UBUNTOMBI BAM BUNDIPHATHELE INTSHABALALO.

Ubuntombi bam bundiphathele intshabalalo.
Ubuntombi bam bundiphathele impalalo.
Ubuntombi bam bundiphathele
Izivubeko.
Ubuntombi bam bundiphathele utyhobeko.

Senze ntoni na thina kulo mhlaba?
Senze ntoni na thina kweli lizwe?
Kubangasa thina siyahlukunyezwa.
Kubangasa thina sizizigculelo.
Kubangasa singamaxhoba okubethwa nokudlwengulwa.

Baphi na ootata noobhuti bokwenyani?
Baphi na abafundisi-ntsapho bokwenyani?
Aphi amagosa ezoluleko, kunye naba khonzi kule mihla?

Siphila kunye neengonyama kule mihla.
Siphila kunye nengcuka ezombethe ufele legusha.
Aku lulanga kunzima kubuhlungu,
Umzimba uzele izivubeko.
Intliziyo ibethela ukuma ngamaxhala.
Kunzima nokuya ngasese ngoba singamaxhoba ezidlwengu.

Siyintoni na kanti isono sethu kulo mhlaba?
Sele sisiya kwiziko lezemfundo asikhululekanga.
Sele siyokucela imisebenzi siyaxhatshazwa ngokwesondo.

Khaninqandeni babhali kunye neemvumi siyaphela.
Khanisilwele zinkokhele siyahlukumezeka.
Uphi na umthetho kweli lizwe ,
Uzokudlala indima yawo.

Iinkonde neenkondekazi ze’zwe lakowethu,
Mazisibonise indlela, hleze kuthi kanti kukho apho siyiphazama khona.
Kowu! Kukho amaxesha xa kuzakusa inga kungahlwa,
Xa kutshona ilanga inga ndinga bamba ilanga lingatshoni.
Kukho amaxesha apho inga ungathi vuleka mhlaba singene
Ngoba thina asibonelwa ntweni.

Ngaba obu buhlungu madoda kufuna sixhobo sini?
Siyaphela madoda oMzantsi Afrika nixoliswa njani na?
Kwashiyeka amaxhoba neenkedama nibuswa njani na?

Basizingela ngezikhali,
Aphi na awethu amathuba okuphila lento nisibulala sisaze ngobuso elizweni?
Kungcikiveke kwaye kuphalale igazi lo mntwana kabani ukuze kube kulungile?
Kusweleke okanye kungxwelehreke umntwana kabani ukuze isizwe sisilwele?
Xa umdlwengulayo yena ,igazi lakhe liyachitheka, alishiyi ntsikelelo nakanye .
Lishiya inzondo, unxunguphalo ,amashwa kunye
Nezishwabulo.
Lishiya iziqhuku, amaxhala nezishiqi ezikhwanqisayo, amaxhoba kunye noluntu luthe khamnqa.

Mela madoda
Mela bantwana bomgquba ngoku kwanele.
Nithi masiphile phi na thina?
Nithi masiye phi na thina?

Madoda sabelani
Madoda nqandani
Madoda sikhuseleni