Kuf’usisigebengu
Kuf’ulisela
Kuf’ulixelegu lexaxavitshi
Ulinuku lamanukunuku
Awunantloni
Awunalusizi
Awunambeko, kuba eyayikhona wayenz’umbeko
Uphila kanjani nesono esinje?
Ulala kanjani nesikizi nokukhohlakala okunje?
Nditsho wena ntw’esazela safa kudala saphosw’elwandle
Awunantliziyo, awunalusizi kusini na
Awukhathali zinyembezi zenkedama nabahlolo nabahlolokazi
Awubuv’ubuhlungu bezikhalo zethu
Wanela xakunini kanti
Uyingxwelerhil’imiz’emininzi
Ulilif’elimnyama elirhangq’ilizwe lonke
Uzaphul’intliziyo zethu wazixhokonxa
Wayijij’ingqondo de salahlekelwa kukuzazi
Akwaba ubungandiboleka oku kuka tatam noba yiveki ndimxelele ukuba ndiyamthanda futhi ndiyamkhumbula
Wandexutha iceph’emlonyeni waval’umnyango wochulumanco kum
Wandithathel’uthando lwam
Umsebenzi wakho uyawenza ndiyakuncoma
Ubukho bakho siyabuva futhi sanele
Ivaliw’imiz’emininzi nguwe
Bambi bambethwe yintlupheko nguwe
Kufa ulisel’elingasoze labotshwa nangamapolisa
Ukukhala, nokuncwin’akuncedi
Akukho mali nabutyebi bungabuyisa abasishiyayo kweli
Akukho ndawo yokubalekela xawufikile uyabhubhisa
Kwanele kwanele, nawe yid’uhluthe wanele
Hamb’ugoduke ukhathalisile
Akukho ukuguqela wena hamba
Imihla nezolo siyangcwaba nguwe
Imihla nezolo sifumana oo ‘lala ngoxolo’ mntakwethu, kanti kode kubenini?
Kwanele! Kwanele!