Mntanami yimin’ uyihlo
Ngiyaz’ angeke usangibona
Angithi bel’ ukufa kwanginqob’ usemncane
Wawuseneminyak’ emibili vo uzelwe
Lapho wawungazi lutho ngokwendula kweliphakade

Mntanami selokhu ngahamb’ angikaze ngacabang’ ukubuya
Namhlanje ngiyajabul’ ukhulile
Ukukhala kwakho ngokungikhumbula kuyimvul’ enginetha mihla namalanga
Noma ngifis’ ukuzisula lezo zinyembezi ngiyehluleka
Phel’ akuselula ukuthintana ngesenyam’ isandla

Mntanami ngiyaz’ unemibuzo ngokukushiya kwami
Angibanga yigwala nom’ isahluleki
Keph’ ukufa kwangifica ngibuthaka
Nezifiso zam’ ebenginazo ngawe zashabalala mhla ngihlulw’ ukuphila
Uze uqine mntanami ngiyaz’ uzokhula noma kunzima

Ungadikibal’ ukungibiza ngiyosabela
Nom’ ungeke wangibona ngelenyama kodwa ngelamathong’ uyongibona
Uyongibon’ uze umamatheke
Mntanami yaz’ ukuthi laph’ engikhona ngiyakuthanda
Wen’ uyisipho sami
Uyigugu lam’ uthando lwakho luyophila kimi noma sengingaphili kulowo mhlaba
Mntanami ngisiz’ uziphathe kahle