Ingoho Vhavenḓa vha ri mutuka wa haya ha vhifhi. Izwo ndi zwi amba musi ṅwana wa muṱambaṱuwa a penyaho sa naledzi a tshi nangelwa munna a sa mu funi vhe vha tshi amba vhe ndi mulayo, maitele na nḓila ya u ṱhonifha vhahulwane.

Nangoho vhasidzana vha vhingwa vho vhingwa,vhana vha ḓi bebwa, ha pfi ene Musiki o ri ri bebe ri edze muṱavha wa lwanzhe. Afho hu hone maduna o ḓiwesa maanḓa tshoṱhe. Musanda vhaṱanuni vha ḓi dzula vha vhuya vha nga vha sa ḓadza bisi. Afho hu hone vhahulwane vha tshi ri muhali vho fara yone-yone nḓila.

Saizwo zwiambi zwo ḓi amba zwa ri vhu tshi ḓa a vhu khokhonyi ingoho vho mbo ḓiwesa maanḓa ha vhuya ha swika na pfamoni, shangoni ha anda zwi ofhisaho. Zwe zwa itwa nga uḽa muṱanuni wa u fhedzisela ndi zwihulu, hu vho pfala uri ndi ene o hovhelaho vhulwadze pfamoni. Izwi ndi izwo, ḽinwe ḓuvha a si ene, ndi muṅwe-vho kana mavu vhone vhane.

Vhomaine vha dzi tungula lwa paḓa luṱanu na luthihi vha tshi ḓi ri a thi vhoni tshi laho Muhali.Vha pfuka milambo na dzithavha vha tshi ḓi ri ri yo pfa tshi ḽaho mavu ngeno hoṱhe hune vha kanda hone hu tshi bvuma fhungo ḽithihi, ḽa uri a hu vhonali tshi ḽaho Muhali.

Saizwi hu vhaṋe vha mavu vhane vha khou senga na vhadzimu vhomaine na vhaphorofita vha shakuliswa hu tshi pfi a vha na mushumo. Mativha a ḓi vhuya a xa; ha sala hu si na o no ḓivha tsho ḽaho Musanda.

Vhaḓivhi vha vhidzwa saizwi i Muhali vho walaho mavu nga khana, vhakalaha vha ri ri ṱoḓa u ḓivha tsho ḽaho mufu. Ngeno ndingo dzi tshi sumbedza uri ndi tshone tshitshili itshi tshi sa ṱhonifhiho na pfamo ya musanda. U tou pfala izwo,vhathu vho ḓo thoma u ita ndingo dza u ṱola arali vho no kavhiwa nga tshitshili tsha HIV, u itela uri vha kone u dzhia dzilafho, vha lalame.

U tou bva tsha tshetsho khosi yo tevhelaho a yo ngo tsha vhinga vhathu vha fhiraho muthihi saizwo zwi tshi ita uri musanda na vhatununi vha vhe kha khonadzeo nnzhi ya u kavhiwa nga tshitshili tshine vha tshi phaḓaladza pfamoni yoṱhe. Ingoho shango ḽa Edeni ḽo ṱolwa ḽothe, vhe vha waniwa vha na tshitshili vha newa khantselini, vha ralo u thoma u dzhia dzilafho ḽa ARV.

***