BMW ye talalerata e ile ya ema pele ga ngwako wa phapoši tše nne wa lekeišene. Reneilwe o ile a bula lebati, a ikemišeditše go tšwela ka ntle, eupša mootledi a mo goga ka letsogo. O ile a retologela go yena gomme a mo gerula ka mahlo ao a bego a kganya ka meokgo. Go be go le molaleng gore dilo di be di se bose ka moo sefatanageng.

“Ke o fa fela metsotso ye masometharo. O a nkwa?” Moleko o ile a realo, sefahlego sa gagwe se šošobane.

Reneilwe o ile a dumela ka hlogo a ikhomoletše gomme a theoga moo sefatanageng.

“Ke tla go emela mola plaza. Lefelong la rena. O kgonthišiše gore o tla le lingerie yela ye mpsha. Re ile go fetša weekend mmogo, bjale ka mehleng,” o ile a mo laela, a dumiša sefatanaga.

Reneilwe o ile a kgapha meokgo mahlong a gagwe ka bokantle bja seatla sa gagwe mola a kitela sephuthelwana sa polasetiki ka gare ga mokotlana wa gagwe wa sekolo, gomme a bula keiti. Ga se a ba a lebelela sefatanaga sela ge se thakgoga gomme se ema pele ga keiti go feta fela mengwako ye mebedi go tloga ka gabo.

O rile ge a se no bula lebati la khitšhi, Reneilwe a lemoga gore go na le moeng ka ngwakong. O ile a tseba lentšu la mosadi yoo le semetseng … gomme a ikwa eke gona le motšhitšhi wa dinose ka mpeng ya gagwe.

E be e le Sister Moleko, mosadi wa monna yoo a sa tšwago go mo lahla moo seferong. Sister Moleko e be e le mogwera wa mmagwe yo mogolo. O be a ba thuša ka go hlokomela tatagwe, Radillo. O be a  bethilwe ke seterouku mengwageng ye mebedi ya go feta, dikgwedi di se kae morago ga gore mosadi wa gagwe a ba tlogele ka lehu la tšhoganetšo. Mmagwe o be a ile a no wela fase, gomme a hlokofala pele empolentshe e ka goroga. Ba rile o be a na le madiamagolo.

“Thobela Mmane MaMoleko,” Reneilwe o ile a dumediša, a dula godimo ga sofa thoko ga tatagwe.

O be a mmitša ‘Mmane’ ka ge mosadi yoo e be e le yo mo nnyane kudu  mengwageng yeo mmagwe a bego a le go yona, bjale ka monna wa gagwe Moleko. O be a na le mengwaga e masometharo mola mosadi wa gagwe a na le ye masomepedišupa. Ba be ba na le ngwaga ye meraro ba nyalane, le ge e le gore Moleko o be a thomile go ratana le yena e sa na le ngwaga ye lesomešupa, mengwaga yeo Reneilwe a bego a le go yona gabjale.

“Ao! Dumela Reneilwe, ngwanaka. Na sekolo se šetše se tšwile?” MaMoleko, mosadi yo mo telele, wa lebala le leswana ka mmejana wo mosesane, a mo fetola. O be a le gare a balela dipilisi ka gare ga soswara, ebile le galase ya meetse e dutše ka pele ga gagwe godimo ga tafolana ya disofa.

“Ee, Mma,” Reneilwe o ile a realo, gomme a homola gannyane, mahlo a gagwe a lebeletše sekhafothini seo se bego se tletše dihlare godimo ga tafolana. “Thobela Papa,” o ile a dumediša tatagwe ka myemyelo. Tatagwe o ile a dumela ka hlogo a rokagantše sefahlego, mmejana wa gagwe wa go fokola o ithekgile ka sofa.

O ile a retologela go MaMoleko gomme a re, “ke leboga ge o phela o le mo go re thuša ka dihlare tša gagwe, Mma. Modimo a go šegofatše.” Tatagwe o ile a dumela ka hlogo, a ngunanguna ka tumelo.

“Tlogela kua, ngwana towe. O a tseba gore ga ke na bothata. Gabotsebotse ke ikwa eke ke maikarabelo a ka. Gape bommago e be e le mogwera wa potego. Bonnyane bjo nka le direlago bjona ke bjona bjo, ngwanaka.” O ile a homola, a efa Radillo dipilisi.

