Ndi nga matsheloni a Mugivhela. Jonasi u khou ḓipfela vhuludu o ḓi tou ganama mbeteni wawe. Mme awe vho bva matsheloni vha tshi ya muṱanganano wa tshiṱokofele tsha phurovintsi ngei ha Malamulele. Khotsi na vhone vho bva, vho isa deḽivari ya miri ya dzibonisayi nesarini ngei Musina. Ho tou duu ngomu nḓuni. O fulufhedzisa khotsi awe uri u ḓo sheledza zwimedzwa fhedzi tshifhinga tsho no ṱuwesa – ḓuvha ḽa masiari-kati ḽi ḓo gotsha maṱari o nukalaho.

Luṱingokhwalwa lwawe lwa lila. Ndi Bethuel.

“Ndi na Rudzani na Pretty hangeno,” u ralo. “Ri vhengeleni ha Shoeb. Pretty o ḓa na R35. Hu khou ṱoḓea tshelede i no swika R150 uri ri dahe tshiṱafu tshone-tshone.”

“Mara a thi na tshelede. Na puḽane ya uri ndi nga i wanisa hani a thi na.”

“Itani puḽane,” Bethu a kombetshedza. “Ndi kale ni sa khou vhuya na ṱanganyisa tshithu u bva tsha ḽeneḽiya ḓuvha ḽe ra daha nyaope lwa u tou thoma.”

“Ni khou mbangela u remiwa nga ṱhoho,” a ralo Jonasi, a tshi gigida ṱhoho yawe nga hangeno ngomu ha tshanḓa.

“Ri ḓo vha ro ni lindela. Murengisi vha ḓo swika hangeno hu saathu fhela awara. Ndi Munna Muhulu, ni a zwi ḓivha. Ndo buka hafu ḽa bogisi. Ni zwi elelwe uri a vha ṱanganedzi tshikolodo – kana ndo tou hangwa a tho ngo ni ḓivhadza izwo?”

“No mmbudza.”

“Ho luga. Ri ḓo ni vhona hu si kale.” A ḓiropa luṱingo.

Jonasi a ambara vhuruku hawe ha bokhathi na tshikhipha. A edzisa u vula munango wa u dzhena ngomu nḓuni ya vhabebi vhawe; wo khinelwa. A vha tsha mu fhulufhela, u amba nga mbilu. Lufherani hune khotsi awe vha shumela hone ho khinelwa-vho.

A ḓi tika na luvhondo nḓuni ya u awela, a lialiisa maṱo ngeno na ngei. A pfa o femuluwa musi maṱo awe a tshi vhona DVD player. Nga mithethe i si mingana o no i kokodza kale, a i sokotedza ngomu begeni ya puḽasiṱiki.

Hezwi Rudzani, Pretty na Bethuel vha tshi vhona Jonasi a tshi bvelela murahu ha vhengele, vha ḓala dakalo. Bethuel a dzhavhula puḽasiṱiki u bva kha Jonasi, a ṱodzimela ngomu. “Inwi ni tou vha mutshidzi! Hetshi tshithu tshi a vhidza. Munna Muhulu vha ḓo tshi takalela. Ri nga wana hafu mbili dza zwibogisi.”

“Ndo vha ndi tshi humbula u nga ri fanela u rengisa heyi nthu u thoma, ra kona-ha u renga tshiṱafu.”

“A zwi itiwi nga nḓila heyo. Munna Muhulu u a kona u ṱanganedza thundu ya ndeme a ri ṋea nyaope. Ri tou fhana, ni khou kona u zwipfesesa musi?”

“Zwo dzudzanyea arali ni tshi khou ralo,” hu tenda Jonasi.

“Ntendeleni ndi mbo ḓi ya u ṱangana na Munna Muhulu,” ndi Bethuel.

“Ndi khou ṱuwa na inwi,” Pretty a amba.

“U ṱangana na nṋe ndi ndoṱhe,” Bethuel a kaidza. “Ndi khou ya hafhaḽani nṱha tsini na zwiṱaka nnḓa ha kiḽiniki.”

Tshifhingani tshenetsho musi Bethuel a tshe o ṱuwa, Jonasi, Rudzani and Pretty vha ḓitika kha luvhondo, vha hasaledza.

“Rudzani, hu na zwe mme aṋu vha ita kana u amba musi vha tshi limuwa uri khompwutwakhwalwa ya khaladzi aṋu yo ngalangala?” hu vhudzisa Jonasi.

A lumaluma meme ya mulomo wawe ya nṱha ngamurahu ha musi a tshi nga fhindula: “Zwi khagala uri vho vha vha songo takala. Khaladzi anga u khou kundelwa u tou guda zwavhuḓi a si na khompwuthakhwalwa yawe. A thi koni u tou pfesesa, vhanna. Ṱhaṅwe ri …” ipfi ḽawe a ḽi tsha tou pfala zwavhuḓi.

“Ayo ndi mafhungo a si avhuḓi,” Jonasi u tenda na nga ṱhoho. “Naho zwo ralo, a hu na we vha humbulela ene?”

“Khaladzi anga o ṱavhekanya mikosi a ntsemekanya. O ri ndo i tswa ndi tshi itela u fusha sakha ḽa nyaope.” A setshelela. A dzungudza ṱhoho. “Ndo mbo ḓi tou lila na zwenezwo nda vhudza mme anga uri vha vhudze ṅwana wavho a litshe u mpomoka vhufobvu. Magumoni a zwenezwo, mme anga vha ima na nṋe vha ri a thi na mulandu.”

“Dzimbudziso ndi dza mini?” Hu vhudzisa Pretty.

“Ndi itela u wana nḓivho na vhuṱali uri ndi ḓi tsireledze kha tsinyuwo ya khotsi anga,” Jonasi a fhindula. “Musi vha tshi wana uri DVD player a i tsheho vhudzuloni hayo …”

“Ni vha vhudze uri a ni ḓivhi tshithu nga hayo,” Rudzani a bula.

“Vha ḓo tenda maambiwa anga?”

“Zwi tou vhofha,” Pretty u ralo. “Zwiḽani ro rengisa makhurowevi wa mme anga, mme anga vho tenda uri wo tswiwa nga mafobvu. Vho vusa tshililo, nṋe nda vha fhembeledza nga maipfi avho a ḓifhelelaho a uri Mudzimu vha ḓo vha ṋea muṅwe makhurowevi.”

Bethuel a vhuya.

“Zwo ita wee!” U a ḓivhadza. “O ri fha hafu mbili. U ri a nga takalela ri tshi nga mu wanela smart phone. U ḓo badela R350, arali i tshee kha tshiimo tshavhuḓi. Heyo i tou vha khaedu yashu roṱhe.”

Vhoṱhe vha ima kha ḽeneḽo ḽithihi.

“Zwino-ha kha ri hangwe nga zwiṅwe zwoṱhe ri ḓitakadze,” ndi Jonasi a tshi nwenwela. “Hetshi ndi tshiṱafu tshone-tshone. Tshi nṋea nyonyoloso ya khwinesa maluvhini.”

Ri vhudzeni: Ndima iyi i sumbedzisa nga nḓila ine dzema ḽa u shumisa zwidzidzivhadzi ḽa shandula vhathu u vha phondi dza zwidzidzivhadzi na u vha mafobvu. Ndi vhufhio vhutshinyi vhune phondi dza zwidzidzivhadzi dza bveledza?