Jonasi a swika hayani, a sheledza zwimedzwa sa zwe khotsi awe vha laela. A pfa ṱhoho i tshi dzunguluwa, hu masiandaitwa a u dahesa zwe a daha. Izwo zwa mu ruma u eḓela.
U tshe o tou fa nga khofhe musi mme awe vha tshi vhuya nga madekwana u bva ngei tshiṱokofelani.Vha posa kubege kwavho kamarani yavho, vha livha shawarani u ṱamba. Hezwi vha tshi vho dovha hafhu u ḓa nḓuni ya u awela vho ambara na gaweni ḽavho ḽa u eḓela, vho fara DVD tshanḓani tshavho.
“Ndi takalela u ranga u ḓi kanzwa nga u vhona DVD iyi nga murahu ha musi ndi tshi nga eḓela,” vha ralo kha mukalaha vhavho, vhane a si kale vho dzhena. “Ndi tshifhiwa tshe nda ṋewa nga khonani yanga. Ndi ya mitshino ya sialala u bva kha mashango a tshipembe ha Afrika.”
“Zwi pfala zwi zwavhuḓi,” vha fhindula. “Ri ḓo vhona roṱhe.”
Hezwi vha tshi swika hune ha dzula zwishumiswa zwa vhumvumvusi, vha vhona DVD i siho.
Mukalaha na mufumakadzi vha sokou dzhondolola kha ḽivhaka ḽo salaho afho hune ha dzula DVD. Mufumakadzi vha hwenyela muṋangoni wa kamara ya Jonasi, vha thomisa u khokhonya.
“Jonasi. DVD yanga i ngafhi wee?” Fhedzi a hu na phindulo. “Vulani munango zwino!” Vha vho tou ambela nṱha vhukuma.
Ngamurahu ha tshifhinga tshi sa fhedzi mbilu, a vula vothi. U khou soṱa maṱo awe matswuku, sa muthu a no khou kundelwa u tou vhona zwavhuḓi. A ṱharamudza zwanḓa zwawe, a halamula.
“Vha ri mini, mmawe,” u amba nga ipfi ḽi sa tou pfalaho zwavhuḓi. “Zwi tou vha zwa ndeme uri vha tou nṱavhela mukosi ngoho? Ndo vha ndo farwa nga khofhe tshoṱhe.”
“Ndi khou ṱoḓa DVD player yanga. I ngafhi? I ḓiseni.”
“I hune ya dzula hone,” a ralo, ipfi ḽawe ḽi tshe ḽo ḓala khofhe. “Kani a iho? Vho vhuya vha seadza-vho?”
“Ndo humbula uri liṅwe ḓuvha na vha no i dzhia ni tshi itela u vhona dzifiḽimu kamarani yaṋu.”
“Hai, mmawe. Vha a zwi ḓivha na vhone uri a thi athu u vhuya nda ita zwi no nga izwo. Naho zwo ralo, a thi na thelevishini kamarani yanga.”
Jonasi a vha sala murahu u vhuya u swika nḓuni ya vhuawelo. Vha sumba he DVD player ya vha yo tea yo dzula hone.
“Ni khou zwi vhona.”
“A thi koni u tou pfesesa zwavhuḓi … yo vha i henefho …”
“Ṋamusi no vhuya na bva nga gethe?”
“Ee …”
“No sia no vala na u khinela munango? No ita na u lingedza u tou vula u vhona-vho arali wo khielea?”
“Mma, ndo khinela. Misi yoṱhe ndi ḓi ita ngauraḽa.”
“Ṱutshelani u mmbudza uri ni dzulela u ita zwifhio,” vha pfala vho sinyuwa. “A ni na vhuṱhogomeli. Vhonani zwino – mafobvu vho tswa DVD player yanga!”
Mukalaha vha takuwa u bva sofani, vha dzungudza ṱhoho. “Hezwi zwo no tou kalula.” Vha rembulutshela mutukana wavho.
“Mufunwa! Ndi khou tou humbela, mufunwa,” ndi mme a Jonasi vha tshi phuphuthela.
“Hu si kale ndi khou ḓo pandela fobvu heḽi” – vha tshi sumba Jonasi nga musumbavhaloi – “ muḓini wanga! Ha na mikhwa. U luma tshanḓa tshi no mu ṋusa zwiḽiwa.”
Ri vhudzeni: Ni vhona hu tshi nga itea zwifhio no sedza khuḓano muṱani uyu?