Shawn o ile a kwa mmele wa gagwe wo motelele o roromela. O be a bogetše Reneilwe, a ahlamišitše le melomo, mola kgarebe yeo e le gare e goga maoto e ba lebile, mokotlana wa yona wa sekolo o lekeletše magetleng a gagwe.

O be a tseba gore o swanetše go ira seo – esego bjale bagwera ba gagwe ba be ba ka se emiše ka go mo kwera, bjale ka ge ba dirile beke ka moka. O be a swanetše go botša Reneilwe ka moo a ikwago ka yena. Go be go ka se be le boitšhireletšo goba hlalošo yeo a bego a tla efa lekgetlong le, o ile a lemoga, mola lekgarebe leo le le gare le ba feta ka setu. Ba be ba dutše mmogo godimo ga leswika le legolo ka thoko ga tsela gomme a ba hlokomologile.

Eupša, bjale ka mehleng ge a mmona, mmele wa gagwe o ile wa goma. Bagwera ba gagwe ba bararo ba ile ba ngunanguna mantšu a hlohleletšo, ba mo gopotša ka mo e lego kgale ka gona ba emetše gore a fihle.

“Mo tsene, skeem. Go get her,” Bohlale o ile a realo ka myemyelo ya mahlajana.

“Eupša o hlokomele …Ga ke mo tshepe nna motho yo. Aka go kgaola hlogo ye ka meno. Ga a na smile ngwanenyana yo. O lebetše gore ba mmitša mang mola sekolong? “The Ice Beauty!” Paulose o ile a realo, a mo tšhošetsa. “O ka ba wa re o fihlile matimone ka mo gare ga gagwe.”

“Aowa jo. Nke o no mo fa kerakgenyana. Ga one fela, monna,” Bohlale o ile a ipelaetša go Paulose, mola mahlo a gagwe a lebeletše sekarete seo se bego se tuka mokgahlong wa menwana ya gagwe. “Gobaneng o phela o itshwere bjalo?”

Le ge Shawn a be a sa fole, o ile a tšea sekarete seo gomme a se goga ga bedi, go fišeletša letšhogo leo le bego le le ka gare ga gagwe. Paulose o be a rereša, seo o be a tloga a se tseba gabotse, Reneilwe o be a makatša, eupša yena a sa kgone go emiša ka go mo nagana. Ešita le ditorong tša gagwe, kgarebe yeo e be e mo etela bjale ka lengeloi, leo le tšhetšhethago bonna bja gagwe go fihla bo etšwa meokgo ya meloro.

E be e le kgarebe ye botsana go feta makgarebe ka moka ao a kilego a a bona.

Shawn le bagwera ba gagwe ba bararo ba be ba ile ba tšwa sekolong ka lebelo morago ga gore tšhipi e lle gomme ba tšekatšeka diterateng tše nne go tšwa moo. Yeo ebile kgopolo ya Bohlale, morago ga gore Shawn a širele ka lebjang ka ge a ile a no iphetoša mokoko o netšwe ke pula. O be a paletšwe ke go šomiša menyetla ye mebotsebotse yeo a e hweditšego ya go lahlela la bošiwana go Reneilwe.

“Eish, majita … Nka se kgone. Gape mahlo ke a ma baie felo fa. Re tla reng ge motho yo mongwe a ka itira lekuntwane gomme a chaela Ntsogwana? Goba mohlomongwe yena mong a itšatšela ka a gagwe mahlo? Hai … Aowa!” O be a ile a bolela bjale maabane, a šikinya hlogo. “Nna ke a mo tšhaba mothaka yola. Le lena le a tseba gore o strict bjang morutiši yola. A ka ba a botša batho ka moka mola assembly,” O be a ile a tšwelapele mola ba le gare ba etšwa ka jarata ya sekolo.

“Eng!” Paulose o be a ile a realo, a hwa ka disego. “Tšeo e noba ditšie badimo, monna. Le wena o a se tseba seo. O noba o lomilwe ke mmutla, bro. E no amogela. Chicken!” o ile a mo gegeya, a legare a phepheula matsogo a gagwe bjalo ka kgogo. Bagwera ba bona ba babedi ba ile ba hlahlamoga ka sesego.

“OK! Gosasa re tla sepela ka pela gomme ra mo emela diterateng di se kae go tšwa s´kila. Ke a tseba gore ke seterata sefe seo a se šomišago ka mehla.” Ao e be e le mantšu a Bohlale ao le bašemane ba bangwe ba dumelelanego le ona.

“Ya … okay … Go lokile. Ke tla le bontšha gore ga ke lekwala. Lena emang net so, le tla bona,” Shawn o be a ile a realo a korologile.