“Wena le lapa la gago le tloga le re loketše, Mma. Eke Modimo a ka le šegofatša,” o ile a realo ka dihlong, a lebeletše letsogo la tatagwe la nngele ge a le gare a elwa le go tsentšha dipilisi ka molomong.  O ile a mo thuša go thekga letsogo leo. “Iketle tate.” O ile a tšea galase ya meetse go tšwa diatleng tša Sister Moleko gomme a e iša dipounameng tša tatagwe.

“Hai! Morena Radillo. Ke nagana gore nna wa ka mošomo ke o phethile bjalo. Ke swanetše go ya mošomong. Ke thomile go bereka bošego go tloga maabane,” Sister Moleko o ile a thakgoga. “Reneilwe ngwanaka, ke kgopela gore o bušetše dihlare tše ka mola gare ga room divider,” o ile a homola gannyane a šinyaletše. “Ao! Na Molatelo yena o kae? Na o be a sa swanela goba a boile sekolong le yena gabjale?”

“Argh! O a mo tseba yoo, Mma. O swanetše goba a le mola Spaza shop a raloka snooker le chomi tša gagwe. Morena Moleko o mo file R10 mantšiboa, mola a le mo go tlo bona tate.”

“Hai! Bašemane bona, e tla no dula e le bašemane ka nnete. Anyway, e re nna ke itshepelele. Mr Radillo, ke tla go bona ka moso. Ke kgopela gore o se be wa fa morwedi yo wa gago mathata ge a go fa dihlare bošego. Gape ke a o tseba wena,” o ile a dira metlae, a myemyela.

“Le ga tee. Ke a leboga, Sister,” Radillo o ile a konkoretša, a elwa le go bitša a mangwe a mantšu. “O re lebogele gape go monna wa gago ka dijo tšeo a re reketšego tšona maabane. Ga ke tsebe gore ge nkabe e se lena re be re tla ba kae. Ka nnete,” a tšwelapele ka go nanya.

“Oh! Go lokile! Ke tla mmotša. Joo …” o ile a homola gannyane, a lebeletše sešupanako sa gagwe. “O rile o ya Joburg lehono gomme o ile go boya ka Lamorena. Na o go boditše?” o ile a thakgoga.

“Ee. O rile ke mabapi le mošomo, akere?”

Mogala wa Reneilwe o ile wa ba tsena ka bogare. A kwa pelo ya gagwe e fofa ge a bona gore ke mang. Ka pejana, a emelela gomme a leba ka ntle, a hwinahwina. “Hello.”

Babes … ke kwele ba re mosadi wa ka o tlile ka moo gageno. Na o sa le moo?” Moleko o ile a botšiša.

“Ee. Eupša o nyako sepela gabjale,” Reneilwe o ile a realo, a iphihlile ka morago ga ntlwana ya botshwelamare ya ka ntle yeo e bego e dutše khoneng ya jarata yeo ye nnyane.

OK babes. Dira gore o fihle lefelong la rena ka pela ka mo o ka kgonago. Gape ke fela pelo ya go bona mmejana woo wa gago wo mo botsana-” O ile a homola, a theeleditše lentšu la mosadi wa gagwe ge a bitša Reneilwe ka morago. “OK! Gabotse moratiwa. Ke tla go bona ka morago.”

Reneilwe o ile a kgaola mogala woo, e le ge a araba pitšo ya Sister Moleko. “Ke a tla, Mma!” o ile a realo ge a ekwa mešito ya motho e batamela. E be e le Molatelo, kgaetšedi ya gagwe.

“Thobela,” Molatelo o ile a dumediša, a batamela mola mokotlana wa gagwe wa dipuku o lekeletše legetleng a gagwe ebile a nyefišitše le borokgo.

“Ao Molatelo. Go bjang, mfana?”

“Ke right, Mmane,” o ile a fetola, a iphetela mola Reneilwe yena a fihla.

Reneilwe o ile a kwa pelo ya gagwe e rotha madi ka gare ga gagwe ge a bona myemyelo yeo e bego e le sefahlegong sa MaMoleko. Myemyelo yeo e bego e tletše ka lerato le kgathalo. Na mosadi yoo o be a tla reng ge a ka tseba ka seo se bego se direga magareng ga gagwe le Seresanta Moleko? O be a tla hlwa a sa thuša tatagwe gape? Meokgo e ile ya ruthetša mahlo a gagwe ge a le gare a felegetša Sister Moleko seferong.

