Agaa! Ngwana kgeswa la borare, fera seseka ke go nyetlele kgodu yeo e tswago lerotseng mabapi le kanegelo kopana yeo e lego se bone thola boreledi. Ka nnete thlokwana la tsela ntshebele motho o sebelwa ke wabo.

Ka dinako tše dingwe mo bophelong go bohlokwa go se hlatholle motho ka seemo sa gagwe sa ka ntle, gola o sa tsebe seemo sa gagwe sa ka gare. Ka nnete se bone thola boreledi teng ga yona go a baba.

Kgale kgale mo motsaneng wa Ga-Rakgoatha go la Zebediela profenseng ya Limpopo go kile gwa ba le mošemanyana yo mongwe yo bohlale, yoo a bego a na le toro ya goba mootledi wa difofane ka le lengwe la matšatši. Yena o be a tšwa Bonolo.

Bonolo o be a dula ka lapeng la go topa tša fase, la go hloka pudi ya leleme le letala. Taba yeo e be e sa mo sware gabotse, ka ge motho mang le mang mo setšhabeng o be a sa nyake go dula le yena goba go ba mogwera wa gagwe ka lebaka le o la go hloka pudi ya leleme le letala.

Sekolong Bonolo e be e le mošemanyana wa go hlompha barutiši le barutišigadi, le gona a dira mešomo ya gagwe ya sekolo ka bothakga. Bonolo o be a sena bagwera, le o tee ka monwanwa o be a sena le yena. Bana ba sekolo ba be ba sa nyake Bonolo kgauswi le bona ka ge a etšwa ka lapeng la go topa tša fase le gona la go hloka pudi ya leleme le letala. Taba yeo e be e phela e kweša Bonolo bohloko. Bonolo o ile ipotša gore o tlo swara ka moo go fišago gore a kgone go fetola seemo sa gabo. Bonolo o ile a thoma go swara ka moo go fišago, moo a ilego a batho ba mo motseng ka go tšwelela mphato wa marematlou ka dihlora. Batho ba mo motseng ba be ba maketše, ba ipotšiša gore go kgonagetše bjang gore ngwana wa go tšwa ka lapeng la go topa tša fase le gona la go hloka pudi ya leleme le letala o kgonne bjang go tšwelela mphato wa marematlou ka dihlora.

Ka morago gago hwetša dipoelo tšeo, Bonolo o ile a leletša ba ga sekolo sa go otlela difofane motato go kgopela thušo ya mašeleng go tšwetša dithuto pele. Ba rile go kwa dipoelo mo motatong ba amogela kgopelo ya Bonolo.

Bonolo o ile a ithutela go otlela difofane. Ka morago ga mengwaga ye šupa ke ge Bonolo a dithuto tša gagwe tša go ba mootledi wa difofane. Bonolo o ile a humana mošomo wa go otlela difofane. Bonolo o ile a thoma go šoma, a fetola seemo sa gabo. O ile a agela mmagwe le tatagwe ntlo. Bonolo o ile a thoma go ba lesogana la go hlomphega, la go ba le seriti, la go rata ke mang le mang mo setšhabeng. Ka nnete se bone thola boreledi teng ga yona go a baba.