tseba seo se diregilego. Go be go tla direga eng ge e le gore Lethabo o be a šetše a hlakahlakantšhitše megopolo ya makgarebe ao gore a se sepele? Gape maitekelo ka moka ao a bego a a dirile a be a tla no wela fase. Eupša go be go le molaleng gore a ka se šomiše matsebetsebe ale moo. Mong wa BMW o be a ka mo tanya. Ba be ba swanelwa ke go sepela pele selo se sengwe sa bošula se ka direga.

“A re tsamayeng, hle banna,” o ile a rapela.

Boitumelo o ile a kwa a imologa ge a bona makgarebe a emelela, ba ikemišeditše go sepela. Ge e le sefahlego sa Lethabo sona se be se tletše manyami, eupša Boitumelo a tseba gore ga a na kgetho ntle le go ba latela. Le ge a be a thswenyegile, Boitumelo o ile a ipotša gore mogwera wa gagwe o tla mo swarela ge nako e dutše e sepela. Gabotsebotse, o be a tseba gore Lethabo o tla mo leboga mola dino di ba feletše.

E rile ka nako yeo ba šalago ba fihla ngwakong wa batswadi ba gagwe, ya ba o ikwa a tletše boitshepo.

“Girls, le amogetšwe, parateising ya ka. Ikweng le le gae. Go tla be go sena motho mo beke ka moka,” gwa realo Boitumelo, e le ge a be a le gare a notlolla lebati la ka pele gomme a tšhuma mabone.

“Wow! Ntlo ye e botse ka nnete. Batswadi ba gago ba swanetše goba ba humile le dinala, mos,” gwa realo Tshidiso.

Mogwera wa gagwe Leticia a šišinya hlogo e le ge a kwana le yena.

Ba ile ba tsena ka ngwakong gomme Boitumelo a ba eta pele ba lebile ka phapošing ya bodulo. O ile a tšhuma TV gomme a re, “Girls, ke kgopela le re emele mo. Nna le Lethabo re nyaka go itsheba mabapi le ka mo re ilego go thabiša baeng ba rena ba bohlokwa ka gona…”

Makgarebe a ile a hwa ka disego.

O ile a retologela go Lethabo. “Mokgotse, a re ye ka mola phapošing ya ka. Go na le se ke nyakago re bolela ka sona.”

Lethabo o ile a botolla mogwera wa gagwe, eupša a emelela ge a lemoga gore makgarebe a be a mo lebeletše. O be a sa nyake gore ba lemoge kgohlano yeo e bego e le gona magareng ga gagwe le Boi.

Ba rile ge ba le gare ga sepela ka phasetše ba lebile phapošing ya borobalo, Boitumelo a seba-seba a re, “Aowa monna. Seo se diragetšego se diragetše. A re je nyonko ye re tlogele go hlwa re e lwa.” O ile a tsenya seatla ka potleng gomme a tšwa le matsebetsebe. “Bona fela…o kile wa bona tšhelete e kaaka bophelong bja gago?”

Lethabo o ile a kgotholela tšhelete yeo mahlo a magolo. “Tšhelete ye kaaka, monna? Ke bokae yona ye?”

“Emanyana monna,”gwa realo Boitumelo mola a dula fase bolaong gomme a thoma go bala tšhelete.

“Joo! Ke dikete tše hlano tša diranta. Five thousand rand, boy!”o ile a goeletša. “O ka kgolwa se!”

Lethabo o ile a myemyela gannyane. “Ke kgolwa gore ga re ile go lefela se ka maphelo a rena, bra. Gape ga gona tšhelete ye e ka no tlago boleta bjale. Makgolo o phela a realo, jo.”

“Phola man! Ei! Wena! Iketle, monna. Ga gona motho yo a mponego. Ge e le tšherinyana yela yona e be e hwile ka boroko. Yena o no nagana fela gore ke nna boyfriend ya gagwe. O be a tagilwe la mafelelo, monna. Iketle. Ye tšhelete, ke mpho ya badimo le Modimo, boy. Ba nyaka gore re ipshine ka monate la mathomothomo, ke a go botša,” Boitumelo o ile a kgonthišetša mogwera wa gagwe.

“O nagana bjale, monna?”

“Of course, man.Wena ikitle, ntwana. A re boyele morago baneng re je joy. Monatenyana boss. Wa nthola, jo?” O be a bile a phaphatha mogwera wa gagwe magetleng.

“OK! A re ba tsene, monna.”

***

Re botše: Na dinotagi di ka go tsentšha mathateng bjang?