(Emva kwenyanga ezintathu.)
Nothando: (Engena kwaNorah) Ndiyagqitha nje wethu.
Norah: Heke uncede wafika, umyeni kaLettie ungcono kakhulu, kangang’uba ugqirha ugqibe kwelokuba amgcine esibhedlele okwethutyana.
Nothando: Zabamnandi ezondaba, nam andilelanga kakuhle phezolo, isifuba esi ingathi siyavaleka, ndinayo nento ebusiyezi.
Norah: Kuzakufuneka udibane nogqirha.
Nothando: (Ngelizwi eliphantsi) Ndiyayiqonda lo nto kodwa bendisalinde unyan’am, ebethembise uba uzakundizisela imali kuleveki iphelileyo ndikwazi ukubhatala amatyala asecaweni, ndithenge ne grocer, noko selilide elithuba.
Norah: UMbulelo ngumntwana ohloniphayo, umkhulise kakuhle, ndicinguba uzakubuyela kuwe, mhlambi usabethwa zingxakana nje ezincinci.
Nothando: Ndiyakuva, kuba nje akufani naye ukuthula nje.
Norah: Ugqibele nini ukutsalela umnxeba?
Nothando: Sekunethuba, kulenyanga iphelileyo.
Norah: Ukhe wamthumelela noba ngumyalezo ngefowuni mhlawumbi?
Nothando: Ewe kaninzi, kangangokuba andisenamizuzu.
Norah: Masithembe uyakufowuna.
Nothando: Ndicinga ukuncamela eClinic namhlanje kuba ndingenamali kagqirha.
Norah: Ewe iya ngoku, ndizakuzojikela pha ngokuhlwa xandithekelela uba ubuyile.
(UNothando selebuyile e-clinic, undwendwelwa nguNorah kwakhe)
Lettie: Tyhini ukhawulezile ntokazi, ndikubona usithi tshe ndathi mandizovela.
Nothando: Yhuu, ndidinwe ndiyimfe, umngcelele ongako, akhonto indibulele njengokwakutshitshiliza kwezazitulo. Kuthwe ipresha yegazi yam iphantsi kakhulu, nobushushu into ezingamandla.
Norah: Kuzakufuneka uphumle, kuye kuthwe xa iphantsi ipresha iyingozi umntu angawa. Akhona amayeza owanikiweyo phofu, kungekho luhoyo kangaka kula clinic.
Nothando: Ndinikwe iPanado kuphela, kuzakufuneka ndipheke, bathe ndingaseli ipilisi ndingatyanga.
Norah: Ndizakuza nerhewu kwam okwangoku, pha ngokuhlwa ndawuthi xandigqibile ukupheka isidlo sangokuhlwa ndikuzisele. Wena ngqengqa.
Nothando: Ndigqibezele iswekile nesonka ebendinaso kuleveki iphelileyo, ikhona i-flour ekhoyo ndakuthi xandifumene amandla ndixovule ndibhake pha phandle.
Norah: Hayi ungazihluphi, ndizakuza neswekile nesonka ndinazo, ndiyabuya, ungemi ngenyawo ndingekho.
(UMbulelo uphume nesinqandamathe sakhe uPortia bayokutya kwi restaurant ephezulu.)
Waiter: Table for two?
Mbulelo: Ewe ndihamba nalosisi.
(I waiter ibanika i-menu.)
Mbulelo: (Ethetha noPortia) Intle le ndawo ndiyayithanda.
Portia: Kakhulu sithandwa sam yho.
Waiter: Ndizanipha ixesha elaneleyo nikhethe ukutya enikufunayo.
Mbulelo: Sure boss.
(Kukhale imfonomfono.)
Portia: Ngumama wam ithi ndimphendule. Hello! Haybo… bendimshiye eright nje….eh…isephezulu…ohk gran… bye.
Mbulelo: Sithandwa sam, yintoni? Ingathi wothukile nje.
Portia: Ibingumakhulu uthi bayafika endlini basuka esibhedlele, andithi umama une high blood pressure, so bathi inyukile bebembalekisele khona.
