Thabathel’ubom bethw’ezandleni zakho,
Thethelela,
Sifel’emanyaleni,
Usathan’usiphakel’ezandleni
Siginy’ubukrakra begazi ngenxa yokom’emiqaleni.
Bambi behlis’ezimb’ezihlel’ezifubeni.

Sihlangule,
Sosul’intongw’amehl’usivule,
Songul’ucwamb’ezingqondwen’usenze sikhule.
Silumle kummanz’akrakra aphathwa zibhotile.

Mdali womhlab’omdaka.
Mveli ngqanga,
Somadinga,
Mdali wokhokho bokhokho
Mdali wecamagu
Ndiyanqula,
Ndibik’ukugula kwembew’emnyama kuni nina baa laluk’ukuthula.
siyaphalala..

Qamata ngenelela
Mus’ukukusiyekela,
Sifundis’ukunyamezela,
Ukubulela, ukonela no kwamnkela.
Siyaphela,
Kukunyoluk’okufaniswa nokwamaphela,
ukungabinasazela, nokudelel’okushiy’abasizalayo benesingqala.
Ndiyacela.
Yizokusihlangul’ebugxwayibeni siyoyela

Mdali wezulu nomhlaba
Mbumbi weyam’inkaba
Ndikubiza nje ndiv’amev’ukuhlaba.
Ukudyevezel’okubangelwa yibhotil’enomkhaba.
Umnqa wokugoba kweenduku ziphantsi
Komgquba.