Kago o ile a tsoga gomme a tseba gore go na le seo se sego gabotse. O ile a lebelela go dikologa ntlo gomme a lemoga gore Tiger, mpša ya gagwe ga e gona.

“Mma? E ka ba o bone Tiger?”

Mmagwe o be a itokišetša go ya mošomong. “Mohlomongwe e tšwile ge Spokes a fihla.” Spokes e be ele motswala wa Kago. O ile a tšwela pele ka diiri tša gagwe tša go se tlwaelege, a eya ‘mošomong wa gagwe ‘mola bohle ba eya go robala, a tsena ka go nanya pele ga ge letšatši le ntšha nko. Ga go yo a bego a tseba gore ‘mošomo wa gagwe’ ke eng, goba gore o be a šoma kae.

Kago o ile a kokota mojakong wa Spokes. O be a kgona go mo kwa a gona ebile a patile hlogo. “Spokes, e ka ba o bone Tiger ge o fihla?”

“Aowa, ga ke tsebe monna. Hei, ke robetše wena!” Spokes be o a tšwafiša. O be a se na taba le selo ka ntle ga boyena fela. Kago o be a makala gore ke ka lebaka la eng mmagwe a be a mo dumelela go dula le bona.

O ile a tswalela mojako gomme a lekola nako. O be a swanetše go ya mošomong. Mna Alexander o be a hloile go šalelwa mo ‘Builder Friend’gomme Kago o be a sa tšwa go humana mošomo wo. E be ele bošilo go tshwenyega ka mpša ka tsela efe goba efe – ditšhila tša mošemane yo monnyane. O be a godile bjale, mengwaga e lesomesenyane, gomme a šoma, Kago o ile a ikgopotša. Ebile o be a na le mogwera wa mosetsana – re ka no realo: Jojo yo a bego a šoma ka lekaleng la Kabo go la Builder’s Friend. Go be go se gwa tšwa go eya kae, eupša o be a na le tiišetšo ya gore o a mo rata. O be a tlo mo kgopela go tšwa le yena ka le lengwe la matšatši. Ka nnete.

* * * * *

Kago o ile a tsena ka go nanya mojako thwii ka metsotso e masomepedi senyane go tšwa go iri ya bošupa. Combi e be e šaletše gomme o be a swanetše go kitima tsela ka moka go tloga mo a fologilego gona. Mna Alexander o be a eme mo go sešupanako sa go rekhota nako ya go fihla.

Motho a ka lebelela gore mošomi yo moswa a some ka maatla gore a be kaone go feta bohle . O sa le ditekong,goa o lebetše?”

“Aowa, mohlomphegi. Eupša ga se ka šalela.”

Mna Alexander a letša leleme la gagwe. “Go šetše ga nnyane fela gore o šalele. O swanetše go leka ka maatla go feta mo.”

“Ee, mohlomphegi,”gwa realo Kago. O be a tseba batho ba go swana le Mna Alexander. Ba be ba nyaka fela gore o ba bontšhe gore konokono ke mang. Ge o dutše o ba dira gore ba tsebe gore ke bona ba lego ka godimo, go sa tshwenye gore nnete ke efe, ba tlo go tlogela.

“Hei Kago,”gwa realo Jojo , a feta a eya ofising ya gagwe. “Ke tla go bona ka nako ya dijo tša matena, akere?”

“Go lokile; o a tseba,”gwa rwealo Kago. O ile a mo myemyelela gomme le yena a myemyela bjalo – dikotimarameng tša gagwe tšeo a dulago a lora ka tšona.

Kago o ile a apara diaparo dioborolo tša gagw, a tšea diklabo, gomme a leba lefelwaneng la go laiša merwalo. O be a ipshina ka mošomo wa gagwe, le ge bangwe ba be ba ka gopola gore o hlakane hlogo. O be a thabišwa ke ge ditheraka di etla di rwele masenke a mantši goba mapolanka, gomme banna ba fološetša tšohle ka ntlong ya bobolokelo. Go be go thabiša go bona mošomo o dirilwe ka bokgwari. O be a bala ditheraka tšeo di laišolotšwego, a šeditše le ntlo ya bobolokelo ge e le gare e tlala. Go be go kgotsofatša – mošomo o boima wa letšatši.

Saerine e ile ya lla go šupa gore ke nako ya dijo tša matena gomme Kago a kitimela lebating la ofisi ya Jojo. “Ke mo go sepela mmogo le lekgarebe le lebotsana,” a realo.

Jojo a myemyela. O be a tseba gore o thoma go bula tsejana ya go tsena go mosetsana yo. Go be go šetše fela nakonyana gore go loke.

* * *

Re botše gore o nagana eng: E ka ba Kago ke lesogana la mohuta mang? Ka lebaka la eng?