Vityooo! Vityoo! Ikhwelo lityala mzi kaNtu!
Phulaphulani ndiniphethel’indab’ezinambithekayo
Ngathi ndiyelama ngumbono wanamhlanje
Iliso liphandlwa lijongile kodwa hay’apa
Yimvuzemvuz’okwentyatyambo yehlobo
Uncumo luyaphuphum’okomlamb’uzele
Uyacondob’uchul’ukunyathel’okwelovane

Uyakhaziml’okweGuzu liphum’ekhasini
Uyayokozel’okwentyatyamb’ephezu komlambo
Uqum-qum’okwentonjan’iphum’ekhusini
Yimbelukaz’emanz’andonga
Ilizwi limyoli ngath’akanasono
Ungafung’uthi yimvekw’esesebeleni
Akutheth’izibilini zibizwa kwelemimoya
Kuphel’amatshamb’okwentak’iqhawulw’amaphiko
Igquthez’ indod ngathi yinj’ilahlwe ngumkhondo

Intomb’ithabath’igama layo ngentozamo
Iqokelelekil’inzwakaz’inesimilo
Indod’ingashiy’isibaya sibheth’umoya
Izikhuphe zonk’iinkomo zekhazi
Le nzwakaz’ivova kudabuk’umhlaba
X’ idlul’ebafaneni kunqumam’amakhwelo kucikoz’amayilo
Akunyathel’umhlab’uyashukuma
Ndithetha ngesicicibala!

Sisaphulambongo sentombi yakwaTshezi
Ngumafungwashe kaNyawz’uFak’uhlamba ngobende
Lizubulekazi kolusapho lakwaMpondo
Intlokw’inemincili ngob’iinkuzi ziyathontelana
Unyok’umentl’ukufun’esinaleni
Uth’ayingo mtshato liqhinga lentsokolo
Yintlungu nentluphek’akho thando
Ngentobek’uzikhanda ngenyhek’etyeni

Ndixel’amadod’ashiy’abafazi
Ashiy’iinyembezi zinqamlez’umbombo
Uhlukumez’olungapheliyo
Ukuf’okushiy’iinkedama
Isif’esingena sibulale
Amaduna makazihlol’achith’uhlol’ekhaya

Abadala bath’ingcwaba lentombi lisemzini
Abasemzini bayaneliseka nguwe
Ubuhle bakho buqaqambile
Ikhaya lith’uze waphul’uluthi
Uqhame njengo Mjel’umth’ophezu komlambo
Abasemzini bading’indlalifa
Silikhaya sikukhulula ngemaz’enkone
Uz’uxhwith’unxibis’usengel’abantwana
Ndlela ntle ungabikwa hlaba
Unyamezel’unganikezeli
Mathol’anyongande kudlelana!!!