URhino ufika eRichtech sesiphuma isikole. Asho aqhamuke uMary ehamba noLondi. Baqonde kwiNissan Navara emnyama. Isigebengu esinguLondi sithe kuMary akafonele uyise asho ukuthi bazobuya nomalume kaLondi. Wavuma nobaba kaMary.

Uvula isicabha sangemuva uLondi angene, ahlehle ukuze noMary angene. Isuke imoto. UMary uphakamisa amehlo, kuthi nke uvalo. Kuthulekile emotweni.

“Hawu angisabingelelanga. Sanibona Londi nomngani wakho.” Kusho uRhino ebabuka esibukweni esiphezulu emotweni.

“Yebo, malume. Unjani?” kusho uLondi.

“Ngiyaphila, unjani Mary?”

Kuphendule uLondi kuqala ezenza omangele.”Hawu malume, kanti niyazana noMary?”

Ja, sike sabonana eflethini ekuseni.”

“Sengikhohliwe ukuthi ubuye uhlale eCurrent.” Agqule umngani wakhe ngendololwane.”Umalume ubuza ukuthi unjani?”

“Ngiyaphila,” kuphendula uMary.

“Nijahile, Londi?”

“Mina angijahile, Malume. Angazi-ke uMary.” Asho ephenduka embuka umngani wakhe.

“Mina ngijahile.” uMary ebalekela amehlo kaRhino esibukweni.

“Bengifuna ukudlula eMeerensee ngithenge izinto ezincane, nani nithole no-ice cream. Ngeke nginibambezele.”

Bapaka eduze kwase-KFC. Ehle uRhino azovulela uMary isicabha. Angayithandi uMary le eyenzekayo. Angathini umaMgobhozi embona ehla ezimotweni zamadoda? Aze avulelwe ngisho isicabha pho? Kuphinde kube yilo mlisa futhi wasekuseni? Ehle noLondi, balandele uRhino bangene e-KFC.

“Ningathanda ukudla ini Londi?” kubuza uRhino

Washo entshweni. Uyazithandela phela izinto uLondi.

“Mina malume ngicela ibhakede le-KFC ukuze sizodla sonke ekhaya.”

“Uzodlani okwamanje?”

“U-ice cream uright malume.”

Ajikele kuMary.”Wena ungathandani?”

“I-green salad no-ice cream,” uMary uphendula ekhulumela phansi.

“Nami ngicela nayo i-green salad, malume.”

Asukume uRhino. ULondi noMary basale bexoxa. UMary useqala ukuncibilika.

“Awusho mngani, uke wacabanga ukuba ne-boyfriend?” kubuza uLondi.

“Awu, Londi! Into engekho emqondweni wami njengamanje. Ubuziswa yini?”

“Ngibona ngathi umalume uyazishaya ngawe. Wena awumboni?”

“Kahle ngehaba, Londi. Umbone enzani umalume wakho?” uMary umangele.

“Ngibona indlela akubuka ngayo. Kwakhona ukuthi akugibelise emotweni yakhe ngaphandle kwemibuzo kungimangazile. Bengithi uzobuza okuthile.”

“Asazi, Londi”

Ahleke yedwa uLondi. “Manje awusho, uma engabeka abe mabili ungenze njani? Ungamchiliza?”

“Habe! Ngisafunda mina, Londi. Ngithemba ukuthi naye uyabona ukuthi ngisafunda. Angifune zinkinga.”

“Hawu kanti uthando luyinkinga yini, Mary? Umdala manje. Ukuthi akekho umzali ogqugquzela ingane yakhe ukuthi iqome. Kodwa nobaba wakho uyakubona ukuthi usukhulile.”

“Ucabanga kanjalo?”

“Ehhe, wake wezwa kuphi umzali ethi enganeni yakhe ayiqome? Ku-worse okwakho ngoba usele nobaba kuphela. Uyoze uguge engakubuzi lutho ngezothando.”

Anqekuzise ikhanda uMary. “Ngiyakuzwa, Londi. Kodwa namanje ngisasho, ngisafunda. Isoka into engingayidingi okwamanje.”

Abuye uRhino, ahlale nabo esalinde libizwe i-order lokudla. Uzenza ongabanakile. Nabo sebethule.

