Makgolo a se makae a dimetara go leba tlase moo mmileng wa mabu Charles o fihla maaroganong a ditsela. Ge a ka kgelogela ka go la mmagoja o be a ka fihla gae ka metsotswana e 10, gomme ka metsotswana ye 15 a ka ba a šetše a itatswa menwana ya gagwe ye mesesane mola a ipshina ka nama ya kgomo yeo mosadi wa gagwe a tlogago a mo apeetše yona ka lerato.

“Hmmmm…” o ile a ipotšiša. Ka ge a tseba Buhle, nama yeo e be e apeilwe ka motswako wa lerato go leka go dira gore a dule a bolokegile ebile a hlaphogetšwe.

Ya ba o kwa ralethabo Joe Mafela a opela Shebeleza ka go la nngele la mmila mola tlasana. A tlelwa ke seswantšho sa bagwera ba gagwe bao ba emelelago mmogo ka dipiri tšeo di tonyago ka matsogong a bona ba šikinywa ke mmino, molora wo mošweu o rotha disekareteng tša bona tšeo di tšhumilwego di benya kgafetšakgafetša ebile le bafudi ba tšona ba binela molotšana wa sebapadi seo sa go tuma.

Charles o be a sa tsebe go gata ka šebining go tloga mohlang wola a etelago ngaka a hlaphogetšwe bekeng tšeo di ka bago tše seswai. Ka phapošing ya ngaka ya bohlahlelo o be a kgethile bophelo, mosadi wa gagwe le bana ba gagwe godimo ga go lepologa ga lebakanyana ka madila. Se ke seo bophelo e lego sona mafelelong a letšatši, molokoloko wa dikgetho. “Go itšhupa gore ge re gola dikgetho le tšona di napa di fela,” a ngunanguna ka tlase ga mohemo. “Ke nwe goba ke se nwe? Seo ke se ke ipotšišago sona gabjale!” a fetša ka go realo a sa lebiša motho.

“Malume!” lentšu la kgaotša dikgopolo tša gagwe. A lebelela godimo ka pejana.

“Malume!” seo gabjale se kwalago bjalo ka mantšu a mabedi a duma go tšwa lehlakoreng tsoko ka morago ga gagwe. A retologa gomme a bona Phumlani le Shorty, bašemanyana ba moagišane wa gagwe, ba lebile go yena. Ba tšhilafetše, bjale ka ge bašemane ba swanetše goba ka gona mathapama morago ga papadi ya kgwele ya maoto. Dikhuru le diku tšeo di sehlefetšego, khuru ye nngwe e kgobogile, meriri ya go hlafa, diaparo tšeo di thankgetšego dipatso tšeo molokiši wa difatanaga a ka ikgantšhago ka tšona. Le lefetla la go tlwaelega la mokgathalo, sethitho.

“Sawubona Malume!” yo mo nnyane a dumediša ka lethabo.

“San’bonani!” Charles a fetola, a leka go itswalanya le phišegelo ya bona.

“Bjale ge, ke bokae tšhelete  yeo re ilego go e dira bošegong bja lehono?” Charles a myemyela, a lebelela go tšwa mošemaneng yo mongwe go ya go yo mongwe. Bašemane ba lebelelana ka tlabego gomme ba boela go Malome Charles.

“Well, le bonala bjalo, ke kgolwa gore le hweditše mehlopohlopo ya gauta fase mola shaft 8,” Charles a sega ka setu.

“Haa Malume!’ bašemane ba sega.

“Malume o right?” Phumlani a botšiša mola ka bjako sefahlego sa gagwe sa go butšwa se laetša go tshwenyega.

“Gobaneng?” Charles o a fišegelwa.

“O be o bonala eke o nagana ka selo sa bohlokwa pele re fihla mo.” Gwa realo Phumlani.

“Dikgetho mošemane, dikgetho. Bophelo bo mabapi le go dira dikgetho tšeo di ka se go pokelego bophelo bja gago ka moka. Nako ye nngwe dikgetho tšeo re gopolago gore di a re lokolla di boa morago go re pokela. Kgetha ka bohlale mošemane wa ka, o kgethe ka bohlale,” gwa eletša Charles.

Phumlani a dumela ka hlogo ka go nanya, a ekwa gore maele ao a sa tšwago go ntšhiwa a ka ba a lebantšhitšwe goba a sa lebantšhwa go yena.

Shorty, yoo a belegwego e le Lindokuhle, ka bjako a topa letsogo la Charles gomme a re “Na ekaba Malume o ya gae gona bjale?” Dikgetho di boleta kudu ge o le mengwageng yeo, Charles a gopolela teng. “Ke tla le šala morago e se kgale bašemane,” a ba tshepiša.

“Na o tla ba right?” Phumlani a botšiša, a sa tshepe.

“Gabotse!” Charles a myemyela.

E rile mola Shorty a laela ka letsogo ebile a thoma go fofela tlase mmileng wa mabu, kgwele ya dinao e le ka lehwafeng la gagwe la nngele, Phumlani a lebelela Charles ka mahlo a kwelobohloko sebakanyana.

“Ke tla ba gabotse mošemane,” Charles o ile a tsikitla phatla ya gagwe yeo e tshotshomago sethitho ka go kgonthišiša. “Le wena kitimela gae.”

A bogela Phumlani ge a latela morwarre wa gagwe a goga dinao, a fela a gadima morago go yena. Charles o ile a šikinya hlogo ya gagwe ka myemyelo. O be a tloga a thomile go rata bana bao. Ba be ba mo gopotša bana ba gagwe bao ba lego morago mola Kapa-Bohlabela. Moo ekego o be a leka go weša pelo ya gagwe, a re “Ke tla no tsena fela ka Freedom Square gomme ka re “Ola Gents! Gomme ka leba gae thwii.”

***

Re botše: O nagana gore Charles a ka se nwe bošegong bjo?