Sebaka seo se be se fihlile gabjale. Bohlale o be a nepile. Go be go le barutwana ba mmalwa fela moo seterateng seo ebile le Reneilwe a le noši. Go be go se na lebaka leo Shawn a ka le fago bagwera ba gagwe ga bjale. Ka kgopolo yeo, a napa a nanyetša ka morago ga Reneilwe, maoto a gagwe a roromela ge a le gare a mmatamela. O be a kgona go kwa mahlo a bagwera ba gagwe a mo tsemile ge a fihla go kgarebe yeo. Bagwera ba gagwe ba be ba ba šetše morago ka go nanya gabjale, ba hwinahwina ebile ba goeletša boka balotšana.

“Hi Reneilwe,” o ile a ngunanguna, gomme a tloša sehuba mogolong. O be a ikwa eke tšhipi ya go fiša e kgakgetšwe moo. “Howzit?”

Mala a gagwe a ile a bofagana ge Reneilwe a mo topa ka ntakana ya mahlo a gagwe a magolo a go benya. Kgarebe yeo ga se e bolele selo, eupša ya no itumelela ka hlogo e šošobantše sefahlego gannyane. O ile a kwa le semetseng gore o khupile tšeo a ka se di metšego. Kgarebjana yeo e be e le bjale ka lengeloi leo le welego magodimong! O be a botsefala le go feta nako e nngwe le e nngwe ge a mmona.

Shawn o ile a se tsebe gore a tšwelepele ka goreng. O ikwele eke a ka mo tlogela gomme a emela bagwera ba gagwe, eupša a fetola mogopolo wa gagwe ge a ba utswa ka leihlo gomme a bona ka moka ga bona ba mo emišetša menwana ye megolo.

O ile a gohlola gape gomme a re, “So … go be go le bjang s’kila lehono?”

“Fine,” Reneilwe o ile a ngunanguna, mahlo a gagwe a lebeletše fase ka sefahlego sa go šošobana. O be a duma ge mošemane yoo a ka no mo tlogela a le noši.

“Okay! That’s good… eish … theeletša mo Rene …” O ile a homola gannyane, a metša lefeela gape. “Gona le tabanyana yeo ke ratago go o botša yona. Taba yeo e lego kgale e nja gabjale,” a realo, pelo ya gagwe e betha ka lebelo.

“Mmm! Ke eng?” O ile a mo utswa ka leihlo. Mahlo a gagwe a manyenyane le sefahlego sa gagwe se se swana di ile tša tanya šedi ya lekgarebe leo. Ebe e le sefahlego seo e kego sa ngwana, ebile le myemyelo ya gagwe ya go tlala dihlong e theletša pelo. Reneilwe o ile a ikhwetša a tantšwe ke lesogana leo le semetseng. “Kana … leina la gago o mang?” o ile a realo gomme a ema a mo lebeletše ka phatla ya go rokagana.

“Shawn! Leina la ka ke Shawn!” O fetotše ka pejana gomme a ntšha myemyelo yela ya gagwe ya botsana gape, kgetlong le ka boitshepo.

“Okay! O ka bolela.”

Shawn o ile a kwa morwalo woo o bego o mo imela kgareng o imologa. “Eish! Ga ke tsebe gore ke go botše bjang se, wa tseba. Ntshepiše gore o ka se befelwe.”

“Nka se kgone go dira seo. Gape ga ke tsebe seo o tlilego go se bolela, mos?” A mo gegea gabonolo. “Ge e le gore-”

“Na o kaba lekgarebe la ka?” Shawn o ile a phatloga, a sa tsebe mo a hweditšego sebete.

Nakonyana e se kae go ile gwa rena setu, Reneilwe a tlabilwe ke matšu ao a bego a sa a letela.

“Ke a kgopela, hle. Ntire monna wa lethabo gomme o be kgarebe ya ka.”

“‘Monna’ wa lethabo? Hai nna ga ke tsebe go bona monna wa mohuta wo. Ke ra gore … Ga ke bone le tetšwana e tee moo sefahlegong sa gago eupša o ipitša monna. Wow!” Reneilwe o ile a realo ka myemyelo ya go benya, ya kgang yeo e ilego ya tšikiditla pelo ya Shawn.

“Come on … o a nkwešiša, mos,” myemyelo ya Reneilwe e be e kgohleditše boitshepo bja Shawn.

“Aowa! Ga ke kwešiši,” o ile a ikgakantšha, gomme a ipopona.

Shawn o ile a homola sebakanyana, pelo ya gagwe e eme, gomme a tšwelapele.

“O nyaka nna ke be kgarebe ya gago? Kgarebe yela ke phelago ke go bona o na le yona e kae? O ile go mo tlogela ka lebaka la ka, goba o ile go ratana le rena mmogo? Argh! Tlogela go ntshenyetša nako. Monnanyana wa selo mang!” o ile a realo ka bogale.

