(Ekuseni kwaNothando.)
Mbulelo: (Unxibe ipijamas uvula umnyango wegumbi lakhe, esiya kwelika mama wakhe, ufika anqkonqkoze) Mama usalele?
Nothando: (Uvuka ebuthongweni ezolula) Mmmmmmmmh.
Mbulelo: (Evula umnyango, engena) Ulibonil’ixesha?
Nothando: (Esothuka) Ixesha?
Mbulelo:Ixesha ngu 7:00am kusile.
Nothando: (Etsiba phezu kwebhedi esohlika) Yhu nkosi yam, seyingu 7:00am
Mbulelo: Uselwe.
Nothando: (Esondlula ibhedi) Andiyikholelwa noko kele ndisezakupheka nesidudu, inoba ulambe.
Mbulelo:Ndingavuya gqitha mama, (Esitsho esiyokuphuma emnyango) ithi ndikhabe ndiyobek’amamzi ngeketile ngalomzuzu. (Avale umnyango).
Nothando: (Ezithethela ejonga ixesha kwi watch esecaleni kwebhedi) Zileqa 7:10 nyani (Ezithethela ephuma egumbini xa efika ekitchen, ubona uMbulelo esela amanzi esinkini.) Oh mntanam ndiyazi ulambe isisu siplati.
Mbulelo: (Ephethe iglass yamanzi esela) Yho mama itsh’uphinde futhi kodwa ndiyayazi usisikhwaba khwitsho nanga namanzi etsholoza.
Nothando: (Esenza isidudu) Inoba ubuthe nkqa kungade kutsho knock egumbini lakho ngalentseni.
Mbulelo: (Ehlekela phantsi) Ewe yhu kaloku sendiqhele okokuthefiswa ndivuswa ngesidudu esishushu qho.
Nothando: (Ehleka) Hay’suka uyazibaxa kanene izinto, kaloku nguwe kuphela umntana endinaye, ndijonge lukhulu kuwe, ndenza yonke lento kuba ndizakunakekelwa nguwe xasendikhulile.
Mbulelo: Uk’babusazi, uSipho undigezela qho ke ngalonto… xasesihleli namajita.
Nothando: Uyawathini uSipho igeza?
Mbulelo: Uthi ndizaba yimofi ndiziselwa ukutya nge-tray.
Nothando: (Ehleka) Wuwo! uSipho umfuzile uyise kanene, ayonyani leyo ngumntu we-jokes lowo futhi akanalanga litheni, akufun’uthathelwa ngqalelo.
Mbulelo: Hayi kodwa Jwarhakazi, noba sekusithwani, utata wabhatyaza ngokutshata omnye umfazi endaweni yakho, umntu okhuthele njengawe kodwa andikhalazi ndivuyelwa ukulizwa ngomama onjengawe.
Nothando: (Encumile) Wasithatha isigqibo sakhe, ayikho into esingayenza. Ebeyindoda enentlonipho, ethozamile, ethobekile nje ngawe, ehlakaniphile ke.
Mbulelo: (Watsho ngoncumo olukhulu) Utsho namama?
Nothando: Ewe tshi umfuzile uyihlo ngokuthobeka.
Mbulelo: Hayke xa usitsho, Ibattery yefowuni yam inoba igcwele, ithi ndiyoyijonga (Esiya e dining room).
Mbulelo: (Ahlale phezu kwesofa, avule idata, kungene imvula yemiyalezo “messages” ezithethela) I wonder yeyiphi le-company ine vacancies ezingaka? Cargo Motor Repairs e-Beacon Bay, tyhini ikwalapha eMonti moss le ndawo. (Ekhwaza) Mama khazobona.
Nothando: Ndizobona ntoni?
Mbulelo: Usakhumbula mos ndisithi ndizama ispan?
Nothando: Ewe ndiyakhumbula.
Mbulelo: Bendizawucela imali yokukhwela, zizithuba eziphume kwa-Cargo Motor Repair ezi apha eBeacon Bay, kunjalonje ziphelelwa namhlanje emva kwemini, bendifuna ukuyofaka i-CV yam, mhlambi ndingabanethamsanqa lokubizwa.
Nothando: Oh sana lwam uyazi ndingakwenzela nantoni, ukuphela komntana endinayo futhi ndifuna uphumelele ukwazi ukuzimela.
Mbulelo: Indaba ezimnandi zezokuba i-Cargo le yenye yenkampani ezibhatala kakuhle apha eMzantsi, ukuba into zingahamba kakuhle singaphuma ezintwaleni. Noko ndiyayazi uba lemali uyifumanayo yezingxungxo zentsukwana yokucoca izindlu ayoneli.
Nothando: Kwaze kwabamnandi ukuva amazwi amnandi kangaka aphuma kuwe, sowukhulile, kukho lantetho yamaXhosa ithi “Themba mqala uzakuginya” ndinelo Themba kenam.
Mbulelo: (Encumile) Utshona mama?
Nothando: Waze wamhle xa umcuma uzibonile phofu.
Mbulelo: Oh suka mama ithi uyandithanda nje qha.
Nothando: (Esiya egumbini lakhe) ndisay’okukhangelela imali, ndiyabuya.
Nothando: (Ebuya egumbini lakhe) Ithi ndiye kuNorah ndiyoboleka iR15 ayizokonela lemali.
Mbulelo: I R30 iyakwanela ukukhwela itrain esuka apha eScenary Park eya edolophini.
(Aphume uNothando.)
Yitsho: Ucinga ntoni ngobudlelwane bukaNothando nonyana wakhe uMbulelo?