Mhla mnene akhe akhalima namasele
“Makwedini! Makwedini! Makwedini!! Iyindlalo nje kuni kukufa kuthi,”
Iyindlalo nje kuni bayaphela abazali nemveku.
Zaphel’ Intsika zamakhaya kubi senzeni?
Zaphel’ indwalutho nezithwalandwe zoMzantsi Afrika siyintoni na isixhobo salo mbulalazwe.
Zaphel’ iiNkonde nemveku lamfilib’ ikamva
Zaphel’Intsika zamakhay’ zavalwa ngci izindlu akukho bantu.
Zaphel’ iimveku saf’ isizwe,
Kowu! Sihlangule ongendawo.
Ndiniqwalasele bantu bakowethu niphambuka endleleni,
Niwutyeshela umqulu nomgaqo-siseko ebekiweyo.
Ndibe ndiyaninqanda ngokunga nizinkomo,
Ndibe ndiyanilungisa suke nanditshika,
Ndibe ndiyanilumkisa suke nandigxelesha nanditsho ngamehlo azele inyembezi.
Ndibe ndiyanicebisa suke nandicekisa.
Ndibe ndiyaninceda nina nandimonela.
Buyisani unyawo kwizenzo zobukroti
Buyisani unyawo kwinto ezingakhiyo
Buyisani unyawo kubuxhaka-xhaka balemihla.
Buyani Mzantsi Afrika nibuyel’ ekhaya
Buyani zithwalandwe zakowethu nibuyele kubuntu bethu.
Kwintlungu esiphila phantsi kwayo,
Sinay’ umthetheleli yaye indlebe yakh’ ayikud’ ukub’ ingeva.
Nesosandla sakh’ asigadalala ukuba singakhululi.
Akalibali dinga njengoko sisib’ uyalibala.
Ubomi sisithokothoko senkungu,
Ngathi kusenyalas’ ilifa lesihlangu;
Isizwe sitywinwe umlomo sihleli;
Amakhaya ayantywizisa imihla nezolo,
Inxeba liyathuthumb’ alipholi kuba linzulu.
Isikhalo simem’ umncedi nomthetheleli,
Ngathi kusekud’ engqinibeni,
Kuba neloo chiza alikafiki lizokusihlangula.
Ithemba nempumelo zisentabeni
Phofu ke nelo themba alibulali nto nje liyadanisa,
Kukud’ eBhakubha makwedini,
Ngathi sotshonelwa ngamalanga kuphele namathemba sithokombisile
Owu! Yini Nkosi uthuleleni kusonakala nje.
Owu! Yini Nkosi usiqumbele kwisini na?
Owu! Yini Nkosi ngenelela ayaphela amakhaya kusala inkedama.
Nqanda Mzantsi Afrika singatshabalali.
Ngxe ngokuthetha de ndigabadele,
Ngxe ngokuthetha de ndophele,
Ndenziwa bubuhlungu bentliziyo
Ndenziwa kukujiya kwegazi.