Vhuraru havho, hezwi vhe kati na u ya ofisini ya vhophirisipala, vha khou humbula nga ha Rofhiwa. O vha a tshi dzula e mafhungoni fhano tshikoloni. Dzina ḽawe ḽo vha ḽi tshi anzela u wanala mathomoni kha mutevhe wa vha phosho musi mugudisi vhasiho kiḽasini. Madzuloni a u visa bugu yawe a vhale, o vha a tshi ola vhagudisi sa dzikhathuni, a ralo u sumbedza vhagudi ngae. Zwo olwaho zwo vha zwi tshi seisa vhukuma.

“Ndi nnyi uyu?” Kanzhi o vha a tshi vhudzisa. Vhaṅwe vha vhagudi vho vha vha tshi zwi kona u fanyisa khathuni iyo na muṅwe wa vhagudisi tshikoloni. Zwino Rofhiwa u ḓo mbo ḓi rembulusa bambiri ḽawe uri vha vhone dzina ḽa mugudisi vhe a vha ola. Ndi lunzhi he vhagudi vha vha tshi bula dzina ḽe nangoho a vha o ṅwala ḽone.

Muṅwe musi o vhuya a ita khathuni nga mugudisi Vho Nancy; fhedzi vho vha vhe na nḓevhe ndapfu na kutshila – lwe zwa sia vha tshi nga kuvhuḓa. Hovha hu khathuni i no seisa. Huno ho ḓa ha vha na vhuthada musi khathuni i tshi vho wanala yo swika zwanḓani zwa Vho Nancy. Rofhiwa o vhidzwa ngei tshiṱafurumu he vhophirisipala vha mulaela uri a ime nga luvhundo.

“Vho sokou nzwondolola – iṱanu humbula muthu o sokou ni bvisela maṱo awe mahuluhulu lwa minete i no paḓa minwe ya zwanḓa zwoṱhe!Ni nga ḓi pfa hani?” Izwo o vha a tshi ṱalutshedza muṅwe na muṅwe a no muthetshelesa. “Ndo vha ndo tshuwa tshoṱhe! Zwi tshi fana na zwiḽani ndo vhona fiḽimu ya u ofhisa ngei ha khonani yanga hu vhusiku-kati nahone zwazwino ndi vho ofha u ya hayani ndi ndoṱhe ngauri nnḓa ho swifhalesa.”

Zwazwino, Khuliso, Caroline na Ipfani vho no vha tsini na u dzhena ofisini ya vhophirisipala, mugudisi Vho Tinetariro vho vharanga phanḓa.

“Vhege yo fhelaho ndo ni nea ndaela ya uri ni songo amba-amba musi hu si na mudededzi,” ndi Ipfani. “Vhonani zwino no ri dzhenisa mashikani!”

***

Ri vhudzeni vhuḓipfi haṋu: Ni vhona zwo tea kana zwi songo tea uri mugudisi Vho Tinetariro vha swikise mafhungo aya kha vhophirisipala? Ndi ngani ni tshi ralo?