Baqede ukudla. Abuke isikhathi uRhino. Sekuyoshaya ihora lesihlanu.
“Asenze sihambe bosisi, ningaze nishawe emakhaya.”
“Ngubani isikhathi?” kubuza uMary.
“Sekuyoshaya u-Five.”
“Ha!” asukume uMary, “Kumele sihambe ngempela”
“Unayo iselula?” kubuza uRhino bephuma esicabheni sase- KFC.
“Anginayo.”
URhino ufaka isandla ephaketheni, akhiphe i-Samsung Galaxy.
“Ungakwazi ukusebenzisa le foni ukuze sixhumane?”
“Ha! Ekhaya ngizothi ngiyithathephi?”
ULondi uyayihlwitha esandleni sikaRhino ifoni, athi, “Uzoyithatha uMary, malume. Kahle nawe Mary ukuganga ngomalume. Ulala wedwa, uzofona ebusuku kuphela umalume, noma umtshele isikhathi angafona ngaso.”
“Uma ubaba eseyizwa ikhala?”
“Uzothi bekufona mina,” kusho uLondi.
“Manje uma usuyifuna lefoni uzoyithola kanjani?” kubuza uMary ebuka uRhino.
“Angiyijahile. Uma uyithanda ungayithatha kube ngeyakho.”
“Nc nc nc, isilingo ke lesi. Kulungile ngizoyithatha. Ngicela ungangifaki enkingeni. Ubaba uzongibulala.”
“Ngitshele wena isikhathi engingakuthola ngaso.”
“Kungcono sixhumane ku-whatsapp”
“Nalokho kulungile, Mary,” kusho uRhino, “Mina engikufunayo ukuthi sixhumane.
URhino noMary babukana esibukweni esingaphakathi emotweni indlela yonke. Iqala ukuvutha inhlansi yothando nakuye uMary manje, akasamncishi amehlo. UMary ucela ukwehla emotweni ingakafiki esangweni. Behle bobabili noLondi.
“Kodwa yini le ongenzisa yona Londi?” kubuza uMary.
“Hawu, Mary, akusikho ukuthi usuqomile. Wenzela ukuxoxa nje, uchithe isizungu. Ngicela ungiboleke yona phela lefoni, mngani.”
“Kanti ubuzithathela wena?”
“Ehhe, angithi ubuyinqaba.”
“Uma eseyifuna umniniyo?”
“Uzongitshela ngiyibuyise.”
“Uma isifa?”
“Ibulawa yini? Ucabanga ukuthi ngi-careless ngaleyo ndlela?”
“Hhayi, Londi, ngeke kulunge. Angifuni ayazi inombolo yami uRhino. Ngizofaka enye i-simcard kule foni. Kuzoba ne-simcard yokuxhumana noRhino kuphela.”
“Kulungile uma usho njalo. Usale kahle.” usho egqishazela ehamba uLondi.
NoMary asondele esangweni. Kuqhamuke unogada egijima, avule isango.
“Unjani, Mary?” kubuza unogada.
“Ngiyaphila. Unomusa bo namuhla.”
Bahleke. Aqalaze unogada, adonse uMary ngengalo.
“Kunesipho sakho la. Kodwa angazi noma uzosamukela.”
“Isipho? Siphuma kubani?”
“Komunye umlisa.” Unogada ungena endlini yakhe athathe isikhwama esinesipho. “Nasi.”
Asamukele ngokumangala uMary. Asivule. Ahlahle amehlo. Akhiphe i-card, alifunde. Libhalwe amagama amnandi. Nakhu esemamatheka. Abuke ekugcineni. Siphuma kuRhino.
“Hawu! Ubelana? Nini?” ubuza ethukile.
“Emini.”
“UmaMgobhozi akambonanga?”
“Angazi. Uyisoka lakho lo mlisa?”
“Cha, omunye umuntu nje ongilandelayo. Uma ngimbona ngizombuyisela lesipho. Angifune ndoda mina!” uzenza othukuthele, kodwa ufile injabulo.
Ungena endlini, agijime ayozilahla embhedeni. Abuke isipho sakhe.
“Maye! Ubucwebe obubiza kanje? Kodwa ngizothi ngibuthathephi? Hhayi suka, ngizobufihla”
Abuke nezimbali. “Zona-ke ngizozishutheka ngaphansi kombhede,” uhleka yedwa.
Ujabula ngathi uyingane encane. Ikhule ngamandla inhlansi yothando, iphenduke ilangabi.
“Phela iyangithanda le ndoda! Ayizenzisi. Kodwa kumele ngiqale ngibone impilo eyiphilayo. Nakhu uMaMgobhozi esola ukuthi ingumgulukudu”
***
Uthini umbono wakho: Yini eyenza uMary aguqule umqondo ngoRhino?