Indal’ inqwelo mafutha
Indal’ inqwelo mafuth’ inezilimela
Ijiwuze nam indithwele ngaphakathi
Kwaband’ umzimba wathi ceke
Ndamanwel’ andihluth’ ingqondo
Ngumzuzu nje ndingenile yabhonga
Ngamendw’ enkab’ ehash’ indulukile
Yang’ ibisaz’ aph’ ibisiyakhona
Yaxhom’ ungqongqw’amavil’ abhabha
Kwaphel’ amathemba kwasal’ iingcingane
Ndawabon’ amazul’ evulekile
Endikhweb’ unyana womntw’ endibiza
Ndanga ndinganqwal’ akwavuma
Lakhamis’ ingcwaba lindikhomb’ ezantsi
Wakhung’ umdal’ engavumi ngam
Ngezika sibi ndibhungcile
Ngezika sibi ndasinda
Esithokothokweni sobumnyama
Inqwelo mafuth’ indifun’ undikho
Indithum’ ityhin’ iphi kweleenkonde
Ndehla kuyw’ ingqondw’ ingasebenzi
Ndehla kuyw’ amadolw’ enengevane
Ndehla kuyw’ umzimb’ udubekile
Ndehla kuyw’ amehlw’ emnyama thsu
Ndehla kuyw’ iindlebe zivaleke ngcii
Hloniphan’ inqwelo mafuth’ indala
Hloniphan’ inqwelo mafuth’ inobungozi
Hloniphan’ inqwelo mafuth’ ayiqhelwa
Hloniphan’ inqwelo mafuth’ ayaziwa
Ndisinde cebetshu madoda!