Morago ga gore a fe mosadi wa gagwe tšhelete ye e lekanego gore a ye go bona bana le ba gabo fase mola Kapa-Bohlabela matšatši a se makae, Charles o ikemišeditše go fediša manyami a gagwe ka go bo gaša bošegong bja lehono. O be a sa hloke go theeletša dipalabalo tša mosadi wa gagwe tša go se fele goba gona go hlwekišetša batho ba bagolo, goba go fihla ka Mošupologo.

Bahiri ba Bokamoso, molokoloko wa difolete moo a lego mohlokomedi, ba na le manganga ka nako tše dintši ebile ba dira gore le magotlo a bonale a hlwekile. Ba bangwe ba bana bao ba dulago moo molokolokong wa difolete ba be ba dira gore le bomapimpana ba ditšhwene a bonale ba hlabologile. Eupša gabjale o be a ithotše bona ka moka.

***

“ Moratiwa, hle… ke a go kgopela, ralokela kgolo le dišebini,” mosadi wa gagwe o ile a mo kgopela pele a sepela ka maswiswana maseng ao.

“Gopola seo ngaka e se boletšego mabapi le sebete sa gago,” o ile a mo tsena ditsebeng.

“Please daddy, tlogela go nwa. Ke ka se kgone go godiša bana ba ntle le wena. Ba ya go hloka… aowa, re ya go hloka,” o ile a realo ka phišegelo.

“Okay, okay leebana la ka! Gabjale tsena tsela, e sego bjale o tla šiwa ke pese,” Charles o ile a fetoša poledišano.

Malobanyana mo Buhle o be a ile a tšea dipoelo tša diteko tša Charles tša mafelelo gomme a di sobeletša ka watropong bjale ka seka sa go mo gopotša ka bophelo bja gagwe bjoo bo fokotšegago.

O tloga a sa gopola seo ngaka e mo lemošitšego sona ka bogale kgweding tše pedi tša go feta: “Morena Mkhize, ge o ka tšwelapele ka go nwa ka wona mokgwa wo o tla bethwa ke strouku… goba go feta.”

Le ge dibeke di se kae tšeo di sa tšwago go fela tša go hlapogelwa di bile bobebe gannyane, tša mathomo tšeo di sego kae di bile dihele. Mathomong matsogo a gagwe a be a roromela gampe, go fetiša kudu moo elego gore ka nako ye nngwe o be a sepela a a tsentšhitše ka merabeng gore a se ke a goga mahlo ao a bego a sa hlokege. Go be go le boima, dingangišano tša go fiša magareng a gagwe le Buhle le tšona tša thunya. Karata ya mosadi wa gagwe ya phenyo e be e le bana ka mehla.

“Go lokile ge e le gore ga o nthate kudu moo e lego gore o ka ba wa fetoša ditsela tša gago, eupša o reng ka bana?” o be a tla fetola, a šupašupa monwana thokong ya gagwe.

Mesong ye mengwe le ye mengwe tekano ye e ka bago dibeke tše nne, mosadi wa gagwe o be a no mo kgokgoišwa go tšwa bolaong go no bolela therešo gomme a gapeletše gore ba ikotlolle maoto ka potlako. O be a tla bolela dilo tšeo di sa hlamatsegego go swana le gore “ Listen! Le dinonyana di thabetše go o bona o ikotlolla mogatšaka.”

O be a tla popoduma ka phetolo. Gomme mosadi wa gagwe yena o be a tla bolela, tsela ka moka ka bana, ditaba tša go tšwa gae le ka seo se bego se direga mola fekthering moo a šomago gona. O be a sa kwe bontši bja tšeo Buhle a bego a di bolela gobane bogolo bja tsela Charles o be a bo fetša ka mokgwa wa go sepela a robetše.

Buhle, bjalo ka moputso, o be a tla mo direla komiki ye bogale ya kofi (ka mokgwa woo a bego a e rata ka gona) ge ba fihla gae le dijo tša mesong tšeo e lego mmamoratwa wa gagwe, russians tše pedi, mae le thouste. O be a tla emela moragonyana gomme a mo myemyelela, a tletše boikgantšho, mola Charles yena a phaka letsaka leo la gagwe.

“Ke ikgantšha ka wena!” Buhle o be a tla realo mola yena a myemyela mola a khupile makhura.

Eupša gabjale Buhle o kgole kua Kapa-Bohlabela.

***

O eme a eja marapo a hlogo, ge lentšu la go tlwaelega eupša la go se amogelege le gowa go tšwa ka thoko e nngwe ya  tsela. “Charles?! Charles na ke wena?” Ke Moruti Dube, monna yoo, go ya ka Charles, a tšeetšego pitšo ya gagwe godimonyana go feta tekano. Moruti Dube o tsebega ka go ema kgauswi ga makopano a ditsela seferong sa go tsena mešašaneng ya Phomolong, go “bušetša mohlape wa gagwe gae” bjale ka ge a e bea. Ka maLabohlano, kudu go ya mafelelong a kgwedi, Moruti o ba bjalo ka sebata seo se tsomago. A sa itlama ka selo ge e se fela puku ye kgethwa le lentšu la go tena, o be a no dira gore bontši bja banna ba fapantšhe ditsela le yena.

Charles a hlokomologa Dube yoo a batamelago, a itira eke o nyakana le selo se sengwe sa bohlokwa ka gare ga plastiki ya gagwe yeo e sa rwalago selo ntle le khontheina ya ice-cream yeo e šomago bjalo ka sekhafthini. Moruti ka bo yena e kile ya ba monwi yo mogolo moragonyana mola. E rile ge thapelo le rehab di phološitše bophelo bja gagwe, o ile a fetša ka go sokologa gomme a hlankela setšhaba ka go gokagoketša banna go tšwa ka dipareng go ya dipankeng tša kereke. Go be go le boima go fihlelela seo mo motsaneng woo go fetiša nako ka go nwa bjalwa e bego e le selo seo se ratwago ke batho ba bantši, basadi le bana le bona ba balwa ka moo.

Lentšu le lengwe le ile la phunya go tšwa ka leswiswing leo le bego le golela godimo, “ Lahla chekas gomme o tšhabe Charles! Tšhaba o sa na le sebaka!”

Setshego sa go tlapela seo se latelago sa šitiša monna wa kholoro lebakanyana leo le lekanego gore mošomedi  wa Bokamoso a kgone go tšhaba ka pejana. Ge a le gare a garihla tseleng ya go ifala ye sesane ya mabu, yeo e tletšego meletelete, o be a kgona go kwa Moruti yo bolo  a ela hloko ya gagwe go mantšu ao a bego a le ka leswiswing.

“Ka moka ga lena le paletše phološo!” a goelela.

***

Re botše: Naa o nagana gore Charles o ya kae?