Gwa kgorometšwa gape ka ge baithuti ba bantši ba be ba leka go hwetša tsela ya bona ya go ya ka pele.
“Phatlalalang!” Vuyani a goeletša. “Ba botše gore ba phatlalale.”

“Mabahambe. Etšwang! Etšwang! Etšwang!” Kgoeletšo ya tlala moyeng, gomme baithuti ba kiba mošito wa go sepelelana le seo.
“Etšwang!”
Ba kiba!
“Etšwang!”
Ba kiba!
“Etšwang!”

“Goreng o tlogetše seo se direga, Nolitha? Go dilo ka moka tša bošilo—”

Taelo ya kgalagala gomme Vuyani e le yena a bolelago, “Boa mo, Noli. Ba dire gore ba boele morago.”

O ile a mmogela ge seatla sa gagwe se leba lepanteng la gagwe. A mmogela ge a konopolla khanistara ya tšhipi ye nnyane.

“Aowa, Vuyi,” a goeletša. “Aowa!”

O ile a emišetša letsogo la gagwe godimo gomme a lahlela selo se sengwe lešabeng.
Labobedi, 9 Febereware 2016
11.05 a.m.

THUU!

Lešata le be le tswalela ditsebe, gwa latela setu sa go makatša. Ka morago gwa kwagala THUU le ye nngwe, gomme leru la muši, wo mohubedu le wo motalamorogo, wa thoma go dikologa. Baithuti ba be ba goeletša, ba lla, ba phumula mahlo a bona.

“Mohumagatšana! Mohumagatšana Solani!” a kwa lentšu la Cebo, a mmona ba mo gogela mabating a bulegilego a bene ya maphodisa. Andisiwe o be a mo šetše morago, le Funiswa.

“Aowa!” Nolitha o be a palelwa ke go lemoga lentšu la gagwe.

O ile a nyaka Vuyani ka mahlo. Ka nnete buti wa gagwe o tla mo thuša, a thuša baithuti ka moka? E ka ba o kae?

Gomme ka morago, ka lerung la muši wa go kgama, a mmona, a emetše ka thoko, sefahlego sa gagwe se bonala se lwala. O be a lebeletše lephodisa le lengwe le swere mošemanyana ka legetla, a emiša seatla sa gagwe go mmetha.

“Vuyi!” A goeletša, a mo kitimela. “Vuyi, mbambe, mo emiše!”

Buti wa gagwe a mo lebelela, mahlo a gagwe a tletše ka maikutlo a go hlakahlakana: letšhogo, pefelo, manyami. O ile a ya lephodiseng leo gomme a mo swara ka letsogo la gagwe. Sefahlego sa monna se be se tletše ka pefelo. Nolitha o be a le kgauswi kudu go ka kwa mantši ao a bego a lahlela go buti wa gagwe. “Naa o kwele gore ditšhila tše dinnyane tše di re bitša eng, Vuyani? O kare re no tla fa go tlo tlaišwa?”

“Ga se tša lebantšhwa wena.” Vuyani a realo.

Monna yo mongwe o ile a mmetha kgareng kgareng. “Dira mošomo wa gago le nna ke dire wa ka, Vuyani. Ge ke nyaka gore taba ye e be ya ka, ke tla dira bjalo.” O ile a swara mošemanyana, efela a kgona go tšhaba, a raga lenotlo la Vuyani ka maatla gomme a timelela lešabeng leo le goeletšago le muši le bohloko.

E se kgale mošemanyana a tšhabile lephodisa leo ke ge le swere moithuti yo mongwe ka bokamorago bja molala, a mo kgoromeletša go ye nngwe ya dibene. “Wena ditšhila tše dinnyane! Ke tla go bontšha gore kolobe ke mang! Nd’zakubonisa, Ke tla go bontšha—”

Nolitha a swara letsogo la gagwe. “Aowa, hle. Ngumnt’ana. E sale ngwana.”

Lephodisa la retologa, le befetšwe. “Se ke tsela yeo le rutago bana go itshwara?”

“E sale ba bannyane. Ba be ba sa dire selo. Tšea nna legatong la gagwe,” a goeletša.

“Se tshwenyege, mohumagadi, ke tla go tšea le wena.” O ile a mo kgoromeletša ka gare, a phathankgela lebatong la tšhipi la mepopotlo. “Ke nako ya lena ka moka gore le fole.”

Go ile gwa le go lla kudu ga ditšhipi ge lebati le tswalelwa.
Labobedi, 9 Febereware

6.15 p.m.

“Ke nako mang, Mohumatšana?” Mandla a botšiša.

“Kotara go ya go iri ya boselela, Mandla. O phetše gabotse?”

“Mma wa ka o ile go tshwenyega kudu. O nyaka go tseba gore ke kae ka dinako tšohle.”

“Le nna, Mohumagatšana,” a realo Weziwe. “Ga a nyake ke boa morago ga nako ntle le ge ke sehlopheng sa go ithuta goba khwaereng. Le gona go swanetše go ba le motho yo a mphelesetšago gae.”

“Bobuti ba ka ba bannyane ba ile go swarwa ke tlala ge ba sa re ntšhe ka pela,” Fungile a realo. “Ke mošomo wa ka go ba direla dijo tša go lalela. O nagana gore ba tla re lokolla neng go ya gae, Mohumagatsana?”

“Ga ke tsebe.” Nolitha o swanetše gore a bolele nnete. “Ka mo ke boletšego, mogwera wa ka Jama o ile go dira tšohle ka mo a kgonago.”

“Efela, Mohumatšana,” Dalumuzi a bolela, “mogwera wa sesi wa ka o ile a ya kgolegong dikgwedi tše nne. Ba beile peile ya gagwe godimo kudu gore lapa la gabo le e lefele. Gomme o be a sa dira selo. O be a no ikemišetša seripa sa letlakala le re ‘Setšhaba sa Geno se Nyaka Thuto.’ Yinton’erongo nalonto? Ke eng sa phošo fao?”

***

Re botše gore o nagana eng: Goreng o nagana gore maphodisa a mantši a re go ‘lebantšwe bona? Goreng ba ekwa se? Naa o ile wa kwa dikanegelo tše dingwe tša go swana le tša mogwera wa sesi wa Dalumuzi?