“Siya eentolo! Siya eentolo!” U-Afrika weqayeqa phambi kukaDintle. Unina, uMme wa Afrika, wamomotheka, uDintle wawahla izandla.

“Iye,” kwatjho uMme waAfrika, “faka amanyathelo wakho. Kufanele sirhabe. Kusafanele sikhambe siye esitopeni sebhesi.”

Esitopeni sebhesi, bekunabantu abanengi abalindele ibhesi. Lokha nasele bakhwele boke ngebhesini, omunye nomunye gade aminyezelekile. UMme wa Afrika wabeka uDintle emathangeni wakhe. Kwase kuba nomntazana ohlala eduze kwakhe. U-Afrika wahlala ngakelinye ihlangothi likanina, waminyezeleka efesidereni. Kodwana akhange atshwenyeke nakancani ngombana bekutjho bonyana uzakwazi ukubona ngaphandle kwefesidere.

Ekugcineni umtjhayeli warhuwelela wathi, “Sitopo sokugcina!”

“Yewize, Afrika. Siyehla lapha,” kwatjho unina. Bathe bangehla ebhesini, uMme waAfrika wabhebhula uDintle. “Yiba seduze kwami,” watjho ku-Afrika. “Yindawo ematasatasa le.”

Nangembala bekumatasatasa. Bekunabantu abathwele iinkhwama begodu basunduza amatroli azele okuthengiweko. Bekunomma obekathwele lokho akuthengileko ehloko.