“Xana wena wa swi kota ku endla leswiya, Mama?” Afrika a vutisa mhani wakwe.

“Ku endla yini?” ku vutisa Mme wa Afrika.

“Ku rhwala mpahla enhlokweni ya wena hi ndlela liya,” ku hlamula Afrika.

“Ina ndza swi kota. Swa olova,” ku vula mhani wa yena.

Afrika a langutisa wansati loyi ku kondza loko a nyamalala exikarhi ka mitshungu ya vanhu lava a va yime exikarhi ka switolo swa makete.

“Ndza beja na mina ndzi nga swi kota ku dzenengela!” Afrika a ehleketa a ri yexe. Kutani a vona bodlhela ra pulastiki ra kholodirinki leri nga riki na nchumu ri ri ehansi. A ri rholela kutani a ri veka ehenhla ka nhloko, kambe a boheka ku ri khoma hikuva a ri tshamela ku wa.

“Eish!” ku vula nhwanyana loyi a ri kwala tlhelo ka yena. “Ndzi ta ku komba leswaku swi endlisiwa ku yini!” A teka bodlhela ra kholodirinki, a ri dzenengela enhlokweni, a tlakuse nhompfu ya yena emoyeni, a rhendzeleka laha Afrika a yime kona ku fana ni n’wana wa hosi loyi wa manyunyu.

“Yooo!” ku vula Afrika, hi ku nyanyuka. “Hi wena mani vito ra wena?”

“Hi mina Asanda,” a hlamula.

“Mina ndzi Afrika. U dyondzise ku yini ku endla sweswo?” ku vutisa Afrika.

“Ndzi rhange ndzi ringeta hi ku famba ndzi rhwale tibuku enhlokweni,” a hlamula. “U fanele u nga ninginisi nhloko ya wena loko u ri karhi u famba.” Kutani a vuyisela bodlhela ra kholidirinki ehenhla ka nhloko ya Afrika. “Sweswi famba khwatsi, yimisela nhompfu ya wena emoyeni, wonge i n’wana wa hosi.”

Afrika a rhendzeleka hi Asanda hi ku nonoka, a nga ninginisi nhloko ya yena na nhompfu yi ri emoyeni. Kutani bodlhela ri tshamiseka!

“Languta Ma! Ndzi langute …” ku vula Afrika, kambe a nga n’wi voni mhani wa yena! Hiloko munhu un’wana a tlumbana na Afrika kutani bodlhela ra kholodirinki ri wa enhlokweni. Kambe a rivele hi bodlhela – a a lava ku tiva lomu mhani wa yena a nga kona!

“Mi kwihi, Mama?” a huwelela. A nga kumi nhlamulo. “Mama!” a huwelelela ehenhlanyana. Na sweswi a nga kumi nhlamulo.

“Mhani wa mina u lahlekile!” Afrika a byela Asanda. “A hi ri endleleni yo ya exitolo xa tibuku le khonweni, kambe sweswi u fambile!”

“Na mina ndzi ya exitolo xa tibuku! Ndzi ya xava buku ya mitsheketo hi mali leyi ndzi nga tihlayisela yona. Kumbexana mhani wa wena u nghene exitolo xa tibuku. A hi fambi hi ya n’wi lava!” ku ringanyeta Asanda.

Va ri swin’we Asanda na Afrika va famba va tsemakanya mitshungu ya vanhu. Hi nkarhi walowo Afrika a twa vito ra yena! “Afrika! Afrika! U kwihi?”