Ndi musi vho no ḓi pfelela musi mutukana musekene, mulapfu a tshi bvelela afha murahu ha vhengele. A vha vhona.

“Vhoinwi! Ni khou itani?” A tou vha dzwondolola o ḓi farelela khunduni nga zwanḓa. Musi hu si na a fhindulaho, a dovha a ri: “Ni khou itani?”

Jonasi a kokodza mbanzhe ngamurahu ha musi a tshi i pfukisela kha Rudzani. Na ene a daha-vho, a pfukisela kha Bethuel.

“Ni khou penga kana hani?” Bethuel u vhudzisa mutukana, ngeno e kati na u hoba.

Mutukana a dzungudza ṱhoho. “Ni khou ita zwo teaho naa, vhanna? Ni khou daha mbanzhe. Zwino ni vhudzisa arali nṋe ndo fhelela muhumbuloni …”

“Zwi ni kwama ngafhi arali riṋe ri tshi khou daha?” Hu vhudzisa Rudzani. “Ri nga daha na vhutoko ha kholomo arali ro tou zwi funa zwavhuḓi. Nga nnḓani ha izwo, matshilo ndi ashu.”

“Skyf da, Bethu!” Pretty u kuḓakuḓa Bethuel kha mbavu nga tshikuḓavhavha.

“Ndi zwone – ṱanganedzani,” u ralo a tshi khou mu nekedza. A takusela mbanzhe mulomoni wawe. A ḽi kokodza lwa tshifhinga tshi sa fheli.

“Pretty! Ni khou ita mini?” Mutukana u a kanuka, a tshi vho tou vhonala sa a nengwaho tshoṱhe. Huno Pretty ha ngo ḓi dina nga u mudzhiela nzhele. A kandela phanḓa na u omba gologodo.

“Ndo vha ndi sa zwi ḓivhi uri ni a daha.”

“Fhambanani na muya wanga, Goḽiada,” ndi ene a tshi fhindula.

Rudzani a lavhelesa Goliada. “U nnyi iwe lune wa ṱolou funza riṋe? Kufunzi kwa peni kwa fhano?” A ralo, a fhedza nga u tou sea.

“Ni sea na thunzi i pfukhaho, ngauri mbanzhe dzo dzhia vhukando maluvhini a vhoinwi.” Goḽiada a khokhonya ṱhoho yawe ene muṋe nga munwe. “Ḓisedzeni,” u sumba Bethuel, o no tou faho nga maseo. “Tshikhipha tsho no tou khakhaṱhela dzinthe ngeno na u zwi vhona a ni zwi vhoni.”

Bethuel a tou nana u sea. “Dziṋa ḽaṋu ndi Goliada?”

“Ni a nḓivha, ri dzhena roṱhe tshikolo, zwino ni mbudzisa dziṋa nga ḽifhio?”

“Vhoinwi vhathu vha shango – vhonani Goḽiada kurambo. Ha na ṋama!” Bethuel a sea. Pretty, Rudzani na Jonasi vha tou fa nga maseo. A tshi vhonala hangeno khofheni sa o kundwaho, Goḽiada a rembuluwa, ha vha maṱutshele. Bethuel a sala a tshi edzisa kutshimbilele kwa Goḽiada, ha vha hu hone o ṱhavhela khonani dzawe tshibudzana.

“Kutukana hokuḽani,” hu bula Pretty. “U humbula u nga a nga ri laya.”

Musi vho no fhedza u daha, Jonasi a kungulutshela hayani – tsho muriya.

U swika ngeno getheni, a vula tshimunemune tshawe tsha ayisiminithi; a laṱa kubambiri fhasi, a posa tshimunemune mulomoni. Thekisi ya muzika wo vulelwaho nṱha vhukuma ya pfuka henefho phanḓa hawe. A tshinisa ṱhoho yawe, nṱha na fhasi – a tshi nyanyuliwa nga muzika. A ṱanganedzwa hayani nga u nukhelela havhuḓi nahone ho ḓoweleaho ha maluvha na zwimedzwa ngadeni ya khotsi awe.

A wana munango wa nga phanḓa wo khinelwa. A kokota.

“Ndi nnyi?”

“Ndi mutukana wavho ane vha mu funesa.” Ṋamusi ndo ṱangana nazwo, ndi musi a tshi humbula hezwi mme vha kati na u mu vulela. Fhedzi a vha vhonali sa muthu o dinaleaho. Naho zwo ralo, khofheni ha khotsi awe hu tou fana na gole ḽa ḓumbumadzikule. Ndi kale vho dzula nḓuni ya vhuawelo vho mu lindela.

“I ḓa hafha!” Vha laela Jonasi. “Ndi feḓa-ḓe iḽo ḽi re kha iwe?”

“Ndi zwimunemune,” Jonasi a fhindula o dzika.

“Kani ṅwana ha ngo fanela u ḓiphina nga zwimunemune, mufunwa wanga,” mme awe vha a mu imelela.

Vho Mangilasi vha dzungudza ṱhoho. “Ni khou mu lema. Musi ri tshee vhana khotsi ashu a vho ngo vuwa vho ri dzima tsolo. Mukomana wanga Davida o kaidzeswa musi o tswa goloi yavho a dzhena ḽivhondo ḽa kereke ya Assemblies of God. Ndi ni vhudze uri munna wa vhane makhulu waṋu vha mukalaha vho mu ita mini?” Vha ralo vha ita na u dzwondolola Jonasi.

Jonasi a dzungudza ṱhoho.

“Vho mu kokodzela tshitumbani tsha nguluvhe, vha mu vhofha mashikani, vha mu sia henefho lwa ḓuvha ḽoṱhe a si na zwiḽiwa na maḓi a u nwa,” vha ṱalutshedza. “Nda sedza nguluvhe dzi tshi khou mu fembedzafembedza nga maningo adzo mahuluhulu. Hezwi vho tshuwa, vho neta, vha ita vha tshi lila sa nguluvhe!”

“Hezwo ndi tshiṱuhu, mukaha wanga,” hu amba Vhomme Mangilasi, vho tshuwa.

“Khaidzo heyo yo shuma. Davida ha ngo tsha dovha a tswa goloi a tshi itela u ḓi mvumvusa nga u i reila. Ndi vhona zwo tea ndi tshi kaidza Jonasi nga iyo nḓila. Kani a thi khotsi awe? Inwi ni humbula u nga a thi koni u nga vhuisa uyu ṅwana nḓilani kwayo?”

Mme a Jonasi vha sokou bvisa maṱo, hu hone vho ḓala u tshuwa vha tshi pfela ṅwana wavho muthihi fhedzi vhuṱungu.

Ri vhudzeni: Vhabebi vha fanela u tendelwa u kaidza vhana vhavho nga nḓila iṅwe na iṅwe zwi tshi ya nga afho hune vha funa? Ni nga ri mini nga u kaidza muthu nga u tou mu hunga tshitumbani tsha nguluvhe?