“Yini, sthandwa sami?”
“Siyahamba njengamanje, Spha!” kwasho uLinda.
“Ngobani?”
“Angeke sivele sinethezeke kanjena. Kufanele sihleze siqaphile ngoba ungumsolwa ecaleni elibucayi!”
Wakhomba ibhulukwe kanye nesikibha ayekundlale embhedeni okwakukade kulale u-Owethu kuwo.
“Gqoka, Spha! Awuke wenze into engikutshela yona nje kube kanye empilweni yakho!”
“Sthandwa sami kwenze njani?”
“Gqoka, Spha! Siyahamba njengamanje!”
Washo lokhu egqigqa phambi kwami uLinda. Ngasukuma ngambamba ngamsondeza esifubeni.
“Wafuna sihambe ngo 2 ekuseni, Linda? Kwenzenjani, sthandwa sami?
Wabeka ikhanda lakhe ehlombe lami, wangitshela konke ukumxakile.
“Kufanele sithole elinye ihhotela esizokhosela kulona njengamanje, Spha!” Washo lokhu maqede wadlubulundela ezandleni zami. “Uzothini uma kuwukuthi uMpilo usebenzisana nephoyisa thizeni ukuze akuthungathe azibulalene wena mathupha?”
“Yehlisa umoya, sthandwa sami. Angithi uwena ungicebisile ukuba ngimufonele. Ngimufonelile uMpilo. Ngimchazelile konke okwenzeka futhi naye washo ukuthi uyezwa konke engikushilo.”
“Ngivuke manje ngoba ngiphupha uMpilo nabafowabo besithumba! Kade bethembisa ukusilimaza uma wena ungabaniki yonke imali. Bayiqobe yaba izicucu ingane yami, Spha. Ngibabone ngawami amehlo beqoba ingane yami ngocelemba! Bambulele u-Owethu!”
“Sthandwa sami ngiyakucela ukuba wehlise umoya. Akwenzekanga lutho kuthina. Akwenzekanga lutho ku-Owethu. Nangu eceleni kwakho! Mbuke! Akanalutho!”
U-Owethu wayehlezi esihlalweni se-pram ezumekile kodwa konke lokhu uLinda ayekubonile ephusheni lakhe kwavuthisa inhlansi yokwesaba emqondweni wami. Ukutatazela nokwesaba okwakukhungethe uLinda kwangigwinya nami. Ngabona ngamehlo engqondo sithunjwa, kubulawa ingane yami beyiqoba ngocelemba. Ngasukuma ngokushesha, ngagqoka. Kwavevezela umakhalekhukhwini khona kusenjalo. Sama nse. Kwangena umlayezo oqhamuka enombolweni engingayazi. Ngaciphiza inkinobho ngabona ukuthi i-video equkethwe yilomlayezo.
Ngayivula i-video kwavela umuzi ovuthayo. Ngabukisisa ngabona sengathi lomuzi usendaweni engiyijwayele. Wasondela noLinda sabuka naye. Ngempela lomuzi wawusendaweni esiyijwayele. Sahlahla amehlo sibona i-container eseduzane nawo, nokuma kwendawo. Nona kanjani kwakuyiseMlazi kulendawo.
“Hhayi bo!” sahayiza sobabili ngesikhathi sibona ukuthi umuzi wethu we we-RDP lona owawugwinywe amalangabi.
Sezwa izwi elihambisana ne-video. Nakanjani kwakunguMusa, umakhelwane wethu, lona owayekhuluma.
“Ey, Spha, mngani wami,” kwasho uMusa. “Sebevele bawuthungela ngomlilo umuzi wenu. Abafowabo baMdu bathungele umuzi wenu ngomlilo! Bakufuna ufile, mfwethu. Bengingeke ngiphinde ngibuye kulendawo ukube ngiwuwena.”
Ngafonela inombolo eyayithumele i-video, ngawufaka ku-loudspeaker usakhala umakhalekhukhwini.
“Musa!” Samemeza kanyekanye noLinda.
“Spha, Linda! Kuyabheda bafwethu!” kwasho uMusa.
Ngambuza ngathi, “Ubani owenze lento?”
“Abafowabo baMdu,” kwasho uMusa.
“Abafowabo abancane?” kwabuza uLinda.
“Yebo ibona abawuthungele ngomlilo. Kodwa kade bekhonjwa yilona omdala ukuthi benzeni. Lona onamatekisi.”
“UMpilo?”
“Yebo, yena impela uMpilo, lona ohamba nge-S Class Benz. Ngimbone ngawami amehlo ebatshela ukuthi bashise umuzi wenu.”
“Hawu kanjani manje ngoba ngikhulumile naye nje uMpilo? Sikhulume sazwana salungisa yonke into.”
“Hheyi, Spha mina ngikhuluma ngento engiyibonile. UMpilo kade esabisa abantu la ebabuza ukuthi ukuphi uLinda.”
Ngabuza ngathi, “Yenzeke nini yonke lento?”
“Kusanda kwenzeka, Spha.”
Sabukana noLinda simangele.
“Spha usakhona nje?” kwabuza uMusa.
“Sho, ngisakhona mfwethu.”
“Lalela la, mngani wami. Ungaphinde ubuye kulendawo. Labantu bakufuna ufile nomndeni wakho. Ngicela uyisuse le-video efonini yakho. Nami ngizoyisusa kweyami. Labantu bazokubulala, Spha. Abadlali!”
Sitshele umbono wakho: Ucabanga ukuthi kuwubulima ukucabanga kukaSpha kokuthi ukhulumile noMpilo ‘…sazwana salungisa yonke into’? Ngabe abantu abayizigebengu bayayilandela imithetho yobuqotho ngaleyondlela?