This story has been specially created to celebrate World Read Aloud Day 2018 by reading-for-enjoyment campaign, Nal’ibali. Find this story in all SA official languages and find out more about the project here.

***

“Namuntlha ndzi ta howisa tibolo timbirhi, Tatana,” ku vula Neo a ri karhi a ambala tikhokho ta yena.

“Mina ndzi
ta pfuna hi ku
engetela hi ku
howisa tibolo
tinharhu eka tona,
Malume,” ku vula
Priya loyi a ha ku
ka eka va Neo na
makwavo wakwe,
Rahul. Rahul a
khome vhuvhuzela
ya yena yo hatima yo tshwuka.

Tata wa Neo a hlekelela. “Loko swi ri tano, ndzi langutela ku tlangela ku ringana ka ntlhanu!”

Na mina, Malume! Xana na mina ndzi nga tlangela?” ku vutisa Rahul.

“Ina mufana wa mina,” ku hlamula tata wa Neo loko a ri karhi a pfuna Mbali ku ambala tintanghu. “A hi fambeni sweswi!”

Hinkwavo va nghenile emovheni. Neo u tshamile emahlweni. U tshama kona hi masiku. A ri na ku tshembha leswaku loko tata wakwe o n’wi pfumelela, na loko milenge ya yena yi lehile ku ringana, a nga kota ku chayela movha. A swi tikomba swi olovile. Rahul na Priya va tshamile endzhaku hi le matlhelo ya Mbali. Va n’wi dikilidile kutani a hlekelela.

Loko va nga si swi langutela, va kile erivaleni ra mitlangu ya bolo. Va kile hi nkarhi leswaku Priya na Neo va ta hlangana na vatlangikuloni ku suka eka xipano xa Maqhawe Football Club leswaku va tiolola. Namuntlha va tlanga na xipano xa Diamond Football Club.

“Tsundzukani ku tiyisisa leswaku mi rhombisa ku hatima lokukulu ka Diamond Football Club, leswaku loko ntlangu wu hela va cinca vito ku va xipano xa Coal Football Club,” ku vula mudzaberi.

Ku kile nkarhi wa leswaku vatlangi va tsutsumela endzeni ka rivala. N’watimpepe u chayile xitswiriri naswona ntlangu wu sungurile.

Swilo swi sungule hi ku nonoka, kambe va sungurile ku hatlisa. A ku ri na huwa yikulu loko mindyangu ya swipano ha swimbirhi va ri karhi va khuzela. Bolo a yi va etlhelweni swa nkarhinyana, hi nkarhi a wu ta vona onge va lava ku yi yisa etlhelweni ra hafu, wun’wana wa vatlangi a ta yiva bolo! Ntlangu wu fambise xisweswo ku kela loko ku ka nkarhi wo wisa.

“Ndzi borhekile! Mi ndzi tshembise leswaku mi ta howisa tibolo,” Rahul a byela Neo na Priya loko va huma hi tlhelo ra rivala.

“Ya. Mbali u lava mi howisa, Mbali u lava mi howisa,” ku vula Mbali hi ku vuyelela. “Mbali u khoma hi vurhongo,” a engetela hi ku ahlamula. Neo na Priya va lo tihlekela kutani va tsutsuma va ya hlangana na vatlangi kuloni.

Xitswiriri xi biwile naswona vatlangi va tsutsumele erivaleni ku ya eka xiphemu xa vumbirhi xa ntlangu. Ntlangu wu yile emahlweni na leswi a wu endlisa swona na le ka xiphemu xo sungula xa ntlangu … ku kela loko ku sale ntsena minete yin’we!

Neo a ri na bolo. U langutile kwala kusuhi na yena ku vona leswaku a ku na wun’wana wa xipano xa Diamond ekusuhi na yena. E-e, a ri yexe. U tsustumile a ya emahlweni, a va xanda hi bolo. Hi xinkadyana mutlangi wa xipano xa Diamond u tshinerile. Neo a n’wi languta emahlweni
loko a ri karhi a ba khixi bolo yi hundza hi le xikarhi ka milenge ya mutlangi loyi. Vahlaleri va ku huwaa hi ku tsaka.

Mutlangi wun’wana wa Diamond Football Club u tile ekusuhi na Neo a lava ku n’wi ba xikero. Hi ku hatlisa, Neo a rhumela Priya bolo.

Un’wana na un’wana a khoma mbilu loko Priya a teka bolo a yi raha hi matimba. LADUMA! N’watipala wa Diamond Football Club a nga yi vonangi loko bolo yi ta! Priya u howise bolo.

Ku nga si hela na sekene. Loko a ha hundzuluka ku ta tlangela ku howisa bolo, n’watimpepe u chayile xitswiriri xo herisa ntlangu! Maqhawe Football Club va hlurile eka ntlangu! Neo a tsakile swinene ku ka laha a nga tsutsumela Priya ku ya n’wi tlakula!

Hinkwavo va tsutsumile va ya laha a ku ri na vatlangikuloni na mudzaberi etlhelo ka rivala, hinkwavo va deba. Kutani Priya na Neo va tsutsumela tata wa Neo. Rahul a chaya vhuvhuzela yi ba huwa swinene.

“Priya na Neo, matlangelo lawaya ya fanela hi ayisikhirimi,” ku vula tata wa Neo. “Xana tinghwazi ta hina ti nga swi tsakela sweswo?”

“Ina! Hi rhandza ayisikhirimi,” Mbali a va hlamulela. Hinkwavo va hleka.

Neo u tlakurile Mbali ku ya eku xaveni ka ayisikhirimi. A nga va a nga howisangi tibolo timbirhi leti a ti lava, kambe u pfunile munghana wa yena lonkulu ku howisa bolo leyi nga va hlurisa! Priya yena? A tsakile hikuva a ku ri bolo ya yena yo sungula ku yi howisa eka Maqhawe Football Club. Mpfumawulo wa vhuvhuzela ya Rahul a wu fana na vunanga byo tsokombela lebyi a byi tlangeriwa yena.