Shawn o ile a metša lefeela gomme a botšiša ka lentšu la go thuthumela, “Kgarebe efe?”

“O a mo tseba. Cheri ya gago.”

“Ga ke na lekgarebe nna. Kgarebe ya ka ke wena fela. Serious.”

“Ya, ya, … Seo ke se lena bašemane le se bolelago ka mehla. Eupša ka morago ga matšatši a se ma kae, motho o tla be a šetše a utulla gore ga a tee. Go na le makgarebe a mangwe a mabedi goba go feta. Mpssst! Ga ke setlaela nna.”

“Ga ke bolele maaka. O ka no botšiša bagwera ba ka.” O ile a homola gannyane, a gadima morago. “Ke kgale ke nyaka go o botša se dibekebeke. O a tseba gore ga go bonolo go-”

“Theeletša,” o ile a mo kgaotša ka bonako, a bonala a tšhogile. Mahlo a gagwe a be a ikepetše sefatanageng mola pejana mmileng, seo se bego se lebile go bona boka sesasedi. “Tšea nomoro ya ka. Re tla bolela ka mogala.”

Shawn o be a tlabegile eupša a tšea sephetho sa gore a se botšiše dipotšišo ge a bona go se dudišege ka mahlong a kgarebe yeo. O ile a lokela dinomoro tšeo Reneilwe a di biditšego ka lebelo. Pele a ka bolela se sengwe, ya ba BMW ye talalerata e ema ka pele ga bona e letša mathaere. Lebati la mootledi le ile la pharamoga gomme monna yo a bego a apere yunifomo ya maphodisa a fologa, a thunya muši ka dinko.

“Go direga eng mo?!” Monna yoo o ile a šobatha Reneilwe ka letsogo gomme Reneilwe a tswinya ka bohloko. “O gare o kgahlišana le bašemane mo mola nna ke go letile mola gae! O šetše o le mosadi bjale? Ke tšona tše ba le rutago mola sekolong? Go gerema le bašemane bjale ka bomakgoša? Mxm!” monna yoo o ile a hlaba lešata, a bile a mo šupašupa ka monwana sefahlegong.

Shawn o ile a kwa mmele wa gagwe ka moka o thuthumela, a ipotšiša ge eba monna yoo ke mogolo wa Reneilwe … goba malome’agwe. O be a bonala e le yo mo nnyane kudu go ka ba tatagwe.

“And wena! O leka go ntšha mosetsana yo wa batho tseleng?” o ile a kgadimola Shawn, ka mahlo a go tuka. “Ge nka go bona gape mo kgauswi ga gagwe, ke tla go kgaola kgokgokgo. Ke a go botša, mošemane! O a nkwa?”

Shawn o be a nyaka go bolela se sengwe eupša a ikgogela morago ge monna yoo a bea seatla sa gagwe godimo ga sethunya seo se bego se lekeletše lepanteng la gagwe.

“Ke tla go hlahlamola bjokwana bjo, mfana. O se ke wa nteka! You little rat! Legotlo towe!”

O ile a retologela go Reneilwe gape. “Wena, tsena ka mo koloing! Ke ile go botša tatago ka se. Etla,” o ile a mo kgokgoišetša ka gare gomme a kgotla senotlelo a sepela.

Shawn le bagwera ba gagwe ba ile ba ema moo ba bogetše ka melomo ya go ahlama mola sefatanaga se thetheoga ka lebelo seterateng.

“O grant, boy? O right, mara?” Bohlale o be a lebeletše Shawn, ka mahlo a gagwe a manyenyane ao a bego a le ka morago ga dipeketsana.

Shawn o ile a dumela ka hlogo ka setu, a sa tšhogile. A napa a gapeletša myemyelo ya go fokola gomme a re, “Atleast ke hweditše nomoro ya gagwe. Ke popile, gents! I won,” o ile a binabina, a tšokatšokiša sellathekeng sa gagwe. Bagwera ba gagwe ba ile ba hwa ka disego, ba mo lebogiša le go mo tumiša ka go mo gokara.

“Hai … nna ke nagana gore go nkga legotlo ka cheri yela. Ke a le chaela, majita. Se sengwe sona se a direga. I smell a rat,” Paulose o ile a ngunanguna, eupša bašemane ba se mo tšeele hlogong. Ba ile ba mo latofatša ka gore o kgolwa dinonwane e le ge ba fetola tsela gomme ba leba ka thoko ga karolo ya bona ya lekheišene.

***

Re botše seo o se naganago: E kaba wena, bjale ka Shawn, o hwetša go le boima go tsebiša motho gore o na le kgahlego ka tša marato? Re botše ka moo o kilego wa itsebiša go motho yoo a kabago lekgarebe goba lesogana la gago.