This story has been specially created to celebrate World Read Aloud Day 2018 by reading-for-enjoyment campaign, Nal’ibali. Find this story in all SA official languages and find out more about the project here.

***

“Lehono ke tla nweša dino tše pedi, Tate,” a realo Neo a apara dieta tša gagwe tša kgwele ya maoto.

“Gomme ke tla thuša ka go oketša ka dino tše tharo, Malome,” a realo Priya yo a fetšago go fihla ntlong ya gabo Neo le moratho wa gagwe wa mošemane, Rahul. Rahul o be a swere vuvuzela ya gagwe ye hubedu ya go kganya.

Tatago Neo o ile a sega. “Agaa, gona ke tlo reta gahlano!”

“Le nna, Malome! Nka reta le nna?” gwa botšiša Rahul.

“Ee, mošemane wa ka,” a realo tatago Neo a thuša Mbali go apara dieta. “Bjale a reyeng!”

Ba tsene ka sefatanageng ka moka ga bona. Neo o dutše ka pele. O dutše ka pele gantši. O be a na le nnete ya gore ge tatagwe a tla mo dumelela, ge maoto a gagwe a le a matelele, o tlo kgona go otlela sefatanaga. Go be go bonala go le bonolo. Rahul le Priya ba dutše ka morago ka mathoko a Mbali. Ba ile ba mo tsikiditla gomme a sega.

Ba ile ba fihla lepatlelong ka pela. Ba fihlilele ka nako ye Priya le Neo ba swanetšego go tutetša mmele le maloko a Maqhawe Football Club. Lehono ba be ba bapala le Diamond Football Club.

“Le gopole go kgonthiša gore le fokotša go phadima ga Diamond, gore ka morago ga papadi ba fetolele leina la sehlopha go Coal Football Club,” a realo mohlahli.

Gwa fihla nako ya gore babapadi ba kitimele ka lepatlelong. Malokwane a letša nakana ya gagwe gomme papadi ya thoma.

Ba thomile ka go nanya, efela ba oketša matšato. Go be go na le lešata le legolo ge ba malapa a bana ba dihlopha tše pedi ba reta. Kgwele e tlo ba ka thoko ye go nwešago nakwana, gomme ge e bonala e ke e tlo ya ka seripeng se sengwe, yo mongwe wa babapadi o tlo tšea kgwele! Papadi e sepetšwe ka tsela yeo go fihlela gare ga nako ya papadi.

“Ke tenegile! Le tshepišitše go nweša dino,” Rahul a realo go Neo le Priya ge ba etla ka mathoko a lepatlelo.

“Ee. Mbali o nyaka dikgwele, Mbali o nyaka dikgwele,” gwa boeletša Mbali. “Mbali o swere ke boroko,” a realo a edimola. Neo le Priya ba sega ba ya go maloko a sehlopha sa bona.

Nakana e letše gomme babapadi ba kitimela lepatlelong go bapala seripa sa bobedi. Papadi ya tšwela pele go swana le ya seripa sa pele … go fihlela ge go šetše motsotso wa mafelelo!

Neo o be a na le kgwele. O ile a lealea go bona ge eba go na le leloko la Diamond kgauswi le yena. Aowa, o be a le tee. O kitimetše pele a tiribola kgwele. Gateetee, gwa tšwelela sebapadi sa Diamond. Neo o mo lebeletše thwii ka mahlong gomme a raga kgwele ya feta gare ga maoto a sebapadi se sengwe. Babogedi ba hlaba lešata ka lethabo

Sebapadi se sengwe sa Diamond sa batamela Neo go mo tšeyela kgwele. Ka pejana, Neo a ragela kgwele go Priya.

Bohle ba swere moya ge Priya a tšea kgwele gomme a e raga kudu ka leoto la nngele. LADUMA! Moswaradino wa Taamane ga se a bona kgwele ge e etla! Priya o nwešitše.

Pele ga motsotswana. O rile ge a retologa gore a keteke nno malokwane a letša nakana ya mafelelo! Maqhawe e thopile papadi!

Neo o thabile kudu a kitimela Priya gomme a mo kuka!

Bobedi bja bona ba kitimela maloko a sehlopha le mohlahli ka thoko ga lepatlelo gomme ba tepa. Gomme Priya le Neo ba kitimela go tatago Neo. Rahul o be a letša vuvuzela ya gagwe kudu.

“Wo ke mošomo wa go swanelwa ke aesekherimo, Priya le Neo,” a realo tatago Neo. “Bagale ba rena ba babedi ba tlo e thabela?”

“Ee! Re rata aesekherimo,” Mbali a ba arabela. Ka moka ba sega.

Neo a kuka Mbali gomme ba ya go reka aesekherimo. Ga se a nweša dino tše pedi tše a bego a nyaka go di nweša, efela o thušitše mogwera wa gagwe wa potego go nweša nno ya go thopa papadi! Gomme Priya? O be a thabile ka gobane e be e le nno ya gagwe ya mathomo go Maqhawe. Modumo wa vuvuzela ya Rahul o be o kare mmino wa bose wa go bapalelwa yena mong.