Motsaneng wo mongwe nagamagaeng go be go na le mošemane wa mengwaga ye lesomepedi yoo ba mmitšago Chaisha. Chaisha o be a dula le mmagwe yoo a bego a swerwe ke kankere ya lela. Le ge mmušo o be o agetše bahlaki ba go swana le lapa la boChaisha dintlo, batho ba moo ba be ba sa phela sekgale go iwa dikgonyeng le meetse a kgewa nokeng. Mediro ye ka moka e be e lebane Chaisha gobane mmagwe a šitišwa ke bolwetši.

Ka mehla Chaisha o be a re pele ga ge a ka kga meetse leribeng, a gokamela ka bodibeng go bogela sefahlego sa gagwe seo se bego se tla ikala godimo ga meetse gomme a thome go bolela ka hloišo a re: “Tate, tate … goreng o re lahlile? Ga ke na dieta tša sekolo. Ke hlabja ke mebetlwa.”

Tšatši le lengwe o rile go fetša go bolela bjalo, a re ge a inela pakete ka nokeng gore a kge meetse, a bona meetse ao a thoma go roromela ka modumo wa go šiiša. O rile ge a sa tlabegile moo, noka ya hlaboša lentšu le lekoto,

“Chaisha mošaa! O a nhlodia! Ga o bone gore ke ikhuditše, goreng o sa kge meetse wa sepela bjalo ka bangwe!?” Noka e ile ya realo ka go ngenega.

Chaisha o ile a tlolela morago, pakete ya gagwe ya relela gomme ya wela kgakala. O be a tloga a tšhogile. O ile a gadima ka mathoko e le ge a holofela gore mohlomongwe ga a noši, eupša a ikhwetša a dukologile ke lešoka la go se kwale selo ešita le tswiitswii ya nonyana.

“Batamela mo,” noka e ile ya laela Chaisha.

Mošemane o ile a se šuthe.

“Akere o rata go tseba tatago?”

Go mo tšere nakwana gore a amogele gore ke therešo go bolela bodiba bjoo. Ka ge e le mošemane yo bogale, o ile a boela ntlheng ya leriba ka go nanya.

“Akomela ka mo meetseng,” noka e ile ya mo laela.

Chaisha a phetha seo. Ka pela sefahlego sa gagwe sa phaphamala godimo ga meetse bjalo ka ge a hlwa a se boga.

“O re o lla ka eng, mošaa?”

“Re ya sokola ka mola gae,” Chaisha o ile a araba ka go hloiša. “Nkabe ke godile ke be ke tla nyaka mmereko ka thuša mma.”

“Haa!” Noka e ile ya kgotsa. Morago ya thoma go sega, meetse a roromela le go feta peleng.

Sebakeng sa gore a tšhoge, Chaisha a ikwa a tlala pelo.

“Goreng o ntshega mola ke go botša gore re ya sokola!?” Chaisha o be a sa rate ge go dirwa metlae ka tshokolo ya gabo.

“Ke a tshega gobane ga o hlokege gore o tsebe tatago pele o ka thuša ka gae.”

“Efela ke tla šoma bjang ke le ngwana?”

“Ga go nako ye botse ya go thoma go šoma go phala mola o le yo monnyane.” Karabo ye e ile ya tlaba Chaisha. “Lebelela botse.”

Chaisha o ile a lebelela ka hlokomelo. E rile ge a sa tomotše mahlo bjalo, semaka sa tšwelela. Sefahlego sa gagwe se ile sa thoma go šatoga ka gare ga meetse. A bona se tšea sebopego sa lesogana ebile se tlhoga maledu. Morago sefahlego sela sa iphetša, ya ba sa monna. Ka go tšhoga, Chaisha o ile a iphophola marama ge a bona sefahlego sa gagwe se aparetšwe ke maledu a masomaso, eupša diatla tša gagwe tša mmotša gore esale yena gomme a imologa.

“O tate ka bowena Chaisha. Motho ge a belegwa o fiwa maatla le bohlale bja go mo kgontšha dilo tše di ntši.” noka e ile ya mo tsebiša. “Sa gago ke gore o itshepe.”

Chaisha o tšamile a ipotšiša ge eba sefahlego seo a se bonego ka meetseng ke sa tatagwe yoo a sa mo tsebego. O be a sa kgotsa maele ao a a filwego ke noka a gore le bana ba ka kgona go fihlelela mediro yeo e dirwago ke bagolo. Eupša bjang? Chaisha o ile a ipotšiša, eupša a hloka karabo.

Noka e be e mmoditše gore seo o tla ikakanyetša ka bo yena. O be a na le bonnete bja gore maele a mohuta wo motho a ka se a hwetše ka sekolong. Le ge go le bjalo mantšu a noka a be a kukile moya wa gagwe, le pakete ya meetse a sa ekwe ge a ihlaganetše gae.

Re botše: Naa o dumelelana le seo noka e se boditšego Chaisha? Bana ba go lekana le Chaisa ba swanetše go šoma gore ba thuše batswadi ba bona go ba hlokomela?