Nolitha ga se a kgalemele Cebo. Seo a se bolelago e be e le nnete yeo o ka se e ganetšego. Mang goba mang o be a tseba gore Mdi Nyathi ga a rute le gatee. O dula ka morago ga teseke ya gagwe, a lekola melaetša mogaleng wa gagwe, a lebelela letlakala la Facebook, a romela baithuti ka ntle ge ba hlaba lešata, le ge ba mmotšiša ka eng goba eng. Seo se direga ge a ka itshwenya ka go tla phapošing ya borutelo. Gomme e be e se yena a nnoši. Barutiši ka moka ba hwetša mogolo wa bona kgwedi ka kgwedi, efela ga se ba bantši bao ba šomelago tšhelete yeo ba išago gae. Gomme Mna Mahlangu a sa dire selo ka seo.

Ka fao, ee, baithuti ba Kreiti ya 8 ba ka hwetša dipukunyana tšeo ba ka di balago. Dipuku tše dibotse.

Myemyelo ya tlala sefahlegong sa Nolitha ka go nanya.

“Heo, hei, bonang fa, mphato – Mohumagatšana o na le kgopolo,” gwa goeletša Dubula.

“Ye botse!” Nolitha a buša a bolela.

Gomme ka fao kgopolo e tšweleditšwe. Mphato o tla kgobokeletša lekase la dipuku, ka go fokotša ditshenyagalelo le go boloka le go hwetša tšhelete ya bona ka moka mmogo. Gomme ka morago, go ena le gore le le tlatše ka dipuku feela, le ka thoma sehlopha sa go bala. Moithuti wa Kreiti 11 o tla dirišana le moithuti wa Kreiti ya 8. Ka moka ba tla kopana gatee ka beke. Ge baithuti ba nyaka go ya le dipuku gae ba ka dira bjalo, efela ge ba saenetše kontraka ya go tshepiša go di hlokomela, gomme ba boa le tšona lebakeng la beke.

“Go balela boipshino,” Nolitha o boletše bjalo. “Re tla boledišana ka dipuku. E re mongwe le mongwe a bolele. Gomme ka morago re tla reka tše dintši. E re sekolo ka moka sekgoboketše sekhwama!”

“Mogongwe re ka akaretša gape le ba Kreiti ya 9,” Cebo a bolela ka lentšu la tlase,” le ba ya 10. Gabotsebotse, sekolo ka moka. Efela ga se ra swanela go dira bjalo, Mohumagatšana. Ga se ra swanela go ba le maikarabelo a go ruta baithuti go bala fa.” Sefahlego sa gagwe se tshwenyegile, gomme gape go ngunanguna gwa tlala ka phapošing ya borutelo.

“O bolela nnete, Cebo.” Gapegape Nolitha ga se a leke go emelela sekolo seo a bego a ruta go sona mengwaga ye meraro ya go feta. “Ga se ra swanela go dira seo.”

“Efela ge re sa dire, ke mang yo a tla dirago?” Dubula o be a sa dire metlae gabjale. “Ge feela re ka hwetša dipuku, Mohumagatšana. Dikanegelo tšeo re nyakago go di bala.”

Nolitha a gogela moya teng ge a bula lebati la kantoro ya Mna Mahlangu. Cebo o be a bolela nnete, ka k,.gonthe.

Go tsena ka kantorong ya Mna Mahlangu go swana le go tsena ka lefaseng leo le fapanago kudu le leo o le tlogetšego morago. Sofa ya go iketla, e beilwe gabotse ka tlase sehuduamoya sa siling se dikologa ka godimo ga hlogo. Khapethe ye koto ka tlase ga dinao. Ka nngeleng ya teseke ya gagwe ke setšidifatši sa dino se se nnyane se dutše fale, sekhutlwaneng, motšhene wa kofi, wo mongwe wa yela ya go bitša mo o beago selwana sa polastiki gomme kofi ya tšwelela ka go rotha. Nolitha o ile a bona ya go swana le yona TV, George Clooney a enwa kofi. Lewa la monna la nnete. Nolitha o ile a gopola la mathomothomo ge a bona Mdi Nyatho a etšwa ka kantoring, a goga sekete sa gagwe sa go mo gomarela, a konopetša dikonopi tša hempe ya gagwe.

“Hei. o lebeletše eng, Mohumagatšana? Hamba! Boela morago phapošing ya gago ya borutelo.”

E be e le ngwaga wa gagwe wa mathomo wa go ruta, gomme seo se ile sa hlaga gantši. Ge Nolitha a botšiša Mohumagatšana Nene ka seo, mošomi-ka-yena a itshegela.

“Ke kgale ba dira seo mengwagangwaga.”

“Efela goreng ka mosadi wa gagwe?”

“Ga a na taba, gape Nyathi a ka se tsoge a mo tlogetše. Naa o ile wa bona diaparo tšeo mosadi yola a di aparago? O tloga a rata Mahlangu.”

Nolitha o ile a nagana ka menwana ya go šošobana ya go ota ya Mna Mahlangu, meno a maserolane a matelele, gomme a šinyalala. Le gateetee a ka se tsoge a nyakile gore a mmatamele.

Mna Mahlangu o be a dutše thwii ka morago ga teseke ya gagwe ge Nolitha a tsena. Oh, Mohumagatšana Solani,” a rea lo. “Ke rata ge barutiši ba ka dira peelano ge ba rata go bolela le nna. Ke dula ke swaregile.” Ga se a mo kgopele gore a dule fase, o no mmogela ka gare ka masethesethe a setulo sa gagwe sa ka kantorong. Seo se nago le lebara ya go go gogela pele le morago, goba ya go iša godimo le fase. Boithekgo bja kota e botse. E sego tša go swana ditulo tša go robega tša baithuti ba Marematlou tšeo ba dulago go tšona.

“Tshwarelo, morena.” Nolitha o ile swara segalo sa gagwe se fapane. Mna Mhlangu o be a rata barutiši ba gagwe ba tseba maemo a bona. kudu barutišigadi ba baswa. “Ke be ke nyaka, efela ba mphato ba nkgopetše gore ke lekole Sekhwama sa Lekase la Dipuku, gomme o be o se gona maabane. Ke tla ba le bona ka nako ya thutwana ya bobedi. Ke hweditše makase a dipuku a mabedi, a mabotse kudu, a go se bitše lebenkeleng la diphahlo tša go dirišwa pejana, gomme ba rile ba tla mpeela ona. Ke nagana gore re na le tšhelete ya go ka lekana, gomme ge re ka di beeletša—”

“Oho, ee.” Mna Mahlangu a ntsena ganong ka boleta. “Se, oho – re se bitša eng? – Sekhwama sa Lekase la Dipuku. Hmmm. Nnete ke gore, gabjale, Mohumagatšana Solani, ke nagana gore re ile go ba le bothatanyana.”

***

Re botše gore o nagana eng: O nagana eng ka kantoro ya Mna Mahlangu?