“Siyahamba siya etitolo siyotsenga! Siyahamba siya etitolo siyotsenga!” Afrika wazubazuba embikwaDintle. Make wakhe, Mme wa Afrika, wammoyitelela, wabese Dintle ushaya tandla takhe.

“Yebo,” kwasho Mme wa Afrika, “ngako-ke faka ticatfulo takho. Kufanele sisheshise. Kusafuneka sihambe siye esiteshini sebhasi.”

Esiteshini sebhasi, bekunebantfu labaningi bamele ibhasi. Futsi ngesikhatsi bonkhe sebangenile ebhasini, wonkhe umuntfu bekampintjekile kancane. Mme wa Afrika wagona Dintle etsangeni lakhe. Kwase kuhlala lomunye make eceleni kwakhe. Afrika wahlala ngakulelinye licele lamake wakhe, wampintjeteleka efasitelweni. Kodvwa akatange akunaka konkhe loku ngoba bekusho kutsi utawukhona kubuka ngaphandle ngalelifasitelo.

Ekugcineni umshayeli wamemeta, “Siteshi sekugcina!”

“Buya, Afrika. Sehla lapha,” kwasho make wakhe.

Emva sebehlile ebhasini, Mme wa Afrika wamema Dintle emhlane wakhe. “Sondzela kimi wena,” watjela Afrika.“Lena yindzawo lephitsitela kakhulu.”

Ngempela bekuphitsitela. Bekunebantfu labatfwele tikhwama bafuca nemathroli lagcwele labakutsengile. Bekukhona futsi umfati labeketfwele enhloko labekutsengile, kutihlalele angakakubambi.