[KungoLwesihlanu uSizwe ufika kubahlobo bakhe uS’busiso kunye no Lindile. Ufika behleli ngaphantsi komthi njengesiqhelo.]
S’busiso: Sizwe ubukeka ungatyhilekanga namhlanje ingaba ikhona into ekukhathazayo?
Lindile: Ukuba ikho into ekukhathazayo thetha mhlawumbi singanceda.
[USizwe ekhwankqisekile kukuva lamagama ephuma ku Lindile no S’busiso.]
Sizwe: Akukho nto ingako. Ndikhathazwa nje kukuphelelwa kuka mama ngumsebenzi, andiyazi ukuba ndizakuzithenga ngantoni izixhobo zezibalo esizakuzisebenzisa eklasini ka titshal’uNgema, ebethe wonke umntu ngoMvulo abe unazo.
[Athule okomzuzwana.]
Sizwe: Andiyazi nyhani.
[US’busiso ajonge uLindile ancume.]
S’busiso: Ngelixesha besisithi sincede ngokusithengisela eNew Section besinceda wena. Ukuba ubungakhange wale ngowungenaxhala ngoku.
Sizwe: Bendinixelele ukuba andisoze ndithengise ziyobisi mna!
[Aphakame kwindawo ebebehleli kuyo abashiye.]
[uSizwe ngolusuku akhange aye kwithala lencwadi njengoko aqhele ukwenza. Wahlala endlini. ]
Nokhanyo: Kutheni namhlanje awunamsebenzi wesikolo?
Sizwe: Utsho kuba kutheni mama?
Nokhanyo: Kaloku udla ngokufika nje ubeke incwadi uyokwenza umsebenzi wakho wesikolo.
Sizwe: Namhlanje akhange sinikwe msebenzi. Enye into endiyilibalayo, ebethe utitshala zesize ne Mathematic Instrument.
Nokhanyo: Yinto ibixelwe nini leyo?
Sizwe: Siyixelelwe izolo.
Nokhanyo: Kutheni ikungona ndiyivayo mna? Kuba imali ebendinayo ndiyisebenzisele enye ingxaki.
Sizwe: Mama ndisaya eWhite Park kubahlobo bam.
Nokhanyo: Ulijongile phofu ixesha ngoku ufuna ukuya eWhite Park. Futhi usuke wathi phithi yile White Park, yintoni le ingaka eWhite Park?
Sizwe: Abahlobo bam bahlala khona.
Nokhanyo: Ndandithe kuwe yahlukana ne White Park, la ndawo iyingozi kakhulu.
Sizwe: Ndiyakuthembisa mama ndizakubuya kwangethuba.
[Aphume uSizwe aye kudibana nabahlobo bakhe uLindile no S’busiso eWhite Park. Afike behleli kwa Abdullah, enye yevenkile zabantu bangaphandle ese White Park.]
S’busiso: Ey Mr.Siz, usithande ngantoni na namhlanje?
Sizwe: Lento kutheni?
Sbusiso: Awuzange kaloku uke usindwendwele apha eWhite Park.
Sizwe: Hayi, akukho nto. Ndithe nje mandize kunibona.
Lindile: Ingathi awuzanga nje ngozokusibona, thetha mfondini yintoni le ufuna sikuncede ngayo?
[USizwe adukise atshintshe incoko.]
Sizwe: Majita bekunjani esikolweni?
Lindile: Mfondini sutshintsh’incoko, thetha lent’uzengayo.
Sizwe: Eish andiyazi ukuba mandiqale ngaphi.
S’busiso: Qal’ek’qaleni.
Sizwe: Into endibeka apha ndifuna nindiboleke imali ndizakutheng’izinto zam zesikolo.
S’busiso: Ndisatsho nangoku, ukuba nje wena ungavuma ukusithengisela eNew Section, awusoze udinge mali yokuthenga izinto ezifunwa esikolweni. Kodwa andithethi lonto, sizakuboleka le mali uyifunayo. Ingaba yimalini le uza kuyidinga?
Sizwe: Xa iyonke yi R200. Iquka nemali yokuthenga ubhaka omtsha.
S’busiso: Imali esinayo yi R100, kodwa enye singayoyithatha ku Ta-Sox.
Sizwe: Ngubani uTa-Sox?
S’busiso: Ngulobhuti simthengiselayo.
Sizwe: Nani kanti niqashiwe? Phofu akukho ngxaki ndizakuyithatha ngomso.
[Kwabe sele kusiwa ubamnyama.]
S’busiso: Akukudanga kwa Ta-Sox, sokukhawuleza masambeni.
Sizwe: Ndizakuza ngomso kuba uyabona ngoku sekurhatyela. Bendithembisile endlini ukuba ndizakubuya kwangethuba.
S’busiso: Kusekusasa nje, akusekho mntu ongangawe ongena endlini ngelixesha, phofu akukho ngxaki noba ungaza nini inye qha into endiyaziyo imali ayizulinda wena.
Sizwe: Akukho ngxaki masambeni ke siye kulo Ta-Sox wenu.
[Bahambe baye kwa Ta-Sox.]
Ta-Sox: Bafana nindiphathele ntoni namhlanje?
Lindile: Ta-Sox size netshomi yethu apha, uSizwe, ufuna imali engange R200 ufuna ukuthenga izinto zesikolo.
Ta-Sox: Uzakuyihlawula ngantoni imali engako? Nimxelele phofu ukuba eyam imali iyazala?
Sizwe: (ebuza ngokukhawuleza) Izala malini?
Ta-Sox: I R50 izala i R25 ngeveki.
