“Lelo livi lamake wami,” kwasho Afrika. “Shem, ulahlekile! Ngiyeva kutsi utfukutsele. Kuvakala ungatsi usedvute nesitolo setincwadzi. Wota, asigijime, Asanda!”

Bakanyekanye labantfwana bagijima bacondza esitolo setincwadzi, futsi khona lapho, embikwaso, bekunaboMme wa Afrika naDintle. Make wavula imikhono yakhe na-Afrika wagijima wacondza kuyo.

“Sawubona, Make, ukahle?” kwabuta Afrika. “Ungahlupheki manje, sesikutfolile wena naDintle. Awusalahlekanga nyalo.”

Dintle bekajabule kakhulu kubona bhuti wakhe lomkhulu. Afrika wagobondzela wamhaga.

“Make, lona ngu-Asanda, umngani wami lomusha,” kwasho Afrika. “Ungifundzise kusimisa libhodlela lanamnedi enhloko yami. Ufuna kutsenga incwadzi.”

“Sawubona, Asanda, ngiyajabula kuhlangana nawe,” kwasho Mme wa Afrika amoyitela. “Manje, asesibuke Letincwadzi sibone kutsi singatfolani! Afrika, khumbula bewufuna kufundza kwakha indlu yenyoni.” Bonkhe bacitsa sikhatsi babuka letincwadzi futsi Make watfola yinye lekukhombisa kutsi utakha njani tintfo letehlukene ngesigodvo.

“Ngicela, ungitsengele yona?” Afrika wacela make wakhe.

“Yebo, nangabe uyayitsandza,” kwasho Make. Kwase kuba sikhatsi sekuhamba. “Buka, Asanda! Ngihamba nencwadzi yami ngiya ekhaya isenhloko!” kwasho Afrika, asimisa incwadzi yakhe lensha enhloko yakhe.

“Ungakhohlwa kuphakamisa imphumulo yakho, njengenkhosana!” kwahleka Asanda.