Usihloboke siphila
Soloko wayako,
Wakhamba amasolokohlo,
Wakhamba umlibalelafuthi,
Wakhamba iZuba likaNowa,
Wakhamba azange usacala nemuva,
Wakhamba akhange usabuya,
Wanqopha thwi! Phambili

Azange ujike ucale emuva,
Azange ujike ucabange bonyana usukeleni emva le,
Azange usicabange thina abentwabakho,
Azange ucabange bonyana usukele,
abentwabakho abahlanu boke abangasenaMma,
Azange ufune ukwazi wena.

Walibala tjhira tjhira ngathi,
Walibazwa bubuhle bedorobheni,
Walibazwa bumnandi bedorobheni,
Walibazwa buphaziphazi bedorobheni,
Walibazwa yigidigidi nesiphithiphithi bedorobheni,

Wafaka amawok’tlabhu njengoDumbana,
Wakhamba kwangathi bakufake udukanezwe,
Sesifana nabentwana abanganayise, sinaye
Sewufana nobaba onganabentwana, unabo
Sesifana neentandani,
Usiphendule iintandani ukhona usidla amabele.

Azange ucabange bonyana silala ngani,
Azange ucabange bonyana siqopha ngani,
Azange ucabange bonyana sigoma ini,
Azange ucabange bonyana siyiraga bunjani ifundo,
Azange ucabange bonyana siyiraga ngani ifundo,
yethu.

Azange kuthi thika nakancani kuwe,
Kuthini kuwe nawuhleziko na?
Ubuthongo buyehla ebusuku nawuleleko na?
Ukudla khona kuyangena nawugomako na?
Umtjhini wona uyakhamba nawuberegako na?
Ihlizwakho yona ithini na?
Ihlizwakho yona ikutjelani na?
Unembeza wakho yena uthini na?

Kubayini ungasezi uzosihlola?
Kubayini ungasasidoseli umrhala?
Kubayini ungasasitloleli incwadi?
Kubayini usiliselela sibentwabakho nje?
Kubayini usilisa sidose emhlweni ukhona udla amabele.

Kubayini usilisa sifinye ngelimu njengeKomo,
Ukhona udla amabele,
Kubayini usilisa sidla imbuya ngelithi,
Ukhona udla amabele,

Silila ebusuku nemini,
Silila inga sirhayiwe, iye sirhayiwe
Sirhayiwe yini? Nasingakarhaywa
Kusukelwa nguwe baba,
Iiminyembezi ayomi emihlathini yethu ngawe,
Iyageleza iba mitleleza yeminyembezi.
Kwamambala usihloboke siphila baba!