Sizwe:(othukile) I- R25 ngeveki! Ndiyaxolisa mna andizukwazi ukuyihlawula imali engako.
Ta-Sox: Akukho ngxaki ikhona enye indlela onokundihlawula ngayo ukuba nje ungandithengisela nje ezi zinto (atsho emnika isingxobo esineziyobisi).
Ta-Sox: Nantsi nalemali ubuze kuyifuna.
[USizwe ayithathe kunye nesingxobo eso.]
Ta-Sox: Ungakhathazeki, uS’bu noLee bazakufundisa yonk’into ekufanele uyazile.
Sizwe: S’bu, ndizakunibona ngomso.
[Abashiye uSizwe aye kowabo.]
Ufika unina, uNokhanyo, sele evutha ngumsindo kuba ebemyalele ukuba abuye lingekatshon’ilanga.]
Nokhanyo: (enomsindo) Sizwe, benditheni ukumka kwakho apha?
Sizwe: Ubuthe ndibuye lingekatshoni ilanga; lithi litshona ndibe sendisendlini.
Nokhanyo: Ngubani ngoku ixesha?
Sizwe: Ndicel’uxolo mama andisokuze ndiphinde.
Nokhanyo: Sizwe ukususela namhlanje andifuni kuphinda ndikuve usithi uya eWhite Park, siyavana?
Sizwe: Ewe mama.
[Ahambe uSizwe ayongena kwigumbi lakhe lokulala. Akuvuka ekuseni, bekumele edibene no S’busiso kunye noLindile. Bathe bevuka kowabo wabe uSizwe sele emkile.]
Nokhanyo: Inokuba uvuke wayaphi uSizwe kuba ayifani naye into yokuvele ahambe nje engaxelanga.
Sisipho: Uthi akayanga kwezitshomi zakhe zase White Park, kuba oko athe watshomana nazo akasenguye la Sizwe simaziyo; ezitshomi zakhe zimtshintshe ingqondo.
Nokhanyo: Kuyafuneka ke ndithethe naye ngemfundiso zetshomi ukuba ekupheleni kosuku zijika zibeyincindi yekhala.
Sisipho: Phofu ubuye nini phezolo?
Nokhanyo: Ubuye ebusuku, into angaqhelang’oyenza phofu.
[Besathetha njalo angene uSizwe sele engxamile, ezokuthatha isingxobo ebesifumene ngezolo ku Ta-Sox.]
Nokhanyo: Yintoni wangena ngathi uyaleqwa?
Sizwe: Ikhona into endiyilibeleyo mama.
[Atsho angqale nqo kwigumbi lakhe lokulala, akhuphe isingxobo eso ngaphantsi kwebhedi aphinde aphume ngokukhawuleza.]
Nokhanyo: Yintoni le ingaka ikwesasingxobo?
Sisipho: Inokuba zizinto zesikolo mama.
Nokhanyo: Xa izizinto zesikolo yintoni lento zifihlwayo?
Sisipho: Ey, nam andazi ke mama.
Nokhanyo: Sisipho mntanam, khawuthi ndiye kuMaNyawuza ,mhlawumbi anganalo icebo ndizokunithengela ezi zinto zenu zesikolo.
[Aphume aye kwa MaNyawuza.]
MaNyawuza: (ephendula unkqo, emnyango) Ngaphakathi! Kanti nguwe Nokhanyo.
Nokhanyo: Ewe Nyawuza ndim.
MaNyawuza: Uphilile phofu?
Nokhanyo: Ndiyaphila akhonto, unjani wena?
MaNyawuza: Nam ndiyaphila; oko sigqibelene akukabikho zintsha. Ingaba isithande ngantoni namhlanje awuleqwa phofu?
Nokhanyo: MaNyawuza ndibekwa ngumcimbi wemali. Abantwana bakhala ngezinto zesikolo, andikafumani nezosentana zam emsebenzini, bendinethemba ukuba ungandibole nokuba yi R300.
MaNyawuza: Ey ntombi, ufike kakubi ke namhlanje mntasekhaya, ndingumph’ochutyiweyo ndikulendawo ndikuyo.
Nokhanyo: Inokuba ndizakuyifumana phi kengoku le mali! Andibaqhelanga nabantu balapha e New Section, akukho nomntu omaziyo na obolekisa ngezalayo?
MaNyawuza: Ukhona umfana ohlala eWhite Park, kuthwa nguSonwabile, kuthwa uyabolekisa ngemali ezalayo. Ndinokusa kuye nangoku.
[Aphume uNokhanyo ekhatshwa ngu MaNyawuza besiya e White park kwa Sonwabile odume ngelika Ta-Sox, beyokubolela imali ezalayo. Xa befika kwa Ta-Sox bafika sele kumzuzu u Sizwe ephumile. Emveni kwethutyana u Nokhanyo uphele evumelana no Ta-Sox ngenzala.]
Nokhanyo: (ebulela xa begoduka) Enkosi kakhulu MaNyawuza, undincedile. Bendabayintoni ngaphandle kwakho!
[USizwe ufika kowabo sele enikwa imali ngumama wakhe yokuba ayokuthenga zonke izinto ezifunwa esikolweni.]
Nokhanyo: Ndizame kwade kwazameka. Thatha nants’imali uyozithengela zonke ezi zinto ubusithi ziyafunwa esikolweni.
[Atsho eyikhupha esipajini emnika.]
Sizwe: Enkosi kakhulu mama.
***
Ncokola: Ukuba ungazibona usekoneni ungawophula umthetho uthengise iziyobisi? Xhasa impendulo yakho.