“Mmane Mamoleko, lehono ke ya study camp mola Krugersdorp. Barutwana ka moka ba Marematlou ba swanetše go ya. Ba re re ile go boya ka Lamorena. Ke kgopela gore o tšheke ge e le gore Molatelo o hlokometše tate gabotse.”

“Oh! Study camp gape,”o ile a homola gannyane, a šikinya hlogo ebile a tsopotše le melomo ya gagwe ya go pentwa ka bohubedu. “Yo mongwe le yo mongwe o tloga a le busy mo lefaseng le, mos. Moleko le yena o ya hoteleng tsoko mola Joburg gape. O re ba ile go ba le strategic planning gona moo weekend ka moka. Ka mo batho ba re maphodisa ga a šome selo. Nkabe ba tseba gore ga ba ipshine le ka matšatši a bona a go ikhutša. Ge e se di workshop ke di strategic planning, goba kopano le Superintendent. Hai! Go lekane bjale. Gape ke dumile go no fetša nakonyana le monna wa ka re le babedi fela, wa tseba,” o ile a realo, gomme a lebelela Reneilwe ka myemyelo ya go tlala manyami.

Reneilwe o ile a myemyela ka dihlong, mahlo a gagwe a tsemile fase. O be a sa ikwe a lokologile ge a le thoko ga mosadi yoo, gomme seo a sa tšwago go se bolela le sona se ile sa napa sa bjala letšhogo pelong ya gagwe. Ebe eke Sister Moleko o leka go mo lemoša gore o gononwa gore monna wa gagwe o mo ja direthe …

Okay! Gabotse Mma. Ke tla go bona ge ke boa kampeng ka Sontaga.” O be a ithekgile ka keiti, a lebeletše MaMoleko ge a le gare a theoga moo sekontiring a lebile ngwakong wa gagwe. Ya ba o lahlela mahlo sellathekeng sa gagwe seo se dirilego modungwana. Myemyelo e ile ya aparela sefahlego sa gagwe ge a bona molaetša: o be o e tšwa go Shawn, a mmotša gore o šetše a mo gopotše.

“A gona bothata, ngwanaka. Mahlatse le mahlogonolo dithutong tša gago. O se ke wa lebala gore ke nyaka dinaletšana tše tharo mafelelong a ngwaga,” MaMoleko o ile a goeletša.

Okay Mmane. Nka se ke.” O ile a boela ka ngwakong, moo a fihlilego a kgopela moratho wa gagwe gore a thekge taba tša gagwe pele a ka botša tatagwe.

“O a tseba gore o tla swanelwa ke go lefa, akere?” Molatelo o ile a realo, a ituletše ntlheng ya mpete, a šetše ka mmele. O be a le gare a tlemolla marala a gagwe a dieta.

“Ee. Ke tla go fa R100 ge ke boa. Eupša o dire bonnete bja gore o hlokomela Papa. O mo fe dijo pele a ka nwa dihlare. Ebile o se be wa leka go mo rekela bjala gape! Go sa kgathalege gore o go rapela ga kaakang. Ke a kgolwa o ithutile se sengwe nakong yela a ilego a hlakahlakana le go feta ka ge o be o mo file dipiri,” o ile a mmotša tsebe go kwa ka sefahlego sa bogale.

“R150!”

“Eng?”

“Gabjale ke nyaka R150. Esego bjale …”

“Go lokile. Argh! You like money too much. O a e rata tšhelete ngwana towe,” o ile a realo, a selekegile, gomme moratho wa gagwe a hlahlamoga sesego.

O ile a tšwa ka mo phapošing e le ge mogala wa gagwe o tsentšha molaetša wo moswa wa WhatsApp, o mo tšikiditla:

Ke kgolwa gore kgolomodumo yela ga se ya go metša, my CinderellaJ J J

 ***

Re botše seo o se naganago: Na ekaba kgopolo ya ‘makhwapheng’ go banna e tlwaelegile, goba esale bogobogwa? Basadi ba swanetše go amogela seemo se? Wena o ka se amogela?