This story has been specially created to celebrate World Read Aloud Day 2018 by reading-for-enjoyment campaign, Nal’ibali. Find this story in all SA official languages and find out more about the project here.

***

“Kajeno ke ilo hlaba dintlha tse pedi, Ntate,” ha rialo Neo a ntse a rwala dieta tsa hae tsa bolo ya maoto.

“Mme nna ke tla thusa ka ho eketsa ka dintlha tse tharo, Malome,” ha rialo Priya ya neng a qeta ho fihla habo Neo le moenanyana wa hae, Rahul. Rahul o ne a tshwere vuvuzela ya hae e mmala o bofubedu bo kganyang.

Ntata Neo a tsheha. “Tjhe, ke se ke tatetse ho ya le thoholetsa makgetlo a mahlano he!”

“Le nna, Malome! Na le nna nka ya ba thoholetsa?” ha botsa Rahul.

“Ehlile, moshanyana ka,” ha rialo ntata Neo a ntse a thusa Mbali ho rwala dieta tsa hae. “Jwale, ha re tsamayeng!”

Ba kena ka koloing kaofela. Neo a dula ka pele. O ne a se a kile a dula moo ka makgetlo a mangata. O ne a ena le bonnete ba hore haeba ntatae a ne a ka mo dumella, hang ha menoto ya hae e se e le melelele hantle, o tla kgona ho kganna koloi. Ho ne ho shebahala ho le bonolo. Rahul le Priya ba dula kamorao mahlakoreng a mabedi a Mbali. Ba ne ba mo tsikinyetsa mme yena a tsheha.

Kamora nako e seng kae feela, ke ha ba se ba le mabaleng a bolo ya maoto. Ba ne ba fihlile hantle ka nako hore Priya le Neo ba ilo ema le bomphato ba bona ba tswang sehlopheng sa Maqhawe Football Club bakeng sa ho iphuthumetsa ka boikwetliso. Ba ne ba bapala kgahlanong le Diamond Football Club kajeno.

“Hopola ho netefatsa hore o thethefatsa ho benya ha Diamond hore kamora papadi ba tlamehe ho fetola lebitso la bona ho ba Coal Football Club,” ha rialo mokwetlisi.

Jwale e ne e se e le nako ya hore dibapadi di mathele ka lebaleng. Moletsaphala a letsa phala ya hae mme papadi ya qala.

Dintho di ile tsa qala ka lenama, empa ka nako e seng kae ba phahamisa dieta. Ho ne ho tletse lerata ha ba malapa a bana ba dihlopha tse pedi ba ba thoholetsa. Bolo e ne e le ka lehlakoreng le leng la lebala hanyane, mme e re ha ba shebahala jwaloka haeka ba tla e lebisa lehlakoreng le leng hape, e mong wa dibapadi tsa bona o ne a hlotha bolo eo! Papadi e ile ya tswela pele ka tsela ena ho fihlela nakong ya kgefutso.

“Ke tenehile! Le ne le tshepisitse hore le tla hlaba dintlha,” Rahul a bolella Neo le Priya ha ba tlile lehlakoreng.

“Ee. Mbali o batla ntlha, Mbali o batla ntlha,” ha pheta Mbali. “Mbali o a otsela,” a eketsa ka ho idimola. Neo le Priya ba tsheha feela mme ba kgutlela ho ditho tsa sehlopha sa bona.

Phala ya lla mme dibapadi tsa mathela ka lebaleng bakeng sa halofo ya bobedi. Papadi ya tswela pele ka yona tsela eo halofo ya pele e bapetseng ka yona … ho fihlela ho setse motsotso o le mong feela!

Neo o ne a tshwere bolo. A sheba kwana le kwana ho bona hore ebe ho na le wa Diamond Football Club ya haufi le yena. Tjhe, o ne a le mong. A mathela pele a tswapetsa bolo. Hanghang sebapadi sa Diamond Football Club sa hlahella. Neo a mo sheba hantle ka mahlong mme a rahela bolo pakeng tsa maoto a sebapadi seo. Babohi ba hoeletsa ke thabo.

Sebapadi se seng sa Diamond Football Club sa atamela ho Neo ho ya mo hlotha bolo. Ka potlako, Neo a fetisetsa bolo ho Priya.

Bohle ba hula moya ha Priya a nka bolo mme a e raha haholo. LADUMA! Sethibathibane sa Diamond ha se a ka sa bona letho! Priya o ne a hlabile ntlha.

Mme ka motsotswana feela. Eitse moo a reng o a fetoha ho keteka ntlha, moletsaphala a letsa phala ya ho qetela! Maqhawe a ne a hlotse papadi!

Neo o ne a thabile hoo a ileng a mathela ho Priya mme a mo phahamisetsa hodimo!

Mmoho ba mathela ho bomphato ba bona le mokwetlisi wa bona ka lehlakoreng la lebala, mme kaofela ha bona ba deba. Yaba Priya le Neo ba mathela ho ntata Neo. Rahul o ne a letsetsa vuvuzela hodimo.

“Tjhe, eo e bile papadi e loketseng aesekerimi, Priya le Neo,” ha rialo ntata Neo. “Na bahale ba rona ba babedi ba tla thabela seo?”

“Ehlile! Re rata aesekerimi,” Mbali a ba arabella. Bohle ba tsheha

Neo a kuka Mbali mme a ya le yena ho ya reka aesekerimi. Leha a sa ka a hlaba dintlha tse pedi tseo a neng a di batla, feela o ne a thusitse motswalle wa hae wa hlooho ya kgomo ho hlaba ntlha ya tlholo! Mme Priya? O ne a thabile hobane eo e ne e le ntlha ya hae ya pele ya Maqhawe. Modumo wa vuvuzela ya Rahul o ne o tshwana le mmino o monate o neng o bapallwa yena feela.