Mbulelo: Ngoku ubungafuni ndikubalekisele khona ngokukhawuleza?
Portia: Hayi uzandisa emva kwethutyana, noko ayisosigulo sitsha kodwa ndingathanda ukubanaye emva kweyure nje. Unomakhulu okwangoku.
Mbulelo: Hayke uba utsho, kodwa ungathandabuzi xa ufuna uncedo lwam, mna ndikhona nanini, ndingakwenzela noba yintoni, nemoto ikhona.
Portia: Ndicinguba ndizakudinga imali, uyazi ukuhlala nomntu ogulayo kufuneka le nale, ukuqesha imoto kuyabiza.
Mbulelo: Ndikhona nje, uqesha njani imoto. Uzakudinga malini phofu?
Portia: Ungakwazi ukundongeza nge R3000?
Mbulelo: (Ekhupha isipaji sakhe emnika) Ja, ikhona, nantsi.
Portia: Ndiyabulela wethu, nomama wam unethamsanqa ngawe.
(Norah engena kwa Nothando.)
Norah: Uhleli elangeni akuwoyiki umkhuhlane?
Nothando: Kuyabanda endlini, sowundingenile wethu lomkhuhlane.
Norah: Ude wakutsalela umnxeba unyana?
Nothando: Ewe ufake umyalezo phezolo, uthe uyakufowuna namhlanje ngoba akakamkeli, ndiyabona wena iyasokolisa ngokubhatala le ndawo akuyo.
Norah: Ndivuyel’uba ede waphendula, kodwa ndikhona xa ufuna uncedo.
Nothando: Ndiyabulela wethu uThixo akwandisele intsuku zokuphila, ululutho kum.
Norah: Ndikuthengele i-airtime, nantsi, ndizakuphinde ndibuye ngokuhlwa.
(Emva kwemini, kukhala ifowuni.)
Nothando: Hello mntwanam, wanceda wafowuna, sendiphelelwe yinto yonke akhosepha, akhokutya, andisakhanyisi umbane omncinci ubushiyekile uphele phezolo.
Mbulelo: Mama ndisazamana nemali ne, andikulibelanga, ndivela kutshintsa amavili emoto nefestile.
Nothando: Ndishiyeke namaqebengwana ebendiwaziselwe nguNorah izolo.
Mbulelo: Yhoo mama ubhetele unawo namaqebengwana, mna ndinzinyelwe ngapha. Injani impilo phofu?
Nothando: Ayintlanga kwaphela andiphilanga, ndithandwa yincilikithi mva nje.
Mbulelo: Inoba si-stress sokhula mama, ndiphelelwa yi-airtime, ndizakuzama late, bye bye.
(Ebusuku, uSnap akhonkothe.)
Nothando: Hayi Snap ngubani na lo umgxoga kangaka?
Sipho: (Engena ngomva) Ndim ma, Snap, Snap, hayi ndiyabona indilibele le nja, andithi andisekho mninzi apha.
Nothando: Ndiyabona.
Sipho: Phofu uzakubuya nini yena uMbu?
Nothando: Andiqinisekanga.
Sipho: Andihlelanga ndizis’umphanga, kuthwa mandizoxela utat’uThemba uswelekile.
Nothando: (Esothuka) Hayi, yinto yanini leyo?
Sipho: Uswelekele eFrere ngalenjikalanga.
Nothando: UThixo umkhulule, akhonto makaphumle. Uyakumxelela ke uLettie ngomso ndivukela eCecilia Makiwane, ndinento enesiyezi maan mntwan’am, ndawuthi ke xandibuya ndifikele khona.
Sipho: Ndivile, ndimkile.
Nothando: Mandikukhuphe le nja isuke yakhohlakala.
Sipho: Hayi hayi ndizakuzihambela, suka u-Snap ube wayintoni.
Yitsho: Ucinga nton ngoMbulelo nophisa kwakhe ngemali kodwa umama wakhe uyasokola endlini?