“Mary, unenhliziyo encane noma uyathula?” kubuza uRhino, emamamtheka.

“Ubuzelani?”

“No, ukuthi ngicabanga indlela ovale ngayo isicabha ekuseni. Saphinda sakufica emgwaqeni, wasishiya kanjalo.”

“Angibajwayele abantu and ubaba u-strict.”

“Ngizwa kahle. Awusho, kukhona ohlekisana naye? Ngiyazibuzela nje. Uma ngikucasula, ngiyaxolisa.”

“Ngisafunda mina, angifune ndoda.”

“Kodwa ngelinye ilanga uzoba nayo?”

“Yebo, uma sengiphothule izifundo zami.”

“Ungadinwa imibuzo yami. Ukuthi ngizikhonzele ukuxoxa. Awusho, uma sekufike leso sikhathi sokuqoma, ungathanda umuntu onjani?”

Amamatheke uMary, kuthi paqa izihlathi. Kucime izibani kuRhino. Azithole esembukela eduze uMary. Kwale kancane ukuba athi manqa.

“Ngithanda umuntu ongaphuzi, ongabhemi futhi onothando lweqiniso. Angimfuni umuntu okhonze abesifazane ngoba sekwaba nezifo. Bese ebukeka nasebusweni.”

“Ngiyakuzwa. Uma ucabanga mina ngingakwazi ukuba yilowo muntu?”

“Mmm…angazi.”

“Uyazi ngiyafisa ukuba nomuntu engizomnika uthando. Umuntu engizomsebenzela. Kuthi nxa ngiqeda ukusebenza ngazi ukuthi ngizofica yena engilindile endlini.”

Libizwe i-order labo lokudla. Asukume masinya uLondi, athathe i-slip kuRhino, alande ukudla. Basale bebukana uRhino noMary. Aseyambulala amahloni uMary, uthule. Kuze kuqhubeke yena uRhino.

“Uma ungibheka, Mary, ngingaba yindoda eqotho kuwe?”

“Angazi.”

“Awazi kanjani ngibuza kuwe?”

Amubambe isandla uRhino. Akhophozele uMary.

“MaButhelezi, unganginika isikhala enhlizweni yakho?”

Avele asangane uMary. Isandla sikaRhino simenza ashiselwe. Asisuse ngokushesha.

“Ngiyaxolisa, Mary. Ukuthi umzimba wakho muhle, ngathi ngingahlalela ukuwubuka ubusuku nemini. Yingakho sengizithola sengibambe isandla sakho. Bengingaqondile ukukuthusa.”

Athule uMary ambuke. Iqale ukulokoza inhlansi yothando. Muhle sengathi yintombi uRhino lo. Nale S-curl ayenzile iyamufanela.

Kufike ukudla. URhino uzithengele isiphuzo kuphela. Uma amehlo kaMary eqondana nakaRhino uyagwajaza. Aze ahleke uRhino.

“Khululeka Mary, angibadli abantu. Nami ngingumuntu njengawe. Angimubi futhi ngaleyo ndlela.”

Ahleke uMary okokuqala ngqa, athi, “Konje bhuti ungubani igama?”

“Ngibize ngoRhino.”

“Hawu, igama owaliqanjwa abazali?”

“Cha, amajita angibiza kanjalo ngoba la ngifika khona kusiphuka izidindi zibheke phezulu. Abuphinde bumile utshani.” Ukhuluma aze ahline nasebusweni.

“Hhayi bo! Kanti unguphuma silwe?”

“Cha, kodwa uma impi isifikile, kuhlehla u-fish uphindele ekopini.”

Imethuse lento uMary. Akubone noRhino ukwethuka kwakhe.

“Mary, ngenza noma yini ukuvikela labo engibathandayo. Uma kufanele ngife, ngingafa. Hhayi ngoba nginodlame. Wena uma ungibona ubona uphuma silwe?”

Luthi damu uvalo kuMary.

“Cha bengibuza nje. Umuntu angeke uthi uyamazi. Ukuphendukela noma umazi. Umuntu owazi kangcono ngawe, uwena.”

***

Uthini umbono wakho: Ngabe uMary uzothamba anike uRhino ithuba ngenxa yalokhu okushiwo uLondi? Umngani angakwenza uthande umuntu okade ungamthandi?