UMaryJane uzumekile. Ulale ekhathele ngoba ufunde kwaze kwadlula kwelamabili.
“Sengiyahamba, Mary. Ungaduki, mntanami,” kusho uyise engaphandle kwesicabha segumbi likaMary.
“Hawu Baba! Ushukuthi sengingaduka ngimdala kangaka?” kubuza uMary elele embhedeni.
“Ngiyazincokolela, mntanami.”
Bayahleka bobabili.
“Kulungile, Baba. Ungangilanda ntambama. Uhambe kahle.”
“Imali yokugibela iphezu kwetafula. Uzilungiselele kusenesikhathi ngoba amatekisi awamaningi emini,” kusho ubaba kaMary ephuma eflethini.
Bahlala bobabili noyise. UMary usala ecabanga ngonina owashona esemncane – akamazi umama wakhe, umazi ezithombeni kuphela. Ngezinye izikhathi uyafisa ngabe unina usaphila ngoba umzwangedwa uyambulala.
Uvuka ageze, adle, aphumele ngaphandle ephuza inkomishi yekhofi. Kungena unyanyavu lwePorsche enamawindi amnyama. Kwehla iwindi lale moto, kuvele umshayeli. Anganaki uMary. Amqhwebe umshayeli. Kungenzeka ukuthi lo muntu udinga usizo.
Uzoya kulo mlisa kodwa uqala angene endlini abeke inkomishi. Ubeka inkomishi ebuka le moto ngewindi lase khishini. Nangu lo mlisa esondela.
Lo mlisa ugqoke kahle – isudi nehembe kubunsomi, uthayi nezicathulo kumnyama. Ngebala uyakhanya. Izibuko uzibeke ekhanda. Uhamba ehlafuna, enyathela ngesineke. Lo mlisa udlula ewindini, kungabe kusazwakala ukunyathela kwezicathulo zakhe, kucace ukuthi umile ngasesicabheni saseflethini lakwaMary.
UMary uzilungisa i-crop top, ezama ukuyinweba ukuze kufihleke isisu. Avule isicabha ngesinono. Akamuboni lo mlisa. Alunguze ngaphandle, amthole eceleni kwesicabha ehlikihla izandla.
“Sawubona, bhuti,” kusho uMary.”Yebo, sisters. Unjani?”
“Ngiyaphila. Ngabe udinga usizo?”
Amamatheke lo mlisa, atshekise ikhanda ebuka uMary. Ahlanganise izandla samuntu ethandaza, abuke isibhakabhaka. Aphinde abuke uMary. Naye uMary agcine esezibuka.
“Konje ungubani igama, Babygirl?”
“Awu?” uMary ushwaqa ubuso.
“Yini?”
“Cha, ukuthi ngizwa ungibiza ngoBabygirl. Akuzwakali kahle.”
“Ngiyaxolisa, ngijwayele ukubiza abantu besimame kanje. Ungubani igama, sisi?”
“NginguMaryJane.”
“Oh! Mina ungangibiza ngo…”
“Udinga usizo, bhuti wabantu?” kubuza uMary.
Akayithandi lento yokuma nalo mlisa. Kungenzeka omakhelwane batshele uyise ukuthi ungenisa amadoda. Kubukeka ngathi kwayena lo mlisa ubindwe yisidwa. Usathule, ubuka uMary.
“Ngicela uhambe manje, ngoba ngizoze ngingene enkingeni.”
“Ngicela unginike inombolo yakho.” Kusho lo mlisa.
“Angifuni!”
Uvala isicabha uMary, aye kusinki lapho agcine ebeke khona inkomishi. Abuke ngewindi, abone lo mlisa engena emotweni. Inyelele iyosithela emaflethini angemuva. Kusenjalo, kuthi shaphe ewindini. Nakanjani uMamgobhozi, umakhelwane wabo othanda izindaba zabantu, lo odlula ewindini.
“Mary!” uMamgobhozi umemeza engqongqoza.
“Ngiyeza, Ma,” kuphendula uMary.
UMary uvula isicabha.
“Cha, angingeni. Ngifuna ukwazi ukuthi manyala mani lawa owenzayo? Ugila mkhuba muni usemncane kangaka?”
“Sengenzeni, Ma?”
“Mary una-18 iminyaka. Usemncane kabi ukuthi ungajola phambi kwethu sithule sikubuke. Owaphi lo mlisa okade elana?”
“Nami angimazi, Ma.” Izinyembezi sezigcwele emehlweni kuMary.
“Uyazi ukuthi uyihlo ngeke ayithande lento oyenzayo?”
“Uzobe esezwe ngobani ubaba? Angithi ngikubeke kwacaca ukuthi angimazi?”
“Uthe ufunani?”
“Akashongo.”
“Uthe ungubani? Wakwabani?”
“Akashongo.”
“Kanti benixoxani njengoba ubemi lapha ishumi leminyaka?”
“Kodwa Mama?” abihlike uMary.
“Ngabe ubezokusabisa?” usexwayile umaMgobhozi.
“Ngishilo ukuthi angimazi! Ngimbuze igama, wangiziba! Ngambuza ukuthi ngingamsiza ngani, yena wacela inombolo yami. Ngavele ngavala isicabha. Manje ngizoyazi kanjani imininingwane yakhe? Noma ngimlandele ngiyombuza?” usememeza ngentukuthelo.
“Ngiyaxolisa, ngane yami. Abafana balapha e-Richards Bay sebeziqedile izingane zabantu. Okunye okungithusile ukubona lo mlisa eyongena kuleli flethi elingemuva. Kunuka santungwana kuleliya flethi. Uqaphele. Xola, mntanami.” usho emsula izinyembezi.
“Ucabanga ukuthi ubeze ngobubi lo muntu?” uMary usethukile.
“Angazi. Kungenzeka ukuthi ubezoshela kuphela. Kodwa lendlu angene kuyo inezimanga,” uMamgobhozi usekhuluma sakuhleba.
“Ngabe kudayiswa izidakamizwa?”
“Kungenzeka ngoba kuhlala abantu abahlukene. Abajwayelene namuntu. Ababingeleli benjalo. Akwaziwa nokuthi basebenza kuphi.”
Athule uMary, abuke uMamgobhozi.
“Nami angihambe, ngane yami. Ngizobuye ngikubone.”
“Uhambe kahle, Ma. Ngiyaxolisa ngendlela engikuphendule ngayo.”
“Hhayi, akunankinga. Yimina owenze iphutha ngakusola ngeze.”
“Ma!”
“Yebo.”
“Ngicela ubaba ungamtsheli ngalento. Ngisaba ukuthi uzongilwisa anganginiki nethuba lokuchaza.”
“Hhayi, ngeke ngikuqhathe noyihlo, Mary. Awusho, namhlanje awuyi esikoleni?”
“Sengizohamba. Ngingena ngo-12.”
“Ngizophonsa amehlo nami la endlini. Angaze abuye azogqekeza lo mlisa.”
***
Uthini umbono wakho: Le ndoda ifunani kuMary?