Ndisadidekile ndisakhwankqisiwe.
Litshone emini ilanga ukufika
Kwakho bhubhani ndini wesifo ‘Corona’.
Ndisakhedamile ndiphatha ndiyeka.
Amanzi angene endlini.
Izicwangciso zalonyaka zime ngxi.
Ndiswele impiko zokubhabha.

Ndiyinkukhu esikwe umlomo.
Andinamva andinamphambili.
Ukumiswa kwentshukumo
Kusishiye noxinzelelo lwengqondo.
Intliziyo ibethela ukuma.
Ubuthongo abusehli.
Abezopolitiko bamaphikana banyuka
Besihla bezama ukunqanda lomanzi
Angene endlini kodwa isimo sibongamele.

Abomzi wezempilo uvalo luyangongoza
ngulo nalo unexhala lokuba ngubani ozolandela.
Libekiwe izembe komncinci nakomdala.
Uluntu lwakuthi lubolekisana ngencwina ezibhedlele.
Ulonwabo lusuke lwayintsomi.
Ubumnandi sebuyimbali.

Kuzizijwili kumzi woMzantsi Afrika
Amanzi angene endlini.
Kwezoqoqosho kunuka indlala yodwa.
Iphango lokumiswa kwentshukumo lusixheshe ngamandla.
Ukufa kusuke kwanguqhelekile.
Idolo lakho Covid 19 lihleli entanyeni.
Sikhale zoma sizithuthuzela ngelithi kuzolunga,
Kodwa kuzolunga sivile silahlekelwe.