Uyaphuma uMary esikhotheni.

“Hello!” umemeza ephendula ucingo.

“Sengidlula eMahhashini, ukuphi ubaba wakho?”

“Uphume waya ngalapho uqhamuka ngakhona. Phuthuma!”

Imoto iqhamuka ngesivinini, ime eduze kwaMary. Ungena phakathi ehefuzela. Lo mlisa ujikisa imoto, baqonde e-Richards Bay. URhino ufonela lo mngani wakhe, bakhulume isikhashana kodwa uMary angezwa ukuthi bathini. Akuzwayo ukuthi ubaba wakhe esefonele uRachel, wabuza ukuthi uhlala kuphi Rhino. Lushaya ngamandla uvalo kuMary, abheke emuva.

“Bhuti, nansiya imoto kababa iza ngejubane. Uma esifica uzosimisa!”

“Hawu sisi udlala uvalo nje, ngeke ahambe emisa zonke izimoto. Asingene ngalo mgwaqo ongena emajalidini ukuze ukhululeke.”

Ujika angene ngawo lomgwaqo. Isilapha emuva kwabo imoto kayise. Idlulisa okwendiza mshini, isithele. UMary usekhulekela ukuthi uyise angalinyazwa imoto. Ihamba igudla amajalidi imoto abakuyo oMary. Ihamba kancane ukuze bafike e-Aboretum ubaba wakhe esehambile.

Ubaba kaMary ufike waluchaza lonke udaba kugogo kaLondi. Ucishe wamlimaza uLondi. Babe sebemthatha bahamba naye ukuze ayokhomba kubo kwaRachel. URachel uyena-ke osezobakhombisa umuzi kaRhino. Kwayena usenkingeni. Uma abazali bakhe bengezwa ukuthi nguyena onikele ngoMary kulo malume mbumbulu, uzolutheza olunenkume.

Kukhala ucingo olusesandleni kuMary, lolu alinikwe nguRhino.

“Uright, Mary?” kubuza uRhino.

“Ngizoba right kanjani? Uyayibona inkinga osungifake kuyo, Rhino?”

“Ngiyaxolisa, ngicela wehlise umoya. Bekungesiyo inhloso yami uku…”

“Ngiyakuzonda Rhino! Uyezwa?”

“Hahaha! Kuzomele ungithande ngoba as from now on uzobe uhlala kwami”

Kuthi xhifi kuMary.

“Okunye Mary,” kuqhubeka uRhino, “Ngicele lowo mlisa ohamba naye akuyise lapho ehlala khona. Yena uzobe eseyolala e-Aboretum, emzini wami. Uzothi umuzi wakhe asanda kuwuthenga. Angifuni ubaba wakho akufice kwami ngoba uzokulimaza.”

“Mina ngizolala kuphi? Ukuphi umuzi wamngani wakho, Rhino?”

“UseBrackenhem.”

“Wena uzobuya nini?”

“Maduze.”

“Konje umaduze ulwesingaki? Uyangicabangela kahle Rhino?”

“O, kanti wena ufuna isiqu sami?” ubuza sakudlala, ehleka.

“Rhino, ngicela ube-serious. Angithi uyazi ukuthi ngiyafunda?”

“Ngiyakwazi lokho. Ukhathazeke ngokuthi uzozilanda kanjani izincwadi zakho?”

“Cha, kwakhona nje ukuya esikoleni ngiyasaba. What if ubaba esengivimbezela khona izwe libuka?”

“Cha, Mary, ngeke akwenze lokho ubaba wakho.”

“Uma engeke akwenze kungani engifuna phansi phezulu?”

“Ukhathazekile ngawe, akazi noma usayophinde akubone yini. Ilokho nje okusemqondweni wakhe.”

Ayibone ngamanye amehlo lento uMary.

“Uqinisile, Rhino. Kusho ukuthi kuzomele ngimufonele”

“Cha! Myeke okwamanje abohle. Uma ufona kusashisa kanje, uzokudinga usekhaya khona manje. Uzokulimaza ngoba usacasukile.”

Avale ucingo uMary, adonse umoya kakhulu. Lo mlisa oshayelayo uthule du. Bafike e-Brackenhem, ehle emotweni lo mlisa. UMary alandele, bangene ekhishini. Ame lo mlisa ebukisisa uMary.

“Ngingakwenzela ukudla?”

“Cha, ngikhathele. Ngicela indawo yokulala,” kusho uMary.

Akandi ngamagama lo mlisa. Baguduze endlini baze bayoma esicabheni selinye lamagumbi. Avule isicabha.

“Uzolala kuleli kamelo. Mina ngiyolala e-Aboretum,” kusho le nsizwa.

“Akekho omunye umuntu ohlala naye?” kubuza uMary.

“Ngihlala ngedwa.” Ubukeka ecasukile lo mlisa, ajikijele ukhiye phezu kwetafula, athi, “Nasi isikhiye.”

Uzwa ukuduma kwemoto, nokuvaleka kwesango, azibonele ukuthi usehambile lo mlisa. UMary uzijikijela embhedeni. Ingqondo ikhathele, inhliziyo iyabalisa.

Uzwa abantu behhomuzela, avuke. Sekumnyama kule ndlu. Kunezithunzana ezithi shape ewindini. Anyonyobe ayolunguza. Aphenye kancane ikhethini. Hawu! Abantu abagqoke amajazi amnyama. Bazimboze nobuso. Baphethe izibhamu ezinkulu, bazibhekise endlini. UMary uphuma egijima egumbini alele kulo, angene kwelinye. Nakhona aqonde ewindini, aphenye ikhethini. Kucace ukuthi umuzi bawuzungezile. Bamemeze ngombhobho.

“Sizobala sigcine ku-10. Uma ningaphumi sizophosa ibhomu. One!”

Ziya zehlela izinyembezi kuMary.

“Two!”

Aphume ayochaza? Kufike ukuthi akathandaze. Avale amehlo.

“Baba wethu ose…”

“Three!”

Awavule amehlo. Uvalo seludlala ngaye. Agijime aphindele egumbini abelele kulo.

“Four!”

Agijime aqonde ewindini, abone le ndoda ememezayo ikhanyiswe ilambu lasemgwaqeni.

‘Kuyoba kancane kungesizo izinkabi. Amaphoyisa ngeke agqoke kanje. Nkosi ngisize. Ngithembe wena.’ uMary ukhuluma ngenhliziyo.

“Seven!”

Uyakhumbula ukuthi ukhiye uphezu kwetafula. Kodwa uzowubona kanjani ebumnyameni?

“Ten!” Waliphakamisa ibhomu lomlisa.

UMary uzama ukuvula iwindi, alivuleki. Alijikijele ibhomu.

“Ningangibulaliiiii!”

Aphaphame uMary. Kuyakhanya endlini. Usejuluke umanzi te, izinyembezi ziyazehlela. Ulunguza ngewindi, angaboni muntu ngaphandle.

“Iphupho elibi kanje?” usho ezisula izinyembezi nomjuluko.

Ulale egqokile. Ugcine eziphonsa embhedeni wazumeka.

***

Uthini umbono wakho: Ngabe leli phupho likaMary kukhona elikubikayo?