“Bothata?” Lentšu la Nolitha le tletše tlabego. “Ga ke kwešiše.”

“Hmmm, wa bona, Mohumagatšana Solani, mekgwa ya gago e be e le, re ka re, ga se ya loka?”

“Ga se ya loka?”

Nolitha o ile ikwa a boeletša mantšu a gagwe gomme a itoma leleme. A ka se dumele go laolwa ke yena. Go kaone gore a homole, a mo tlogele gore a hlaloše.

“Mathata a mmalwa, gabotsebotse, “Mna Mahlangu a tšwela pele. “Sa mathomo ga ke gopole o mpotša gore o tla sepetša kgopolo ye ya ‘mpho” ya Marematlou.”

“Efela, effela—”

“Maemo ka tatelano, Mohumagatšana Solani wa morategi.” Lentšu la Mna Mhlangu le be le thomile go galefa motsotso ka motsotso. “Re na le tsela yeo re dirago dilo ka gona fa.”

“Efela, ke ile ka kgopela. Ke kgopetše Mna Ncane.”

Nolitha o be a gopola seo gabotsebotse.

“Tšwela pele, dira ka mo o kgonago,” Mna Ncane o boletše seo ge a boledišana le yena ka phapošing ya barutiši. Ka morago a sega. “Ke kgopolonyana yeo o nyakago go e bontšha bašomi-ka wena , eh? Mohumagatšana Solani, a kitima gohle bjalo ka nose. A direla gore re lebelelege o kare ga re dire selo.”

Nolitha o ile a mo hlokomologa. O šetše a tlwaetše dikgegeo tša gagwe ka nako yeo a bilego gona mo sekolong. Ke fa go tlo ruta, O ile a ikgopotša seo ka bogale.

“Efela go lokile?” a mmotšiša. “Re ka tšwela pele?”

“Ga ke ile go go thibela.” Hlogo ya Kgoro ya gagwe o ile a ithekga ka setulo gomme sa šikenyega kudu ka mo go tšhošago ka lebaka la boima bja gagwe.

Go no swana le ge o sa nthibela go tšea mphato wa Marematlou, a nagana. Le go beakanyetša melekwana ya mefato ya gago le ya ka, ke go emela ge wena o be o rengwa ke ‘hlogokgolo’ ye nngwe gape. Go rengwa ke hlogo ga HOD ya gagwe go be go fetogile motlae ka phapošing ya barutiši. Efela Nolitha a se bolele selo go tšeo. Sa mafelelo se a bego a sa nyake go se dira ke go befediša Mna Ncane gabjale. E sego mola yena le Mna Mahlangu e le bagwera ba potego.

“Ka fao o tla kgopela Mna Mahlangu? Ke Mohumagatšana Nene yo a rilego bokaone ke ge yena a ka mmotša.”

Morutiši wa tafola ya kgauswi o ile a emiša hlogo ya gagwe gomme a myemyela. “Ke kgopolo ye botse, Dengana,” a realo. “Mo fe sebakanyana hle, gomme o boledišane le Mahlangu.”

“Go lokile, go lokile,” Mna Ncane a mo phaya ka seatla gore a tloge. “Ke tla boledišana le yena.”

Gomme gabjale Mna Mahlangu o re seo ga se se dirwe, le gore ga se a latele maemo ka tatelano.

“Tshwarelo, morena,” Nolitha o ile lweša gore lentsu la gagwe le se phagame. “Mogongwe ke be ke swanetše go boledišana le wena ka bonna.”

“Ee, moratiwa, mogongwe o be o swanetše go dira bjalo.”

Mna Mahlangu o ile pholophotha dileipole tša sutu ya gagwe. Nolitha o be a nagana gore lešela leo le kwagala bjang ka tlase ga menwana ya gagwe ya go ota. “Letlalo sa Šaka, Mohumagatšana,” Faniswa, kgošigadi ya dilo ka moka tša fešene, a mo tsebiša. “Go no swana le tšeo George Clooney a di aparago.” Go bonala eka ke mohuta wa letšatši la George lehono.

Dinao tša Mna Mahlangu di be di sa bonagale ka morago ga teseke ya gagwe, efela Faniswa o mmoditše dilo ka moka ka ga mohuta wa moaperelo wa kakaretšo wa gagwe. “Ke tša maemo a godimo, Mohumagatšana. Dieta tša gagwe, sešupanako sa gagwe. Ga go selo le se tee seo se sa bitšego.”

“Le sefatanaga sa gawe,” Dalamuzi a tlaleletša. “Le ge se ile sa dirišwa pejana, ke Evoque ya 2013 yeo e jelego mašeleng a go lekana R400 000 goba bjalo.”

“Hayi, nyani? Aowa, ka nnete?” Nolitha o be a maketše kudu. “Go tla bjang gore hlogo ya sekolo e fihlelele dilo tše bjalo?” O ile a gopolo ka Polo ya gagwe ya go dirišwa pejana yeo e lego ka jarateng ya sekolo. E mmiditše R65 000 gomme o ikgantšha kudu ka yona. O ile a swanelwa ke go adima tšhelete go buti wa gagwe, Vuyani, gomme o sa mo lefela yona, 3000 ya diranta tše a di šometšego ka maatla kgwedi ye nngwe le ye nngwe.

Efela mo ke Mna Mahlangu, a tsena ka kgoro ya sekolo mesong ye mengwe le ye mengwe ka sefatanaga sa gagwe sa go kwametša makhura se segolo, a se kgantšhetša barutiši ba gagwe, a dira gore morutišigadi yo moswa wa go swana le yena a ikwe a le ditšhila tša go swana le tšeo di lego disolong tša dieta tša gagwe tša go bitša go fetiša tekanyo. Gomme mola baithuti ba sekolo sa gagwe ba abelana ka diteseke tša go robega, ba abelana ka dipuku tša go bala, ba sa tsebe gore naa barutiši ba bona ba tla tla diphapošing tša borutelo go tlo ba ruta eng goba eng go tloga go beke ye nngwe go ya go ye e latelago.

Nolitha o ile a gopola ka mo a hunnego letswele la gagwe ge Dalamuzi le Faniswa ba boledišana ka mokgwa wa bophelo wa go bitša kudu wa hlogo ya sekolo sa bona. Seo se bego se befediša kudu ke ka mo ba bego bolela ka maina a ditšweletšwa le dipalopalo gomme seo se sa ba tshwenye le gatee go swana le ka mo yena a tlabegilego ka gona, le ka mo ba lebelelanago ka gona ge yena a kgotsa ka mo Mna Mahlangu a fihlelelago tšeo ka moka go laetša gore ba tseba se sengwe.

Gomme gabjale, o eme pele ga gagwe, a ipotšiša gore o tlile go mo dira gore a mo kgopele bjang Sekhwama sa Lekase la Dipuku, a kwa pefelo ya gagwe e gola, a huna matswele a gagwe gape. O ile a lebelela go dikologa kantoro ya gagwe. Iketle, Nolitha, a ipotša. O se dire gore a go fihlelele.

***

Re botše gore o nagana eng: Goreng o nagana gore Dalumuzi le Faniswa ba be ba sa makale ge ba boledišana ka mokgwa wa bophelo bja hlogo ya sekolo?