Holoni khulwane ho swifhala ho tou nzwinzwimala. Khaya o ima nga murahu ha siṱeidzhi; a hu na zwine a khou pfa zwone arali hu si u divhitha ha mbilu yawe.
Khathihi fhedzi hu vhonala tshedza tsha luvhone lwo itaho tshidanga tshi penyaho vhukati ha siṱeidzhi.
Musi a sa athu fema nyana, u pfa zwienda zwawe zwa baḽethe zwi tshi khokhonyakhokhonya fhasi ho tou adziwaho bulannga, minwe yawe i tshi tshinatshina nga manyanyu. O sokou pfa hu na maanḓa a mu kokodzeleho ngei tshedzani sa zwiḽa tshibigiri tshi tshi kokodzwa nga maginethe.
A lingedza u hanelela o ima fhethu huthihi. Fhedzi u kokodzwa ha hulela. A lingedzwa hafhu u hana.
Aḽa maanḓa a mu kokodzela vhukati ha siṱeidzhi.
“A tshine, Khaya. A tshine.” Ipfi ḽo ambaho ḽo dzika, fhedzi ḽi na ṱhuṱhuwedzo ya tshihaḓu.
Khanya a poidzapoidza a tshi ṱodzimela swiswini, a si vhone muthu.
“A tshine, Khaya. A tshine.”
A takusela khana yawe nṱha. U na vhuṱanzi uri a hu na muthu.
“A tshine! A tshine! A tshine!” Ipfi ḽi vho ambela nṱha vhukuma, zwe zwa ita uri mbilu ya Khaya i thome u divhitha khathihi na ipfi ḽiṅwe na ḽiṅwe ḽine ḽa khou buliwa.
Muzika wa thoma. Ndi vesheni ya luimbo lwa Beyoncé lu no pfi ‘Ave Maria’.
Muvhili wawe wa fhindula nga u ela sa mulambo na notsi dza luimbo. Luimbo lwa fhaṱela nga nyaluwo; Khaya u pfa khana yawe i tshi awela, milenzhe yawe i tshi kanda fhasi nga vhuronwane.
Musi luimbo lu tshi fhela, a ima hanefho siṱeidzhini, o livhana na gogo ḽa vhaṱaleli. Ai, a hu na muthu! Fhedzi …
“Khaya, a vuwe… a vuwe.”
A lingedza u hanelela o ima …
“Khaya! Hai munnani, a vuwe! U ḓo lenga.”
Khathihi fhedzi a bonyolola maṱo awe. Musiamelo wawe wo ṋukula nga biko ḽi fhisaho.
“Mulandu … hu khou itea mini?”
Mme awe vha sendela murahu.
“Uhm …” U ralo a tshi takusela maṱo awe nṱha, a tshi lingedza u shandukisa u sinyalala hu re tshifhaṱuwoni tsha mme awe.
“A hu na zwo khakheho… ndi muloro … ndi muloro zwawo,” u ralo a tshi khou vuwa u bva mmbeteni.
Mme awe vha vula mulomo sa vhane vha ṱoḓa u amba, fhedzi a vha o no bva nga muṋango mutukana.
Ri vhudzeni vhuḓipfi haṋu: Hu na zwine na tama u zwi vuledza, fhedzi na ṱoḓa u zwi ita miloroni fhedzi?