Hu pfala u lila ha sairini ya u ḓivhadza uri bureiki yo fhela. Vhagudi vha tshikoloni tsha phuraimari ya Mutshutshu vha a litsha zwoṱhe zwe vha vha vhe kati nazwo nga tshifhinga tsha bureki vha gidimela dzikiḽasini. Ndi nga matsheloni a vhuria, a rotholelaho; lumuya lu rotholaho lu fhefheḓela ngeno na ngei.
Ngamurahu ha tshifhinganyana, mugudisi Vho Godknows Tinetariro vha rangela na thero ya Life Orientation kilasini ya vhagudi vha mbalo ya 32 fhano kilasini ya Gireidi 7. Ndi munna wa tshiimo tsho linganelaho, vha sumbedza vhe muthu o bvuḓaho nga u tou sedza fhedzi tshifhaṱuwo tshavho. Vho ambara vhurukhu ha buraweni, zwienda zwa muvhala mutsu na dzhesi yo rungwaho nga ulu ya muvhala wa buraweni wo dombelaho.
Khuliso, Ipfani na Caroline vho dzula kha iṅwe ya dzidesike hangeno murahu ngomu kilasini. Ubva tshe themo ya u ranga ya thoma vho vha vha tshi ḓi dzulisa zwenezwi. Hezwo vha tou vha khonani dza u fa na u fhedza. Khuliso u mbo kuḓakuḓa Caroline nga tshikuḓavhavha tshawe.
U a sinyalala. “Mulandu?” U a vhudzisa nga u tou hevhedza. Khuliso a sumba mugudisi
Vho Godknows Tinetariro.
“Sedzani fhaḽa,” u ralo. “Ni khou vhona mini?”
“Vha kati na u ṅwala kha bodo,” u a hevhedza-vho.
Khuliso a dzungudza ṱhoho a tshi setshelela. “No khwaṱhisa nga iḽo fhungo? A ni khou vhona-vho zwine nda khou vhona? Ni tou vha ḽone bofu shu? Lol!”
Caroline a takulela mahaḓa awe nṱha; u vhonala sa a fhelaho mbilu. “Vhonani hafha, a ni litshi zwitambo zwaṋu,” u a fhindula. “Ndo ḓa hafhano u guda. Mbudzeni zwine na khou zwi vhona ni litshe u mphedzela tshifhinga.”
“Inwi ni a ṱavhanya u fhela mbilu,” a ralo. “Sedzani hangeno kha tshikuḓavhavha tsha mugudisi … Ni khou vhona mini?”
Khathihi fhedzi Caroline a ṅwethuwa. Huna kubuli hangeno kha dzhesi kha tshikuḓavhavha tsha mugudisi, hune zwa sia tshikuḓavhavha tshavho tshi tshi ṱodzimela-ṱodzimela musi vhe kati na u ṅwala.
“Na nṋe ndi khou tshi vhona,” hu ḓadzisa Ipfani.
Hu si na zwe vha pfa nga nyito ya tshihevhehevhe tsha vhagudi, mugudisi Vho Tinetariro vha talatadza bodoni. Vha a awelanyana, vha rembuluwa vha posela kupiḓa kwa tshoko ngomu kubogisini; vha ṋula iṅwe tshoko ntswa, vha endela u ṅwala.
“Ndi kubevha!” Khuliso a tou fa nga maseo o tibedza mulomo nga tshanḓa. “Tshenetshi tshi no ṱodzimela tsha dovha tsha vhuyelela ngomu hafhu.”
Vhuraru havho vha fa nga maseo. Khathihi fhedzi, kiḽasi yoṱhe ye hasha maṱo khavho.
Hezwi mugudisi Vho Tinetariro vha tshi rembuluwa vha tshi sedza vhagudi vhoṱhe fhano kilasino, Khuliso, Ipfani na Caroline vha vha vho no fhumula. Vho sokou donola maṱo vho sedza ngei phanḓa sa vhaṅwe vhagudi.
“Ndi nnyi a no khou sea? Ndi nnyi o seaho fhano kiḽasini?” Vha vhudzisa nga vhuhali, vho ralo u sumba vhagudi vhoṱhe nga tshoko tshena. Minwe yavho yo fhomelwa nga vhukhopfu vhutshena ha tshoko.
A huna mugudi a fhindulaho. Fhedzi vhaṅwe vha rembuluwa vha lavhelesa Khuliso, Caroline na Ipfani. Mugudisi Vho Tinetariro vhe ḽiga ḽithihi phanḓa ga – tsini na mutevhe wa u ranga wa dzidesike – vha donolela kilasi yoṱhe maṱo.
Ngomu kiḽasini ho tou tshete!
“A huna na muthihi wa vhoinwi o mpfaho? Ni tou vha madzinganḓevhe noṱhe?” Vha vho tou u halifha tshoṱhe.
***
Ri vhudzeni vhuḓipfi haṋu: Ndi zwo ḓoweleaho u wana vhana vha tshi sea mugudisi wavho, kana avha vhararu vha tou vha na ndalelo na u sa pfela vhuṱungu?